മെയ് നാലിന് ഹേമ കമ്മിറ്റി റിപ്പോർട്ട് ചർച്ച ചെയ്യാൻ സർക്കാർ യോഗം വിളിച്ചു. എല്ലാ സിനിമാ സംഘടനകളെയും യോഗത്തിൽ പങ്കെടുക്കാൻ ക്ഷണിച്ചിട്ടുണ്ട്. നടിയെ ആക്രമിച്ച കേസുമായി ബന്ധപ്പെട്ടാണ് സിനിമാമേഖലയിലെ പ്രശ്‌നങ്ങൾ പഠിക്കാനായി സർക്കാർ ഹേമ കമ്മിറ്റിയെ നിയോഗിച്ചത്. കമ്മിറ്റി റിപ്പോർട്ട് തയ്യാറാക്കി സർക്കാരിന് നൽകിയെങ്കിലും അത് ഇതുവരെയും പുറത്തുവിട്ടിരുന്നില്ല. ഡബ്ല്യുസിസി അടക്കമുള്ളവർ ഹേമ കമ്മിറ്റി റിപ്പോർട്ട് പുറത്തു വിടണമെന്ന് പലവട്ടം സർക്കാരിനോട് ആവശ്യപ്പെട്ടിരുന്നു.

എന്നാൽ ഇക്കാര്യത്തിൽ കൃത്യമായ ഒരു മറുപടിയും സർക്കാർ പറഞ്ഞിരുന്നില്ല. കഴിഞ്ഞ ദിവസം നടനും നിർമ്മാതാവുമായ വിജയ് ബാബുവിനെതിരെ നടി ലൈംഗികാരോപണം ഉന്നയിച്ചതോടെയാണ് ഹേമ കമ്മിറ്റി റിപ്പോർട്ട് വീണ്ടും ചർച്ചയാകുന്നത്. റിപ്പോർട്ട് പുറത്തുവിടുമെന്ന് ഡബ്ല്യു സി സി വീണ്ടും സർക്കാരിനോട് ആവശ്യമുന്നയിച്ചിരുന്നു. ഇതിന് പിന്നാലെയാണ് സർക്കാർ യോഗം വിളിച്ചിരിക്കുന്നത്.