ഇറച്ചിവെട്ട് യന്ത്രത്തില് സ്വര്ണം കടത്തി; കേസില് സിനിമാ നിര്മാതാവ് കെ പി സിറാജുദ്ദീന് കസ്റ്റംസിന്റെ പിടിയിൽ, രണ്ടരക്കിലോ സ്വര്ണം കസ്റ്റംസ് പിടികൂടിയത് ഏപ്രില് രണ്ടിന്
തൃക്കാക്കര സ്വര്ണക്കടത്ത് കേസില് സിനിമാ നിര്മാതാവ് കെ പി സിറാജുദ്ദീന് കസ്റ്റംസിന്റെ പിടിയിലായതായി റിപ്പോർട്ട്. ഇറച്ചിവെട്ട് യന്ത്രത്തില് സ്വര്ണം കടത്തിയ കേസിലാണ് സിറാജുദ്ദീന് പിടിയിലായിരിക്കുന്നത്. ചാര്മിനാര്, വാങ്ക് തുടങ്ങിയ സിനിമകളുടെ നിര്മാതാവാണ് സിറാജുദ്ദീന്. കേസിനെ തുടർന്ന് ഹാജരാകണമെന്ന് ആവശ്യപ്പെട്ട് പലതവണ സിറാജുദ്ദീന്റെ വീട്ടില് നോട്ടീസ് നല്കിയിരുന്നു.
എന്നാല്, അദ്ദേഹം ഹാജരായിരുന്നില്ല. ചൊവ്വാഴ്ച സിറാജുദ്ദീന് ചെന്നൈയില് വിമാനം ഇറങ്ങിയ ശേഷം നാട്ടിലേക്ക് വരുകയുണ്ടായി. അവിടെനിന്നാണ് കസ്റ്റംസ് ഇയ്യാളെ കസ്റ്റഡിയില് എടുത്തത്. തൃക്കാക്കര സ്വര്ണക്കടത്ത് കേസിലെ പ്രധാന പ്രതിയാണ് സിറാജുദ്ദീന്. ഏപ്രില് രണ്ടിനാണ് നെടുമ്പാശ്ശേരി വിമാനത്താവളത്തില് കാര്ഗോയായി വന്ന ഇറച്ചിവെട്ട് യന്ത്രത്തിൽ നിന്ന് രണ്ടരക്കിലോ സ്വര്ണം കസ്റ്റംസ് പിടികൂടിയിരുന്നത്.
അതോടൊപ്പം തന്നെ കേസ് അന്വേഷണത്തിന്റെ ഭാഗമായി തൃക്കാക്കര നഗരസഭാ വൈസ് ചെയര്മാന് ഇബ്രാഹിംകുട്ടിയുടെ മകന് ഷാബിന് അടക്കം മൂന്നുപേരെ കസ്റ്റംസ് അറസ്റ്റ് ചെയ്തിരുന്നു. ഇറച്ചിവെട്ട് യന്ത്രത്തിനുള്ളില് ഒളിപ്പിച്ച നിലയിലാണ് സ്വര്ണം കടത്തിയിരുന്നത്. ഇത്തരത്തില് മുന്പും സ്വര്ണം കടത്തിയിരുന്നെന്ന് കസ്റ്റംസ് കണ്ടെത്തുകയും ചെയ്തിരുന്നു. ഷാബിനെയും മറ്റു പ്രതികളെയും ചോദ്യം ചെയ്തപ്പോഴാണ് സിനിമാ നിര്മാതാവ് കെ പി സിറാജുദ്ദീനാണ് ഗള്ഫില്നിന്ന് സ്വര്ണം അയച്ചതെന്ന് വ്യക്തമായത്.
https://www.facebook.com/Malayalivartha
