ശമ്പളം നല്‍കിയില്ല.....കെ.എസ്.ആര്‍.ടി.സി. ആസ്ഥാനത്ത് സി.ഐ.ടി.യു., ഐ.എന്‍.ടി.യു.സി. സംഘടനകള്‍ ഇന്നു മുതല്‍ സമരത്തില്‍.... ശമ്പളം കിട്ടുന്നതുവരെ സമരം തുടരും.

ബസ് സര്‍വീസുകളെ ബാധിക്കാത്തവിധമാണ് സമരം. ബി.എം.എസ്. സെക്രട്ടേറിയറ്റിനുമുന്നിലും കെ.എസ്.ആര്‍.ടി.സി.യുടെ ജില്ലാ ആസ്ഥാനങ്ങളിലും ചൊവ്വാഴ്ച അനിശ്ചിതകാല ധര്‍ണ തുടങ്ങും.

ഐ.എന്‍.ടി.യു.സി. ഡ്രൈവേഴ്സ് യൂണിയന്‍ കൂട്ടായ്മയായ ടി.ഡി.എഫിന്റെ സമരം പ്രതിപക്ഷനേതാവ് വി.ഡി. സതീശന്‍ ഉദ്ഘാടനം ചെയ്യും. ജനറല്‍ സെക്രട്ടറി വി.എസ്. ശിവകുമാര്‍ അധ്യക്ഷനാകും. കെ.എസ്.ആര്‍.ടി. എംപ്ലോയീസ് അസോസിയേഷന്റെ സമരം സി.ഐ.ടി.യു. സംസ്ഥാന പ്രസിഡന്റ് ആനത്തലവട്ടം ആനന്ദന്‍ ഉദ്ഘാടനംചെയ്യും.

മാസവരുമാനം 193 കോടി രൂപ നേടിയിട്ടും ശമ്പളം നല്‍കാത്തതാണ് സംഘടനകളുടെ പ്രതിഷേധത്തിനു കാരണം. ഡ്യൂട്ടി പരിഷ്‌കരണത്തെക്കുറിച്ച് ചര്‍ച്ചചെയ്യാന്‍ കെ.എസ്.ആര്‍.ടി.സി. എം.ഡി. വെള്ളിയാഴ്ച വിളിച്ച യോഗത്തിലാണ് ശമ്പളവിതരണത്തിലെ അനിശ്ചിതത്വം മാനേജ്മെന്റ് വ്യക്തമാക്കിയത്.

ശമ്പളം കിട്ടിയിട്ട് ചര്‍ച്ചചെയ്യാമെന്നുപറഞ്ഞ് സംഘടനകള്‍ യോഗം ബഹിഷ്‌കരിച്ചു. ഡീസല്‍ ചെലവും കണ്‍സോര്‍ഷ്യം വായ്പ തിരിച്ചടവും കഴിഞ്ഞപ്പോള്‍ ഖജനാവ് കാലിയായെന്നാണ് കോര്‍പ്പറേഷന്‍ വിശദീകരിക്കുന്നത്. ശമ്പളം ഉള്‍പ്പെടെ 250 കോടി രൂപ ഈ മാസം ചെലവുണ്ട്. സര്‍ക്കാരിനോട് 65 കോടി ആവശ്യപ്പെട്ടെങ്കിലും കിട്ടിയിട്ടില്ല.

കഴിഞ്ഞമാസം ശമ്പളം നല്‍കാനെടുത്ത 46 കോടിയുടെ ഓവര്‍ഡ്രാഫ്റ്റ് തിരിച്ചടയ്ക്കാത്തതിനാല്‍ ഇത്തവണ ഓവര്‍ഡ്രാഫ്റ്റിനു സാധ്യതയില്ല. ശമ്പളം നല്‍കാന്‍ മാത്രം 72 കോടി ആവശ്യമാണ്. കഴിഞ്ഞമാസം 50 കോടി സര്‍ക്കാര്‍ നല്‍കിയിരുന്നു. ഇത്തവണയും സര്‍ക്കാര്‍ സഹായം വേണ്ടിവരും.

പെന്‍ഷനുള്ള 65 കോടിക്കു പുറമെ വായ്പ തിരിച്ചടവിനുള്ള 30 കോടികൂടി മാസം നല്‍കാമെന്ന് സര്‍ക്കാര്‍ അറിയിച്ചിട്ടുണ്ട്. എന്നിട്ടും സാമ്പത്തിക പ്രതിസന്ധി മറികടക്കാനാകുന്നില്ല.ശമ്പളം നല്‍കാന്‍ വഴിയില്ലാത്തപ്പോഴും ശമ്പളപരിഷ്‌കരണത്തിനു തുനിഞ്ഞതാണ് പ്രതിസന്ധി രൂക്ഷമാക്കാന്‍ കാരണം.