പാലക്കാട് പേ വിഷബാധയേറ്റ് 19 വയസുകാരി മരണമടഞ്ഞ സംഭവത്തില്‍ അന്വേഷണം നടത്തി റിപ്പോര്‍ട്ട് നല്‍കാന്‍ ആരോഗ്യ വകുപ്പ് മന്ത്രി വീണാ ജോര്‍ജ് ആരോഗ്യ വകുപ്പ് ഡയറക്ടര്‍ക്ക് നിര്‍ദേശം നല്‍കി. വാക്‌സിനെടുത്തിട്ടും മരണപ്പെട്ടതിൽ വിശദമായ അന്വേഷണത്തിനാണ് ഉത്തരവിട്ടിരിക്കുന്നത്.

പാലക്കാട് ജില്ലാ സര്‍വയലന്‍സ് ഓഫീസറുടെ നേതൃത്വത്തില്‍ റാപ്പിഡ് റെസ്‌പോണ്‍സ് ടീം രൂപീകരിച്ച് വിശദമായ അന്വേഷണം നടത്തുന്നതാണ്.മെയ് 30നാണ് ശ്രീലക്ഷ്മിയെ അയൽവീട്ടിലെ വളർത്തുനായ കടിക്കുന്നത്.പേ വിഷബാധയ്ക്ക് ആരോഗ്യവകുപ്പ് നിർദ്ദേശിച്ചിരുന്ന നാല് വാക്‌സിനുകളും ശ്രീലക്ഷ്മി സ്വീകരിച്ചുവെന്നാണ് ബന്ധുക്കൾ പറയുന്നത്.

പേ വിഷബാധയുടെ യാതൊരു ലക്ഷണങ്ങളും ശ്രീലക്ഷ്മി ആദ്യദിനങ്ങളിൽ പ്രകടിപ്പിച്ചിരുന്നില്ല.രണ്ട് ദിവസം മുൻപാണ് ചില ലക്ഷണങ്ങൾ ശ്രീലക്ഷ്മി കാണിച്ചത്. പിന്നാലെ വീണ്ടും ആശുപത്രിയിൽ പ്രവേശിപ്പിക്കുകയായിരുന്നു. പരിശോധനയിൽ പേവിഷബാധ സ്ഥിരീകരിച്ചു. തുടർന്ന് റാബീസ് വാക്‌സിൻ നൽകിയെങ്കിലും ജീവൻ രക്ഷിക്കാനായില്ല.

ഇന്ന് പുലർച്ചെ മൂന്ന് മണിയോടെയാണ് ശ്രീലക്ഷ്മി മരണപ്പെടുന്നത്. നായ ആക്രമിക്കാൻ ശ്രമിച്ചപ്പോൾ ഉടമ തടയാൻ ശ്രമിക്കുകയും ഇദ്ദേഹത്തിന് നായയുടെ കടിയേൽക്കുകയും ചെയ്തിരുന്നു. എന്നാൽ ഉടമയ്ക്ക് ഇതുവരെ യാതൊരു ആരോഗ്യ പ്രശ്‌നങ്ങളും ഉണ്ടായിട്ടില്ല.