അതിര്‍ത്തി തര്‍ക്കം... പള്ളികമ്മറ്റി സെക്രട്ടറിയുടെ നേതൃത്വത്തിലുളള സംഘം വീട് കയറി ആക്രമിച്ചു.... വീടിന്റെ ചുറ്റുമതില്‍, മുന്‍ഭാഗത്തെ പടികള്‍, മുകള്‍ഭാഗത്തെ ഷീറ്റുകള്‍ എന്നിവ സംഘം മാരകായുധങ്ങള്‍ ഉപയോഗിച്ച് തല്ലിത്തകര്‍ത്തു, സംഭവത്തില്‍ പള്ളികമ്മറ്റി സെക്രട്ടറിയുള്‍പ്പടെ ആറ് പേര്‍ക്കെതിരെ കേസെടുത്ത് പൊലീസ് .

കോഴിക്കോട് കല്ലായ് സ്വദേശിയായ യഹിയയുടെ വീടാണ് ഒരുസംഘമാളുകള്‍ മാരകായുധങ്ങള്‍ ഉപയോഗിച്ച് തല്ലിപ്പൊളിച്ചത്. സംഭവത്തെ തുടര്‍ന്ന് പള്ളികമ്മറ്റി സെക്രട്ടറിയുള്‍പ്പടെ ആറ് പേര്‍ക്കെതിരെ കേസെടുത്ത് പോലീ്‌സ്.

കഴിഞ്ഞ വെളളിയാഴ്ച്ചയാണ് കല്ലായ് സ്വദേശി യഹിയയുടെ വീടിന്റെ മുന്‍ഭാഗം ഒരുസംഘമാളുകള്‍ മാരകായുധങ്ങള്‍ ഉപയോഗിച്ച് തല്ലി തകര്‍ത്തത്. യഹിയയുടെ ഭാര്യ ആയിഷബി മാത്രം വീട്ടിലുളളപ്പോഴായിരുന്നു ഇവരുടെ ആക്രമണമുണ്ടായത്.

വീടിന്റെ അതിര്‍ത്തിയോട് ചേര്‍ന്ന് സ്ഥിതി ചെയ്യുന്ന കട്ടയാട്ട്പറമ്പിലെ മസ്ജിദ് നൂറാനിയ പളളി സെക്രട്ടറിയുടെ നേതൃത്വത്തിലുളള ആറംഗ സംഘം ആക്രമണം നടത്തിയെന്നാണ് പരാതിയില്‍ പറയുന്നത്.

തന്റെ വീട് നില്‍ക്കുന്ന നാലര സെന്റ് ഭൂമിയോട് ചേര്‍ന്ന് നിര്‍മ്മിച്ച പള്ളിയുടെ ശുചിമുറിയിലെ എക്‌സോസ്റ്റ് ഫാന്‍ തന്റെ വീടിന് അഭിമുഖമായി സ്ഥാപിച്ചത് ചോദ്യം ചെയ്ത് യഹിയ കോര്‍പറേഷനില്‍ പരാതി നല്‍കിയിട്ടുണ്ടായിരുന്നു. കോര്‍പറേഷന്‍ നടത്തിയ അന്വേഷണത്തില്‍ ശുചിമുറിനിര്‍മാണം കെട്ടിട നിര്‍മാണ ചട്ടം ലംഘിച്ചെന്നാണ് കണ്ടെത്തിയത്.

തുടര്‍ന്ന് ശുചിമുറി പൊളിച്ചുമാറ്റാന്‍ കോര്‍പറേഷന്‍ ഉത്തരവിട്ടു. അതോടെയാണ് പളളിക്കമ്മറ്റി അംഗങ്ങള്‍ക്ക് തന്നോട് പക തുടങ്ങിയതെന്ന് യഹിയ പറയുന്നു. ആക്രമണത്തില്‍ ലക്ഷക്കണക്കിന് രൂപയുടെ നഷ്ടമുണ്ടായി. പളളി കമ്മറ്റിയിലെ ചിലര്‍ തനിക്കും കുടുംബത്തിനുമെതിരെ നോട്ടീസ് അടിച്ച് വ്യാജ പ്രചരണം നടത്തുകയാണെന്നും കുടുംബത്തെ ഒറ്റപ്പെടുത്തുകയാണെന്നും യഹിയ പറയുന്നു.

അതേസമയം പള്ളിയുടെ മതിലിനോട് ചേര്‍ന്ന് യഹിയ അനധികൃത നിര്‍മ്മാണം നടത്തിയെന്നാണ് പള്ളികമ്മറ്റി സെക്രട്ടറി വാദിക്കുന്നത്. അക്രമം നടത്തിയത് ആരാണെന്ന് അറിയില്ലെന്നും അതിര്‍ത്തി തര്‍ക്കം രമ്യമായി പരിഹരിക്കാന്‍ ശ്രമിച്ചിട്ടും കുടുംബം തയ്യാറാകുന്നില്ലെന്നും പള്ളികമ്മറ്റി സെക്രട്ടറി പറഞ്ഞു.