കാമുകനൊപ്പം ജീവിക്കാനായി ഭര്‍ത്താവിനെ ലഹരിമരുന്നു കേസില്‍ കുടുക്കാന്‍ ശ്രമിച്ചെന്ന കേസില്‍ യുവതിക്ക് മാരമായ ലഹരിമരുന്നെത്തിച്ചു കൊടുത്ത സംഘത്തില്‍പെട്ട യുവാവ് അറസ്റ്റില്‍...
കാമുകനൊപ്പം ജീവിക്കാനായി ഭര്‍ത്താവിനെ ലഹരിമരുന്നു കേസില്‍ കുടുക്കാന്‍ ശ്രമിച്ചെന്ന കേസില്‍, യുവതിക്കു മാരക ലഹരിമരുന്നായ എംഡിഎംഎ എത്തിച്ചുകൊടുത്ത സംഘത്തില്‍പെട്ട യുവാവ് അറസ്റ്റിലായി . കോഴിക്കോട് പന്തീരാങ്കാവ് പാലാഴി ഭാഗത്തെ സരോവരം വീട്ടില്‍ ശ്യാം റോഷ് (25) ആണ് അറസ്റ്റിലായത്.
പുറ്റടി അമ്പലമേട് തൊട്ടാപുരയ്ക്കല്‍ സുനില്‍ വര്‍ഗീസിനെ കള്ളക്കേസില്‍ കുടുക്കാന്‍ ശ്രമിച്ചെന്ന കേസില്‍ ഭാര്യയും വണ്ടന്മേട് മുന്‍ പഞ്ചായത്തംഗവുമായ സൗമ്യ ഏബ്രഹാം (33), കൊല്ലം കുന്നത്തൂര്‍ മൈനാകപ്പള്ളി വേങ്ങകര റെഹിയാ മന്‍സിലില്‍ എസ്.ഷാനവാസ് (39), കൊല്ലം കോര്‍പറേഷന്‍ മുണ്ടയ്ക്കല്‍ അനിമോന്‍ മന്‍സിലില്‍ എസ്.ഷെഫിന്‍ഷാ (24) എന്നിവരെ നേരത്തേ പിടികൂടിയിരുന്നു.
ഷെഫിന്‍ഷായ്ക്ക് എംഡിഎംഎ എത്തിച്ചുനല്‍കിയതിനാണു ശ്യാം റോഷിനെ വണ്ടന്മേട് എസ്എച്ച്ഒ വി എസ്.നവാസിന്റെ നേതൃത്വത്തില്‍ പിടികൂടിയത്.
സിപിഒ ടിനോജ്, ഇടുക്കി ജില്ലാ പൊലീസ് മേധാവിയുടെ ലഹരിവിരുദ്ധ സ്‌ക്വാഡായ ഡാന്‍സാഫിലെ അംഗങ്ങളായ മഹേശ്വരന്‍, ജോഷി, ടോം സ്‌കറിയ എന്നിവരാണു പൊലീസ് സംഘത്തിലുണ്ടായിരുന്നത്.
സുനിലിന്റെ സ്‌കൂട്ടറില്‍ ലഹരിമരുന്നു വച്ചിട്ട് പൊലീസിനു വിവരം കൊടുക്കുകയും അറസ്റ്റ് ചെയ്യിക്കുകയുമായിരുന്നു. സുനിലിന് ഇതുമായി ബന്ധമില്ലെന്നു മനസ്സിലാക്കിയതിനെത്തുടര്‍ന്നു നടത്തിയ അന്വേഷണത്തിനൊടുവിലാണ് ഭാര്യ അടക്കമുള്ളവര്‍ പിടിക്കപ്പെട്ടത്.
https://www.facebook.com/Malayalivartha
