ശ്രീവരാഹം മുക്കോലയ്ക്കല്‍ എസ്. കെ നിവാസില്‍ വാടകയ്ക്ക് താമസിച്ചിരുന്ന തൂത്തുക്കുടി സ്വദേശിനി കന്നിയമ്മാള്‍ (38) നെ വെട്ടിക്കൊലപ്പെടുത്തിയ കേസിലെ വിചാരണ തിരുവനന്തപുരം ആറാം അഡീഷണല്‍ ജില്ലാസെഷന്‍സ് കോടതിയില്‍ വെള്ളിയാഴ്ച ആരംഭിക്കും.

സംശയ രോഗത്തെ തുടര്‍ന്ന് ഭര്‍ത്താവ് മാരിയപ്പന്‍(45) കന്നിയമ്മയെ വെട്ടിക്കൊന്നെന്നാണ് കേസ്. 2018 സെപ്റ്റംബര്‍ 23 രാത്രിയിലായിരുന്നു കേസിനാസ്പദമായ സംഭവം. കൃത്യ ദിവസം കന്നിയമ്മയും മാരിയപ്പനും തിരുവനന്തപുരം കൃപാ തിയേറ്ററില്‍ സാമി -2 സിനിമ കണ്ടതിനുശേഷം രാത്രി 9.45 മണിയോടുകൂടി ശ്രീ വരാഹത്തെ വാടക വീട്ടിലെത്തിയിരുന്നു.

സിനിമ തിയേറ്ററില്‍ വച്ച് പരിചയക്കാരെ കണ്ടു ചിരിച്ചതില്‍ വെച്ച് വീട്ടില്‍ വച്ച് പരസ്പരം സംസാരവും വാക്കുതര്‍ക്കവുമായി. തുടര്‍ന്ന് കന്നിഅമ്മയെ കഴുത്തില്‍ ബലം പ്രയോഗിച്ചു പിടിച്ച് കിടപ്പുമുറിയില്‍ കൊണ്ടുവന്ന് ചുറ്റികകല്ല് കൊണ്ട് തലയ്ക്കടിച്ച് ബോധം കെടുത്തിയശേഷം വെട്ടു പിച്ചാത്തി കൊണ്ട് വെട്ടിക്കൊല്ലുകയായിരുന്നു.

കൃത്യസമയം നഗരത്തില്‍ കനത്ത മഴ പെയ്തതിനാല്‍ പരിസരവാസികള്‍ ശബ്ദം കേട്ടിരുന്നില്ല. കന്നിയമ്മയുടെ മരണം ഉറപ്പാക്കിയ ശേഷം രാത്രിതന്നെ മാരിയപ്പന്‍ തിരുനെല്‍വേലിയിലേക്ക് കടന്നുകളഞ്ഞു.

നഗരത്തില്‍ പിസ്സ വിതരണക്കാരനായ മകന്‍ മണികണ്ഠന്‍ ജോലികഴിഞ്ഞ് രാത്രി 11.30 ന് എത്തിയപ്പോഴാണ് കന്നിയമ്മ ചോരയില്‍ കുളിച്ചുകിടക്കുന്നത് കണ്ടത്. മകന്റെ നിലവിളി കേട്ടെത്തിയ നാട്ടുകാര്‍ ഫോര്‍ട്ട് പോലീസില്‍ വിവരം അറിയിക്കുകയായിരുന്നു.
കൃത്യത്തിന് മൂന്നാം നാള്‍ തിരുന്നെല്‍വേലിയില്‍ നിന്നും ഫോര്‍ട്ട് പോലീസ് മാരിയപ്പനെ കസ്റ്റഡിയിലെടുത്തു.

43 സാക്ഷികളെ പ്രോസിക്യൂഷന്‍ ഭാഗത്തേക്ക് വിസ്തരിക്കും. 29 രേഖകളും 22 തൊണ്ടി മുതലുകളും പോലീസ് കോടതിയില്‍ ഹാജരാക്കിയിട്ടുണ്ട്.

ഫോര്‍ട്ട് പോലീസ് അന്വേഷിച്ച കേസില്‍ സര്‍ക്കിള്‍ ഇന്‍സ്‌പെക്ടര്‍ അജിചന്ദ്രന്‍ നായരാണ് കുറ്റപത്രം ഹാജരാക്കിയത്.