തലസ്ഥാനത്ത് വീണ്ടും ഗുണ്ടാ ആക്രമണം: തിരുവനന്തപുരം മേനംകുളത്ത് ബോംബേറില്‍ യുവാവിന്റെ വലത് കാല്‍ തകര്‍ന്നു, ലഹരി മാഫിയായാണ് ആക്രമണത്തിന് പിന്നിലെന്ന് പ്രാഥമിക നിഗമനം, പോലീസ് അന്വേഷണം ഊര്‍ജ്ജിതമാക്കി.

തുമ്പ സ്വദേശിയായ രാജന്‍ ക്ലീറ്റസിനു നേരെയാണ് ആക്രമണമുണ്ടായത്. ഇയാളുടെ വലതുകാല്‍ ചിന്നിച്ചിതറിപ്പോയി. തുമ്പ സ്വദേശിയും നിരവധി കേസുകളിലെ പ്രതിയുമായ ലിയോണ്‍ ജോണ്‍സന്റെ നേതൃത്വത്തിലായിരുന്നു ആക്രമണമെന്നാണ് പൊലീസ് പറയുന്നത്. ഇയാള്‍ നിരവധി കേസുകളില്‍ പ്രതിയാണ്.

രാജന്‍ ക്ലീറ്റസിനു നേരെ ലിയോണ്‍ ജോണ്‍സണ്‍ സോഷ്യല്‍ മീഡിയയിലൂടെ ഭീഷണി മുഴക്കി. ലഹരി വില്പനയെ എതിര്‍ത്തതായിരുന്നു ഇതിന് കാരണം. എന്നാല്‍ പൊലീസ് ഇത് കാര്യമായി എടുത്തില്ല. കഴക്കൂട്ടത്തിന് സമീപം പോത്തന്‍കോട്ട് നേരത്തേ ഗുണ്ടാസംഘം യുവാവിന്റെ കാല്‍ വെട്ടിയെടുത്ത സംഭവം ഉണ്ടായതോടെ പൊലീസ് ശക്തമായ നടപടികള്‍ സ്വീകരിച്ചിരുന്നു. അതോടെ അക്രമസംഭവങ്ങള്‍ക്ക് ശമനമുണ്ടായി


.എന്നാല്‍ പൊലീസ് ഇടപെടല്‍ നിലച്ചതോടെ ഗുണ്ടകള്‍ വീണ്ടും സജീവമാകാന്‍ ആരംഭിച്ചു. ഈയിടെ മദ്യപാനത്തിനിടെയുണ്ടായ തര്‍ക്കത്തെത്തുടന്ന് കഴക്കൂട്ടത്തിന് സമീപത്തായി ചന്തവിളയില്‍ ഗുണ്ടാനേതാവ് അടിയേറ്റ് മരിച്ചിരുന്നു.

പ്രദേശത്ത് ലഹരി, ഗുണ്ടാ സംഘങ്ങള്‍ സജീവമാണെന്നും പൊലീസ് കാര്യക്ഷമമായി ഇടപെടണമെന്നും നാട്ടുകാര്‍ ആവശ്യപ്പെട്ടെങ്കിലും ഒന്നുമുണ്ടായില്ല. അതാണ് ഇന്നലത്തെ ആക്രമണത്തിന് വഴിവച്ചത്.

ഇതിനിടെ ഗുണ്ടാസംഘങ്ങളുമായുള്ള പൊലീസ് ബന്ധത്തിന് നിരവധി തെളിവുകളും പുറത്തുവന്നിരുന്നു. കഴക്കൂട്ടത്തിനടുത്ത് മേനംകുളത്ത് വഴിയരികില്‍ സംസാരിച്ചുകൊണ്ട് നില്‍ക്കുന്നതിനിടെയായിരുന്നു രാജന്‍ ക്ലീറ്റസിനുനേരെ ബൈക്കിലെത്തിയ സംഘം ബോംബെറിഞ്ഞത്. ഇയാളെ ഉടന്‍ തന്നെ മെഡിക്കല്‍കോളേജ് ആശുപത്രിയില്‍ പ്രവേശിപ്പിച്ചു.