മലപ്പുറം മമ്പാട് എംഇഎസ് കോളേജിന് സമീപം നാട്ടുകാരുടെ ഭീഷണി ഫ്‌ളെക്‌സ്. കോളേജ് സമയത്തിന് ശേഷവും വിദ്യാർത്ഥികളായ ആൺകുട്ടികളും പെൺകുട്ടികളും പ്രദേശത്ത് തുടരുന്നത് നാട്ടുകാർക്ക് ബുദ്ധിമുട്ടുണ്ടാക്കുന്നുവെന്നാണ് പൗരസമിതിയുടെ പേരിൽ പ്രത്യക്ഷപ്പെട്ട ഫ്‌ളെക്‌സിൽ പറയുന്നത്.

വൈകീട്ട് അഞ്ച് മണിക്ക് ശേഷം കോളേജ് സ്ഥിതി ചെയ്യുന്ന പ്രദേശത്ത് വിദ്യാർത്ഥികൾ തുടർന്നാൽ കൈകാര്യം ചെയ്യുമെന്നും ഇത് കുടുംബമായി ജീവിക്കുന്നവരുടെ അവകാശമാണിതെന്നും സൂചിപ്പിക്കുന്നു.

സദാചാര ഗുണ്ടായിസമല്ലെന്ന് അവകാശപ്പെടുന്ന ഫ്‌ളെക്‌സിൽ കോളേജിൽ നടക്കുന്ന പരിപാടികൾ കഴിഞ്ഞ് വൈകിയും വിദ്യാർത്ഥികൾ പ്രദേശത്ത് തുടരുന്നതും തമ്മിൽ ഇടപഴകുന്നതും തങ്ങൾക്ക് അലോസരമുണ്ടാക്കുന്നു, വിദ്യാർത്ഥികൾ തമ്മിൽ തല്ലുണ്ടാക്കുന്നതും ഇവർ ലഹരി ഉപയോഗം നടത്തുന്നതും തങ്ങൾക്ക് ബുദ്ധിമുട്ടുണ്ടാക്കുന്നുവെന്നും നാട്ടുകാർ കുറ്റപ്പെടുത്തുന്നു.

ഫ്‌ലെക്സ് ബോര്‍ഡില്‍ എഴുതിയിരിക്കുന്നത്:
എംഇഎസ് മമ്പാട് കോളേജ് വിദ്യാര്‍ത്ഥികളുടെ ശ്രദ്ധയ്ക്ക്...

ഈ പരിസരത്ത് കോളേജ് സമയം കഴിഞ്ഞതിന് ശേഷവും ആണ്‍കുട്ടികളും പെണ്‍കുട്ടികളും തമ്പടിക്കുകയും ലഹരി ഉപയോഗം നടത്തുന്നതായും, വിദ്യാര്‍ത്ഥികള്‍ തമ്മില്‍ പരസ്പരം അക്രമത്തില്‍ പെടുന്നതായും ശ്രദ്ധയില്‍ പെട്ടിരിക്കുന്നു. കൂടാതെ അവരുടെ സദാചാര മര്യാദയില്ലാത്ത പെരുമാറ്റവും നാട്ടുകാര്‍ക്ക് അലോസരമുണ്ടാക്കുന്നു.

ആയതിനാല്‍ അഞ്ച് മണിക്ക് ശേഷം ഈ പരിസരത്തോ പ്രദേശത്തോ വിദ്യാര്‍ത്ഥികളെ കാണാനിട വന്നാല്‍ അവരെ നാട്ടുകാര്‍ കൈകാര്യം ചെയ്യുന്നതും രക്ഷിതാക്കളെ വിളിച്ചു ഏല്‍പിക്കുന്നതുമാണ്. ഇത് സദാചാര ഗുണ്ടായിസമല്ല. വളര്‍ന്നുവരുന്ന കുട്ടികളും, കുടുംബവുമായി ജീവിക്കുന്ന നാട്ടുകാരുടെ അവകാശമാണ്. എന്നാണ് ഇതിൽ പരാമർശിക്കുന്നത്. 

വിദ്യാർത്ഥികൾ തമ്മിൽ തല്ലുണ്ടായതിന് പിന്നാലെ പോലീസിനെ അറിയിച്ചെങ്കിലും നടപടികൾ ഒന്നുമുണ്ടായില്ലെന്ന് ഇവർ പരാതിപ്പെടുന്നു. ഈ സാഹചര്യത്തിലാണ് നാട്ടുകാർ ചേർന്ന് ഫ്‌ളെക്‌സ് വെച്ചത് എന്നാണ് ഇവർ അറിയിക്കുന്നത്. ഫ്‌ളെക്‌സ് സാമൂഹിക മാദ്ധ്യമങ്ങളിൽ ചർച്ചയായതിന് പിന്നാലെ അഞ്ച് മണിയെന്നത് ആറു മണിയാക്കി തിരുത്തിയിട്ടുണ്ട്. 

ഫ്ളെക്സിനെതിരെ വ്യാപകമായ വിമർശനമാണ് ഉയരുന്നത്. അഞ്ചു മണിക്ക് ശേഷം കോളേജ് പരിസരത്ത് വിദ്യാർത്ഥികളെ കണ്ടാൽ കൈകാര്യം ചെയ്യുമെന്ന ഭീഷണി നിയമ സംവിധാനത്തോടുള്ള വെല്ലുവിളിയാണെന്ന് വിദ്യാർത്ഥികൾ കുറ്റപ്പെടുത്തുന്നു. പ്രദേശത്ത് സദാചാരമാണെന്ന ആരോപണവും വിദ്യാർത്ഥികൾ ഉയർത്തുന്നുണ്ട്. ഫ്‌ലെക്‌സിനെതിരെ വ്യാപകമായ ട്രോളുകളും പ്രചരിക്കുന്നുണ്ട്.