ഫേസ്ബുക്ക് പോസ്റ്റ് ഇട്ടതിന്റെ പേരില്‍ അന്വേഷണം നേരിടേണ്ടി വന്ന അദ്ധ്യാപിക ദീപാ നിശാന്തിനെതിരെ നടപടിയെടുക്കേണ്ടെന്ന് കൊച്ചിന്‍ ദേവസ്വം ബോര്‍ഡ് തീരുമാനിച്ചു. ദീപ ടീച്ചറെ പിന്തുണയ്ച്ച് നവമാധ്യമങ്ങള്‍ രംഗത്തു വന്നിരുന്നു. പിന്നാലെ ദീപാ നിശാന്തിന് പിന്തുണയുമായി മന്ത്രിമാരും രാഷ്ട്രീയക്കാരും എത്തിയതോടെ കൊച്ചിന്‍ ദേവസ്വം ബോര്‍ഡ് നടപടി വേണ്ടെന്ന തീരുമാനത്തിലേക്ക് എത്തുകയായിരുന്നു.
കേരള വര്‍മ്മാ കോളേജില്‍ കുട്ടികള്‍ മാംസാഹാരം കൊണ്ടുവരാന്‍ പാടില്ലെന്നു നിര്‍ദേശിച്ചിട്ടില്ലെന്നും എന്നാല്‍ കാന്റീനില്‍ മാംസാഹാരം വിളമ്പേണ്ടെന്ന തീരുമാനം തുടരുമെന്നും ദേവസ്വം ബോര്‍ഡ് യോഗത്തിന് ശേഷം അറിയിച്ചു. കോളജില്‍ ക്ഷേത്രമില്ലെന്നും ആല്‍ത്തറയില്‍ വിളക്കുകത്തിക്കുന്ന പതിവു മാത്രമാണുള്ളതെന്നുമാണ് ദേവസ്വം ബോര്‍ഡിന്റെ വാദം. എസ്എഫ്‌ഐയുമായി ചേര്‍ന്ന് വിദ്യാര്‍ത്ഥികള്‍ കാമ്പസില്‍ അക്രമം നടത്തിയെന്ന എബിവിപിയുടെ പരാതിയില്‍ കഴമ്പില്ലെന്നും ദേവസ്വം ബോര്‍ഡ് കണ്ടെത്തി.
ബീഫ് ഫെസ്റ്റും അതിക്രമവും നടക്കുമ്പോള്‍ ദീപ നിശാന്ത് പരീക്ഷാ ഡ്യൂട്ടിയിലായിരുന്നുവെന്നും അക്രമത്തില്‍ അവര്‍ക്കു പങ്കില്ലെന്നുമാണ് ദേവസ്വം ബോര്‍ഡിന്റെ കണ്ടെത്തല്‍. ദീപ നിശാന്തിന്റെ ഫേസ്ബുക്ക് പോസ്റ്റ് തങ്ങള്‍ ചര്‍ച്ച ചെയ്യേണ്ട കാര്യമില്ലെന്നും ദേവസ്വം ബോര്‍ഡ് വിലയിരുത്തി.
കാമ്പസില്‍ നടത്തിയ ബീഫ് ഫെസ്റ്റിനു പിന്നാലെ എസ്എഫ്‌ഐ പ്രവര്‍ത്തകര്‍ക്കു നേരെ ആക്രമമുണ്ടാവുകയും യൂണിയന്‍ ഓഫീസ് കത്തിക്കുകയും ചെയ്തിരുന്നു. കാമ്പസില്‍ അക്രമം നടത്തിയതിനെതിരായ ഒരു ഫേസ് ബുക്ക് പോസ്റ്റ് ഷെയര്‍ ചെയ്തതിന്റെ പേരില്‍ വന്‍ വിവാദമുണ്ടായിരുന്നു. അസിസ്റ്റന്റ് പ്രൊഫസറായ ദീപയെ പുറത്താക്കണമെന്നാവശ്യപ്പെട്ട് ഒരു വിഭാഗം രംഗത്തെത്തുകയായിരുന്നു. ഇതിനെതിരേ സോഷ്യല്‍ മീഡിയ ശക്തമായ നിലപാടെടുക്കുകയും ചെയ്തു. ദീപാ നിശാന്തിനെ പിന്തുണച്ച് സോഷ്യല്‍ മീഡിയയില്‍ ആയിരക്കണക്കിന് പേരാണ് രംഗത്തെത്തിയത്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha