വെള്ളാപ്പള്ളി നടേശനും ബി.ജെ.പിയും ചേര്‍ന്നു പാര്‍ട്ടി രൂപീകരിക്കാന്‍ നടത്തുന്ന ശ്രമങ്ങളുടെ ഗോഡ് ഫാദര്‍ മുഖ്യമന്ത്രി ഉമ്മന്‍ചാണ്ടിയാണെന്നു പ്രതിപക്ഷനേതാവ് വി.എസ്. അച്യുതാനന്ദന്‍. കഴിഞ്ഞ ദിവസം ഉമ്മന്‍ചാണ്ടി നടത്തിയ പ്രസ്താവന ഇതിന്റെ തെളിവാണെന്നും വിഎസ് പറഞ്ഞു.
എസ്.എന്‍.ഡി.പി. എന്ന മഹത്തായ പ്രസ്ഥാനത്തെ ആര്‍.എസ്.എസിന് അടിയറ വയ്ക്കാന്‍ ഒരിക്കലും ശ്രീനാരായണീയര്‍ സമ്മതിക്കില്ല. ബി.ജെ.പി. സഖ്യവും അതിന്റെ നേതൃത്വത്തിലുള്ള മൂന്നാം മുന്നണിയുമൊക്കെ പ്രഖ്യാപിച്ച വെള്ളാപ്പള്ളി, എസ്.എന്‍.ഡി.പി. നേതൃയോഗം കഴിഞ്ഞപ്പോള്‍ മതേതര മുന്നണിയായിരിക്കും ഉണ്ടാക്കുക എന്ന പ്രഖ്യാപിച്ചത് ഇതിനു തെളിവാണന്നായിരുന്നു ഉമ്മന്‍ചാണ്ടിയുടെ പ്രതികരണം.
മതേതര മുന്നണി എന്ന ലേബലൊട്ടിച്ചപ്പോള്‍ ബി.ജെ.പിയും ആര്‍.എസ്.എസുമായുള്ള സഖ്യം മതേതരമാണെന്നാണ് ഉമ്മന്‍ചാണ്ടിയുടെ വ്യാഖ്യാനം. ഈ ലേബലിന്റെ പിന്നിലും ഉമ്മന്‍ചാണ്ടിയുടെ ബുദ്ധിയാണെന്ന് അദ്ദേഹത്തിന്റെ വാക്കുകള്‍ തെളിയിക്കുന്നുവെന്നും വിഎസ് പറഞ്ഞു.
ഈ വിഷയത്തില്‍ കെ.പി.സി.സി. പ്രസിഡന്റ് വി.എം. സുധീരന്റെ സ്വരമല്ല ഉമ്മന്‍ചാണ്ടിയുടേയത്. ഇതുമായി ബന്ധപ്പെട്ട് യു.ഡി.എഫ്. യോഗത്തില്‍ പ്രമേയം അവതരിപ്പിച്ചിട്ടില്ലെന്ന ഉമ്മന്‍ചാണ്ടിയുടെ ന്യായവാദം സാങ്കേതികം മാത്രമാണ്. കോണ്‍ഗ്രസിന്റെ നേതൃയോഗത്തിലാണ് അത്തരമൊരു പ്രമേയം കൊണ്ടുവന്നത്. ഉമ്മന്‍ചാണ്ടിയുടെ എതിര്‍പ്പു കാരണമാണ് അതു നടക്കാതെ വന്നത്.
സി.പി.എം. ഒരു കാലത്തും ആര്‍.എസ്.എസുമായി കൂട്ടുകൂടിയിട്ടില്ല. ആര്‍.എസ്.എസ്. ബന്ധപ്പെറ്റി പറയുമ്പോള്‍ ഉമ്മന്‍ചാണ്ടിക്കും കോണ്‍ഗ്രസിനും നേരെ തന്നെയാണ് അത് തിരിഞ്ഞുകൊള്ളുന്നത്. ചരിത്രത്തില്‍ സ്ഥാനം പിടിച്ച വടകരബേപ്പൂര്‍ മോഡല്‍ കോലി.ബി. സഖ്യം ഉമ്മന്‍ചാണ്ടി മറന്നുപോയോ? സംഘപരിവാര്‍ നേതാവ് പ്രവീണ്‍ തൊഗാഡിയയുടെ കേസ് പിന്‍വലിച്ചതും തിരുവനന്തപുരം എം.ജി. കോളജില്‍ പോലീസുകാരനെ വധിക്കാന്‍ ശ്രമിച്ച കേസിലെ പ്രതികളായ എ.ബി.വി.പിക്കാരുടെ കേസ് പിന്‍വലിച്ചതും ഉമ്മന്‍ചാണ്ടി എത്ര മറച്ചു പിടിച്ചാലും ജനങ്ങള്‍ ഓര്‍മിക്കുമെന്നും വി.എസ്. പറഞ്ഞു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha