കോണ്ഗ്രസിനുള്ളില് മുഖ്യമന്ത്രി സ്ഥാനത്തെ ചൊല്ലി പുകയുന്ന തര്ക്കങ്ങളില് പരിഹാസവുമായി മന്ത്രി വി. ശിവന്കുട്ടി
നിയമസഭാ തെരഞ്ഞെടുപ്പിന്റെ ഫലം പുറത്തുവരാനിരിക്കെ, കോണ്ഗ്രസിനുള്ളില് മുഖ്യമന്ത്രി സ്ഥാനത്തെ ചൊല്ലി പുകയുന്ന തര്ക്കങ്ങളില് പരിഹാസവുമായി മന്ത്രി വി. ശിവന്കുട്ടി. യുഡിഎഫിന്റെ പാരമ്പര്യം ഇതാണെന്നും അധികാരം കിട്ടുന്നതിന് മുമ്പേ പകുത്തെടുക്കുന്ന രീതി കാലമെത്ര കഴിഞ്ഞാലും മാറില്ലെന്നും അദ്ദേഹം വാര്ത്താ സമ്മേളനത്തില് പരിഹസിച്ചു.
'140 സീറ്റും കിട്ടുമെന്ന് പറഞ്ഞാലും യുഡിഎഫിന് എന്തിനാണ് ഇത്ര തര്ക്കം?' എന്നായിരുന്നു ശിവന്കുട്ടിയുടെ ചോദ്യം. കഴിഞ്ഞ തവണ വോട്ടെണ്ണും മുമ്പേ മന്ത്രിസ്ഥാനങ്ങള് വരെ വീതം വെച്ചവരാണ് അവര്. ഇപ്പോള് മൂന്ന് മുഖ്യമന്ത്രിമാരുണ്ടെന്നാണ് കേള്ക്കുന്നത്, വരും ദിവസങ്ങളില് അത് ഇനിയും വര്ധിക്കാമെന്നും അദ്ദേഹം കൂട്ടിച്ചേര്ത്തു. ഇടതുപക്ഷത്ത് ഇതുവരെ മന്ത്രിമാരുടെ കാര്യത്തില് ചര്ച്ചകള് പോലും നടന്നിട്ടില്ലെന്നും സിപിഎമ്മില് കൃത്യമായ സംഘടനാ രീതികളുണ്ടെന്നും അദ്ദേഹം ഓര്മ്മിപ്പിച്ചു.
അതേസമയം, കോണ്ഗ്രസിനുള്ളില് മുഖ്യമന്ത്രി പദവി ലക്ഷ്യമിട്ടുള്ള പോര് തെരുവിലേക്കും സോഷ്യല് മീഡിയയിലേക്കും പടരുകയാണ്. എഐസിസി ജനറല് സെക്രട്ടറി കെ.സി. വേണുഗോപാലിനെതിരെ പ്രതിപക്ഷ നേതാവ് വി.ഡി. സതീശന്റെ അനുയായികള് സൈബര് ആക്രമണം കടുപ്പിച്ചു. വേണുഗോപാലിന്റെ ഫേസ്ബുക്ക് പോസ്റ്റുകള്ക്ക് താഴെ രൂക്ഷമായ ഭാഷയിലാണ് സതീശന് അനുകൂലികള് പ്രതികരിക്കുന്നത്.
https://www.facebook.com/Malayalivartha
