പ്രിൻസിപ്പൽ സെക്രട്ടറി പദവി നൽകിയതിന് പിന്നാലെ ടി എൻ സീമയ്ക്ക് സർക്കാർ പ്രതിമാസ ശമ്പളം നിശ്ചയിച്ച് ഉത്തരവിറക്കി. 1,66,800 രൂപയാണ് ടി എൻ സീമയ്ക്ക് സർക്കാർ നിശ്ചയിച്ച പ്രതിമാസ ശമ്പളം. നവകേരളം കർമപദ്ധതിയുടെ രണ്ടാംഘട്ടത്തിലെ കോഓർഡിനേറ്ററും സിപിഐഎം സംസ്ഥാന കമ്മിറ്റി അംഗവുമായ ടി എൻ സീമയ്ക്ക് പ്രിൻസിപ്പൽ സെക്രട്ടറി പദവി നൽകിയതിന് പിന്നാലെയാണ് സർക്കാർ തീരുമാനം.

സർക്കാരിന് ശമ്പളം നിശ്ചയിച്ചു നൽകണമെന്ന് ആവശ്യപ്പെട്ട് ടി എൻ സീമ കത്ത നൽകിയിരുന്നു. ഇതിന്റെ അടിസ്ഥാനത്തിലാണ് പദ്ധതി നിർവഹണ വിലയിരുത്തൽ നിരീക്ഷണ വകുപ്പ് ഉത്തരവിറക്കിയത്.ലൈഫ്, ആർദ്രം, ഹരിത കേരളം മിഷൻ, പൊതുവിദ്യാഭ്യാസ സംരക്ഷണ യജ്ഞമായ വിദ്യാകിരണം എന്നിവയെയും കേരള പുനർനിർമാണ പദ്ധതിയെയും ഉൾപ്പെടുത്തി പ്രവർത്തനങ്ങൾ ഏകോപിപ്പിക്കുകയാണ് നവകേരള കർമപദ്ധതി രണ്ടാംഘട്ടത്തിന്റെ ലക്ഷ്യം

പ്രിന്‍സിപ്പള്‍ സെക്രട്ടറി പദവി നല്‍കിയ സര്‍ക്കാര്‍ സിപിഐ എം നേതാവായ സീമക്ക് ഒരു ഡ്രൈവറേയും ഒരു പ്യൂണിനേയും അനുവദിക്കാന്‍ മാര്‍ച്ച് 30ന് കൂടിയ മന്ത്രിസഭാ യോഗം അനുമതി നല്‍കിയിരുന്നു.അഡീഷണല്‍ ചീഫ് സെക്രട്ടറി ബിശ്വനാഥ് സിന്‍ഹ ഇതു സംബന്ധിച്ച ഉത്തരവിറക്കുകയും ചെയ്തിരുന്നു.

ഐ.എ.എസ് ലഭിക്കുന്നയാള്‍ക്ക് മിനിമം 25 വര്‍ഷംസര്‍വീസാകുമ്പോള്‍ ലഭിക്കുന്ന പദവിയാണ് പ്രിന്‍സിപ്പള്‍ സെക്രട്ടറി സ്ഥാനം. അതത് കേഡറില്‍ ഒഴിവ് വരുന്ന മുറക്ക് മാത്രമാണ് ഐ.എ.എസുകാര്‍ക്ക് പ്രിന്‍സിപ്പള്‍ സെക്രട്ടറി പദവി ലഭിക്കുന്നത്. കാര്‍, പേഴ്‌സണല്‍ സ്റ്റാഫ് ( സി.എ, ഡ്രൈവര്‍, പ്യൂണ്‍) എന്നിവരും ഇവര്‍ക്കുണ്ടാകും. ഫോണ്‍ ചാര്‍ജ്, മെഡിക്കല്‍ ഫെസിലിറ്റി തുടങ്ങി എല്ലാ സൗകര്യങ്ങളും ഇവര്‍ക്ക് ലഭിക്കും. ഈ പദവിയിലേക്കാണ് ടി.എന്‍. സീമ ഉയര്‍ത്തപ്പെട്ടത്. അതിന്റെ ഭാഗമായാണ് പേഴ്‌സണല്‍ സ്റ്റാഫിനെ  നിയമിക്കാന്‍ അനുമതി നല്‍കിയത്.