സങ്കടക്കാഴ്ചയായി... വെള്ളനാട് വാഹനാപകടത്തിൽ പരിക്കേറ്റ് ചികിത്സയിലായിരുന്ന വയോധിക മരിച്ചു. വെള്ളനാട് സ്വദേശി ഗീതയാണ് മരിച്ചത്. 75 വയസ്സായിരുന്നു. ഇന്നലെ വെളുപ്പിന് അഞ്ചുമണിയോടെ പ്രഭാതസവാരിക്കിറങ്ങിയ ഗീതയെയും ബന്ധുവിനെയും ബൈക്ക് ഇടിച്ചു തെറിപ്പിക്കുകയായിരുന്നു.

ഗുരുതരമായി പരിക്കേറ്റ ഗീത മെഡിക്കൽ കോളജ് ആശുപത്രിയിൽ വെന്റിലേറ്ററിൽ ചികിത്സയിലായിരുന്നു. ബൈക്ക് ഓടിച്ചിരുന്ന വെള്ളനാട് സ്വദേശി നിതിൻ കൃഷ്ണനെ പൊലീസ് കസ്റ്റഡിയിലെടുക്കുകയും ചെയ്തു. അപകടത്തിന് പിന്നാലെ ഇയാൾ സ്ഥലത്തു നിന്നും കടന്നുകളഞ്ഞിരുന്നു. അറസ്റ്റ് ചെയ്ത നിതിനെ ജാമ്യത്തിൽ വിട്ടു.

വളവിൽ പെട്ടെന്ന് ആളുകളെ കണ്ടപ്പോൾ ഭയന്ന് നിയന്ത്രണം വിട്ടുപോയെന്നാണ് ഇയാൾ പൊലീസിന് മൊഴി നൽകിയത്. അമിത വേഗത്തിലായിരുന്നു ബൈക്ക് ഓടിച്ചിരുന്നതെന്ന് പൊലീസ് . പേടി കൊണ്ടാണ് ബൈക്ക് നിർത്താതെ പോയതെന്നും നിതിൻ പൊലീസിനോട് പറഞ്ഞു. അപകടത്തിന്റെ സിസിടിവി ദൃശ്യങ്ങൾ പുറത്തു വന്നിട്ടുണ്ട്.