20 ലക്ഷം രൂപ മോചനദ്രവ്യം ആവശ്യപ്പെട്ട് എഞ്ചിനീയറിംഗ് വിദ്യര്‍ത്ഥി ശ്യാമല്‍ മണ്ഡലിനെ തട്ടിക്കൊണ്ടുപോയി കൊലപ്പെടുത്തി കോവളം പാറമടയ്ക്ക് സമീപം കുഴിച്ചിട്ട കേസില്‍ രണ്ടാം പ്രതി ആന്‍ഡമാന്‍ സ്വദേശി മുഹമ്മദ് അലി കുറ്റക്കാരനെന്ന് തലസ്ഥാനത്തെ സിബിഐ കോടതി കണ്ടെത്തി.

പ്രതിയുടെ ജാമ്യ ബോണ്ട് റദ്ദാക്കിയ കോടതി പ്രതിയെ റിമാന്‍ഡ് ചെയ്തു. പ്രതിക്കുള്ള ശിക്ഷ സിബിഐ ജഡ്ജി കെ. സനില്‍കുമാര്‍ 14 ന് (ബുധനാഴ്ച) പ്രഖ്യാപിക്കും. ധനികനായ പിതാവിന്റെ ധനം മോഹിച്ച് നിരപരാധിയും കായികമായി പ്രതികരിക്കാന്‍ ശേഷിയുമില്ലാത്ത വിദ്യാര്‍ത്ഥിയായ യുവ രക്തത്തിനെ കൊലപ്പെടുത്തി കുഴിച്ചുമൂടി മരണത്തിലേക്ക് തള്ളിവിട്ട പ്രതി കുറ്റക്കാരനെന്ന് കോടതി ഉത്തരവില്‍ നിരീക്ഷിച്ചു.

53 സാക്ഷി മൊഴികളുടെയും 78 കൊണ്ടി മുതലുകളുടെയും തെളിവു മൂല്യം വിലയിരുത്തിയാണ് പ്രതി കുറ്റക്കാരനെന്ന് കോടതി കണ്ടെത്തിയത്. ഹോസ്റ്റല്‍ അധികൃതരുടെ സംരക്ഷണയില്‍ കഴിഞ്ഞ വിദ്യാര്‍ത്ഥിയെ തട്ടിക്കൊണ്ട് പോകല്‍ , കൊലപാതകം , മൊബൈല്‍ ഫോണ്‍ മോഷണം എന്നിവയുടെ ഗൂഡാലോചനക്കാണ് കുറ്റക്കാരനെന്ന് കണ്ടെത്തിയത്.


ഏത് കുറ്റം ചെയ്യാനാണോ ഗൂഢാലോചന നടത്തിയത് ആ കുറ്റത്തിനുള്ള അതേ ശിക്ഷയായതിനാല്‍ കൊലക്കയറോ ജീവ പര്യന്തം തടവോ പ്രതിയ്ക്ക് ശിക്ഷ ലഭിക്കാവുന്നതാണ്. തെളിവില്ലെന്ന പ്രതിയുടെ വാദം തള്ളിക്കൊണ്ടാണ് വിചാരണ കോടതി പ്രതിയെ കുറ്റക്കാരനെന്ന് കണ്ടെത്തി റിമാന്‍ഡ് ചെയ്തത്. ക്രൂരപാതകത്തിന് പ്രതിക്ക് വധ ശിക്ഷ നല്‍കണമെന്ന് സി ബി ഐ കോടതിയില്‍ ആവശ്യപ്പെട്ടിട്ടുണ്ട്.



. ദുക്‌സാക്ഷികളില്ലാത്ത കേസില്‍ സാഹചര്യത്തെളിവുകളുടെ ചങ്ങലക്കണ്ണികള്‍ മിസ്സിംഗ് ലിങ്കുകള്‍ ഇല്ലാതെ തങ്ങള്‍ കോര്‍ത്തിണക്കിയതായും അന്വേഷണ ഏജന്‍സിയായ സിബിഐ അവകാശപ്പെട്ടു. വിചാരണ പൂര്‍ത്തിയായി പ്രതിയെ കോടതി ചോദ്യം ചെയ്ത് മൊഴി രേഖപ്പെടുത്തിയ ശേഷം നടന്ന അന്തിമ വാദത്തിലാണ് സിബിഐ ജഡ്ജി കെ. സനില്‍കുമാര്‍ മുമ്പാകെ ഈ വാദം ഉന്നയിച്ചത്.