ഉത്തർ ഖണ്ഡിലൂടെ - കൈലാസ് മാനസ സരോവർ യാത്ര, ദേവഭൂമിയിലൂടെ, ആദികൈലാസ യാത്ര എന്നീ കൃതികളിലൂടെ മലയാളി വായനക്കാരുടെ മനം കവർന്ന പ്രശസ്ത ഹിമാലയ യാത്രികനും എഴുത്തുകാരനുമായ

എം കെ രാമചന്ദ്രന്റെ ഏറ്റവും പുതിയ കൃതിയും ഏഴാമത്തെ  കൃതിയുമായ " ഹിമാലയ സമതലങ്ങളിലൂടെ " പ്രകാശനം ചെയ്യപ്പെടുന്നു.മലയാളിവാർത്ത ഓൺലൈൻ സംഘടിപ്പിക്കുന്ന പുസ്തക പ്രകാശനം ഇന്ന് വൈകുന്നേരം 4 മണിക്ക്  തിരുവനന്തപുരം പ്രസ് ക്ലബ്ബിൽ വെച്ച് മുൻ ചീഫ് സെക്രട്ടറി ശ്രീ കെ ജയകുമാർ ഐഎഎസ്  നിർവഹിക്കും.

മുൻ കോട്ടയം പത്തനംതിട്ട കളക്ടറും  ശബരിമല ദേവസം  കമ്മീഷണറും ആയിരുന്നു പി വേണുഗോപാൽ, ഉത്രാടംതിരുനാൾ ട്രസ്റ്റ് ജനറൽ സെക്രട്ടറി  ജി രാജ്മോഹൻ, ഉത്രാടംതിരുനാൾ ട്രസ്റ്റ് സെക്രട്ടറി പി രാജേഷ് കുമാർ, കറന്റ് ബുക്സ് തൃശ്ശൂർ പബ്ലിക്കേഷൻ മാനേജർ കെ ജോണി

എന്നിവർ  പുസ്തക പ്രകാശനത്തിൽ പങ്കെടുത്ത് ആശംസകൾ അർപ്പിക്കുന്നു.ഹിമാലയത്തിലെ പ്രധാനപ്പെട്ട എല്ലാ സ്ഥലങ്ങളും, ഭാരതത്തിലെ പ്രധാനപ്പെട്ട എല്ലാ ക്ഷേത്രങ്ങളും സന്ദർശിച്ചിട്ടുണ്ട്. 2001-ൽ കൈലാസ്-മാനസരോവർ യാത്ര നടത്തി. അന്നത്തെ യാത്രാസംഘത്തിലെ ഏക മലയാളിയായിരുന്നു ഇദ്ദേഹം.

ഈ യാത്രയാണ് ഇദ്ദേഹത്തിന്റെ ആദ്യകൃതിയായ ഉത്തരഖണ്ഡിലൂടെ-കൈലാസ്‌ മാനസസരസ്സ് യാത്രയുടെ ഉള്ളടക്കം. 2003-ലായിരുന്നു ഇതിന്റെ പ്രകാശനം. രണ്ടാമത്തെ പുസ്തകമായ തപോഭൂമി ഉത്തർഖണ്ഡ് 2005-ൽ പുറത്തിറങ്ങി. ഉത്തരാഖണ്ഡ് സംസ്ഥാനത്തെ പ്രസിദ്ധമായ തീർത്ഥാടനകേന്ദ്രങ്ങളിലൂടെയുള്ള യാത്രയായിരുന്നു ഇതിന്റെ ഉള്ളടക്കം. 2008-ലാണ് മൂന്നാമത്തെ പുസ്തകമായ ആദികൈലാസയാത്ര പുറത്തിറങ്ങിയത്.

ഉത്തരാഖണ്ഡ് സംസ്ഥാനത്തുതന്നെയുള്ള ആദികൈലാസപർവ്വതത്തിലേയ്ക്കുള്ള യാത്രയായിരുന്നു ഇതിന്റെ ഉള്ളടക്കം. 2012-ൽ നാലാമത്തെ പുസ്തകമായ ദേവഭൂമിയിലൂടെ പുറത്തിറങ്ങി. ഇതിൽ പ്രതിപാദിയ്ക്കുന്നത് സിക്കിമിലെയും ഹിമാചൽ പ്രദേശിലെയും തീർത്ഥാടനഭൂമികളിലൂടെയുള്ള യാത്രയാണ്. ഇതോടെ അഞ്ച് കൈലാസപർവ്വതങ്ങളും (മഹാകൈലാസം - ടിബറ്റ്, ആദികൈലാസം, കിന്നരകൈലാസം, ശ്രീകണ്ഠമഹാദേവകൈലാസം, മണിമഹേശകൈലാസം) സന്ദർശിച്ച ഏക വ്യക്തിയായി ഇദ്ദേഹം മാറി.

2014-ൽ ഇദ്ദേഹം നിലാവും നിഴലുകളും എന്ന ഒരു ചെറുകഥാസമാഹാരം എഴുതി. 2016-ൽ മറ്റൊരു യാത്രാവിവരണമായ ഡാകിനിമാരുടെ ഹൃദയഭൂമിയിലൂടെ പ്രകാശനം ചെയ്തു. തൃശ്ശൂരിൽ സ്ഥിരതാമസമാക്കിയ ഇദ്ദേഹത്തിന്റെ എല്ലാ കൃതികളും പ്രസിദ്ധീകരിച്ചത് തൃശ്ശൂർ കറന്റ് ബുക്സാണ്. ഗീതയാണ് ഭാര്യ. മൂന്ന് മക്കളുണ്ട്.