അയര്‍ലന്‍ഡില്‍ മലയാളി നഴ്‌സിന് നേരെ ആക്രമണം നടന്നതായി റിപ്പോര്‍ട്ട്. വയറില്‍ കുത്തേറ്റ യുവാവ് ആശുപത്രിയില്‍ ചികിത്സയിലാണെന്നാണ് ഒരു മാദ്ധ്യമം റിപ്പോര്‍ട്ട് ചെയ്തിരിക്കുന്നത്.

ഇന്നലെ രാത്രി പത്ത് മണിയോടെ പാല്‍ വാങ്ങാനായി യുവാവ് പുറത്തിറങ്ങിയപ്പോഴായിരുന്നു സംഭവം. ഒരുകൂട്ടം കൗമാരക്കാര്‍ 'ഗോബാക്ക് ഇന്ത്യ' എന്നുപറഞ്ഞ് ആക്രമിക്കുകയായിരുന്നു എന്നാണ് വിവരം. കുത്തേറ്റ യുവാവ് റോഡിലിറങ്ങി വാഹനം കൈകാണിച്ച് നിര്‍ത്തി ആശുപത്രിയില്‍ എത്തിക്കാന്‍ ആവശ്യപ്പെടുകയായിരുന്നു. നിലവില്‍ യുവാവ് അപകടനില തരണം ചെയ്തിട്ടുണ്ട്.

കഴിഞ്ഞ കുറച്ചുകാലമായി അയര്‍ലന്‍ഡില്‍ വിദേശികള്‍ക്കെതിരായ വികാരം ശക്തമായിട്ടുണ്ട്. തണുപ്പുകാലം കഴിഞ്ഞതോടെ കൗമാരക്കാരും യുവാക്കളും വളരെ വൈകിയാണ് വീടുകളില്‍ കയറുന്നത്. മദ്യവും മയക്കുമരുന്നും ഉപയോഗിച്ചാണ് പലരും റോഡുകളിലേക്കിറങ്ങുന്നത്. ഇത്തരക്കാര്‍ക്കിടയില്‍ എത്തിപ്പെടുന്നവരാണ് ആക്രമണത്തിനിരയാവുന്നത്.