ഇടുക്കിയിലെ വണ്ടിപ്പെരിയാര്‍ ഇഞ്ചിക്കാടിന് സമീപം റോഡില്‍ യുവാവിനെ മരിച്ച നിലയില്‍ കണ്ടെത്തിയ സംഭവം അപകടമരണമെന്ന് പ്രാഥമിക നിഗമനം....

മദ്യലഹരിയിലായിരുന്ന രമേശ് വാഹനത്തില്‍ നിന്നും തെറിച്ചു വീണതോ ചാടിയതോ ആകാമെന്ന് പോലീസ്, തലക്ക് പരുക്കേറ്റ് ഏറെ നേരം റോഡില്‍ കിടന്നതിനാല്‍ രക്തം വാര്‍ന്നാണ് മരണമെന്നാണ് പ്രാഥമിക നിഗമനം, അന്വേഷണം ഊര്‍ജ്ജിതമാക്കി

വാളാഡി സ്വദേശി രമേശാണ് മരിച്ചത്. പുലര്‍ച്ചെ നാല് മണിയോടെയാണ് വണ്ടിപ്പെരിയാര്‍ - വള്ളക്കടവ് റൂട്ടില്‍ ഇഞ്ചിക്കാടിന് സമീപത്തായി രമേശിനെ റോഡില്‍ മരിച്ച നിലയില്‍ കണ്ടെത്തിയത്. പുലര്‍ച്ചെ ഇതുവഴി എത്തിയ പാല്‍ വാഹനത്തിലെ ഡ്രൈവറാണ് മൃതദേഹം ആദ്യം കാണുന്നത്. ഇയാള്‍ വണ്ടിപ്പെരിയാര്‍ പൊലീസില്‍ വിവരമറിയിച്ചു.

പോലീസ് അറിയിച്ചതമുസരിച്ച് ബന്ധുക്കളെത്തി മരിച്ചത് രമേശാണെന്ന് തിരിച്ചറിഞ്ഞു. തുടര്‍ന്ന് ഇയാള്‍ക്കൊപ്പമുണ്ടായിരുന്ന ഓട്ടോ ഡ്രൈവര്‍ തങ്കമല സ്വദേശി ആറുമുഖത്തിനെ പോലീസ് കസ്റ്റഡിയില്‍ എടുത്തു. രമേശിന്റെ മൃതദേഹം കണ്ടെത്തിയ സ്ഥലത്തിന് നൂറു മീറ്റര്‍ അകലെ ഓട്ടോറിക്ഷയില്‍ കിടന്നുറങ്ങുകയായിരുന്നു ആറുമുഖം.

ഞായറാഴ്ച രാത്രി മദ്യപിച്ചെത്തിയ രമേശ് സ്വന്തം വീട്ടിലും ഭാര്യവീട്ടിലും വഴക്കുണ്ടാക്കിയതായി പോലീസ് അന്വേഷണത്തില്‍ കണ്ടെത്തി. ഇതിനു ശേഷം ആറുമുഖത്തിന്റെ ഓട്ടോയിലാണ് വീട്ടില്‍ നിന്നും പോയത്. രണ്ടുപേരും വീണ്ടും മദ്യപിച്ചതായി ആറുമുഖം പോലീസിനോട് പറഞ്ഞു. ഫോറന്‍സിക് സംഘം സ്ഥലത്തെത്തി പരിശോധനകള്‍ നടത്തി. ഇന്‍ക്വസ്റ്റില്‍ മൃതദേഹത്തില്‍ വാഹനത്തില്‍ നിന്നും തെറിച്ചു വീണതിന്റെ പരുക്കകളാണുള്ളതെന്നാണ് കണ്ടെത്തിയിരിക്കുന്നത്.

അതിനാല്‍ ഓട്ടോറിക്ഷയില്‍ നിന്നും ചാടിയതോ തെറിച്ച് വീണതോ ആവാമെന്നാണ് പോലീസിന്റെ സംശയം. നടന്നു പോകുമ്പോള്‍ ഏതെങ്കിലും വാഹനം ഇടിച്ചു വീഴ്ത്തിയതാണോയെന്നും പോലീസ് പരിശോധിക്കുന്നുണ്ട്. തലക്ക് പരുക്കേറ്റ് ഏറെ നേരം റോഡില്‍ കിടന്നതിനാല്‍ രക്തം വാര്‍ന്നാണ് മരണമെന്നാണ് പ്രാഥമിക നിഗമനം.

മൃതദേഹം പോസ്റ്റ്‌മോര്‍ട്ടത്തിനായി കോട്ടയം മെഡിക്കല്‍ കോളജിലേക്ക് മാറ്റി. രമേശിന്റെ സുഹൃത്തുളെയും ബന്ധുക്കളെയും ചോദ്യം ചെയ്തു വരുന്നു. വണ്ടിപ്പെരിയാര്‍ പോലീസ് കേസെടുത്ത് അന്വേഷണം ആരംഭിച്ചു.