ബൈക്ക് റേസിങ് സംഘങ്ങളുടെ അഭ്യാസക്കളരിയില്‍ പൊലിഞ്ഞത് രണ്ട് ജീവനുകളാണ്. തിരുവനന്തപുരത്തെ കോവളം ബൈപാസിലെ പോറോഡ് മുതല്‍ മുക്കോല വരെയുള്ള ഭാഗത്താണ് അപകടമുണ്ടായത്.

അപകടത്തില്‍ ബൈക്കുകള്‍ പൂര്‍ണ്ണമായും തകര്‍ന്നു. വട്ടിയൂര്‍ക്കാവ് നെട്ടയം ഫാത്തിമ മന്‍സിലില്‍ സൂര്യ നഗറില്‍ ഹബീബിന്റെയും ഷറഫുന്നിസയുടെയും മകന്‍ എച്ച്. മുഹമ്മദ് ഫിറോസ്, ചൊവ്വര വണ്ടാഴ നിന്ന വീട്ടില്‍ ഷാജിയുടെയും രമണിയുടെയും മകന്‍ എസ്. ശരത് എന്നീ യുവാക്കളാണ് മരിച്ചത്.ഇന്നലെ വൈകിട്ട് അഞ്ചരയോടെയാണ് അപകടം നടന്നത്.

അമിതവേഗത്തിലെത്തിയ ബൈക്കുകള്‍ പരസ്പരം കൂട്ടിയിടിച്ച് ബൈക്കുകള്‍ ഓടിച്ചിരുന്നവര്‍ തെറിച്ച് വീഴുകയായിരുന്നെന്നാണ് വിവരം. റോഡിന് മുകള്‍ ഭാഗത്ത് നിന്ന് സംഭവം കണ്ടവരാണ് വിഴിഞ്ഞം പോലീസിനെ വിവരം അറിയിച്ചത്. സ്ഥലത്തെത്തിയ വിഴിഞ്ഞം എസ്.എച്ച്.ഒ. പ്രജീഷ് ശശി, എസ്.ഐ. കെ.എല്‍.സമ്പത്ത് ഉള്‍പ്പെട്ട പോലീസ് സംഘം ഗുരുതര പരിക്കേറ്റ് കിടന്നിരുന്ന യുവാക്കളെ 108 ആംബുലന്‍സില്‍ പെട്ടെന്ന് തന്നെ വിഴിഞ്ഞം സാമൂഹികാരോഗ്യ കേന്ദ്രത്തിലെത്തിച്ചുവെങ്കിലും മരണം സംഭവിക്കുകയായിരുന്നു. തുടര്‍ന്ന് മൃതദേഹങ്ങള്‍ മെഡിക്കല്‍ കോളേജ് ആശുപത്രിയിലെ മോര്‍ച്ചറിയിലേക്ക് മാറ്റി.

എന്നാല്‍ ഈ ഭാഗത്ത് ബൈക്ക് അഭ്യാസവും അപകടങ്ങളും പതിവ് കാഴ്ചയാണെന്നാണ് പോലീസും നാട്ടുകാരും പറയുന്നത്. അതിന്റെ ഏറ്റവും ഒടുവിലത്തെ ഇരകളാണ് ഇന്നലെ മരണപ്പെട്ട യുവാക്കള്‍. കോവളം ജംക്ഷനും പോറോഡ് ഭാഗത്തിനും മധ്യേയുള്ള പാത നിലവില്‍ അടച്ചിട്ടിരിക്കുകയാണ്. ഇവിടെയാണ് ബൈക്ക് റേസിങ് സംഘങ്ങളുടെ വിളയാട്ടം. രാത്രിയും പകലും വ്യത്യാസമില്ലാതെയാണ് മത്സരയോട്ടങ്ങള്‍ നടക്കുന്നത്. പലപ്പോഴായി പൊലീസ് ഇത്തരം സംഘങ്ങളെ പിടികൂടിയിട്ടുണ്ട്. ഇന്നലെ ഉച്ചയ്ക്കും ഇത്തരത്തിലുള്ള ബൈക്ക് റേസിങ് സംഘത്തെ പോലീസ് പിടികൂടിയിരുന്നു. 3 അംഗസംഘമാണ് അഭ്യാസം നടത്തിയത്. ശേഷം മുന്നറിയിപ്പടക്കം നല്‍കിയാണ് അവരെ വിട്ടയച്ചത്. അതിന് പിന്നാലെ വന്നവരാണ് അപകടത്തില്‍ പെട്ട് മരിച്ചത് എന്നാണ് വിഴിഞ്ഞം എസ്എച്ച്ഒ പ്രജീഷ് ശശി പറയുന്നത്.

അതേസമയം ഈ സംഘത്തില്‍ നിരവധി ആളുകള്‍ ഉണ്ടായിരുന്നെന്നും പോലീസ് എത്തുന്നതിന് മുമ്പ് ബാക്കിയുള്ളവര്‍ സ്ഥലം വിട്ടെന്നും നാട്ടുകാര്‍ ചൂണ്ടികാണിച്ചു.