ഫേസ് ബുക്കിലൂടെ പരിചയപ്പെട്ട പെണ്‍കുട്ടിയെ കാണാനായി സുഹൃത്തുക്കളോടൊപ്പം യുവാവെത്തി... പെണ്‍കുട്ടിയുടെ സഹോദരന്‍ ഉള്‍പ്പെടെ മര്‍ദ്ദിച്ച് ബൈക്കില്‍കയറ്റി കൊണ്ടു പോയ യുവാവിനെ കാണാനില്ല... കടലില്‍ തള്ളിയെന്ന് യുവാവിന്റെ കുടുംബം..... കിരണിന്റെ ചെരുപ്പ് കടല്‍ത്തീരത്ത് നിന്ന് കണ്ടെത്തി, വീട്ടുകാരുടെ ആരോപണത്തെത്തുടര്‍ന്ന് കോസ്റ്റ് ഗാര്‍ഡിന്റെ സഹായത്തോടെ തെരച്ചിലാരംഭിച്ചു

പെണ്‍കുട്ടിയെ കാണാനായി സുഹൃത്തുക്കള്‍ക്കൊപ്പം വിഴിഞ്ഞം ആഴിമലയിലെത്തിയ യുവാവിനെ പെണ്‍കുട്ടിയുടെ സഹോദരന്‍ ഉള്‍പ്പെടെ മര്‍ദ്ദിച്ച് ബൈക്കില്‍ കയറ്റികൊണ്ടുപോയശേഷം ദുരൂഹ സാഹചര്യത്തില്‍ കാണാതായെന്ന് പരാതി. പള്ളിച്ചല്‍ മൊട്ടമൂട് വള്ളോട്ടുകോണം മേക്കുംകര പുത്തന്‍ വീട്ടില്‍ മധു- മിനി ദമ്പതികളുടെ മൂത്ത മകന്‍ കിരണിനെയാണ് (ചിക്കു-25) ശനിയാഴ്ച ഉച്ചയ്ക്ക് 1.30നുശേഷം കാണാതായത്.

കിരണിനെ തട്ടിക്കൊണ്ടുപോയി മര്‍ദ്ദിച്ച് ആഴിമല ഭാഗത്ത് കടലില്‍ തള്ളിയെന്ന വീട്ടുകാരുടെ ആരോപണത്തെത്തുടര്‍ന്ന് കോസ്റ്റ് ഗാര്‍ഡിന്റെ സഹായത്തോടെ തെരച്ചില്‍ തുടങ്ങി. ഒരു യുവാവ് വെള്ളത്തില്‍ മുങ്ങിത്താഴുന്നത് കണ്ടെന്ന് പൊലീസിനും വിവരം ലഭിച്ചിരുന്നു.

കിരണിനൊപ്പമുണ്ടായിരുന്ന ബന്ധുവായ അനന്തുവിനും മര്‍ദ്ദനമേറ്റു. ഇവര്‍ക്കൊപ്പം മെല്‍വിന്‍ എന്ന സുഹൃത്തും ഉണ്ടായിരുന്നെങ്കിലും മര്‍ദ്ദനമേല്‍ക്കാതെ രക്ഷപ്പെട്ടു. ശനിയാഴ്ച ഉച്ചയോടെ ഇവര്‍ക്കൊപ്പം എത്തിയ കിരണ്‍ പെണ്‍കുട്ടിയെ വീടിന്റെ മതിലിന് പുറത്തു നിന്ന് കണ്ടു മടങ്ങുന്നതിനിടെയാണ് കാര്യമറിഞ്ഞ് പെണ്‍കുട്ടിയുടെ സഹോദരന്‍ ഉള്‍പ്പെടെ മൂന്നുപേര്‍ എത്തിയത്.

അംബാസിഡര്‍ കാറിലും ബൈക്കിലുമെത്തിയ സംഘം മര്‍ദ്ദിച്ചശേഷം പൊലീസ് എത്തുമെന്ന് പറഞ്ഞ് കിരണിനെ ബൈക്കിലും തങ്ങളെ കാറിലും കയറ്റിക്കൊണ്ടു പോയെന്ന് അനന്തുവും മെല്‍വിനും പൊലീസിന് മൊഴി നല്‍കി.

കിരണിനെ അന്വേഷിച്ചപ്പോള്‍ മൂത്രശങ്ക തീര്‍ക്കാനായി പോയെന്ന് പറഞ്ഞ സംഘം പിന്നീട് തങ്ങളെ കാറില്‍ നിന്നിറക്കി അസഭ്യം പറഞ്ഞ് ഓടിച്ചുവെന്നും പറഞ്ഞു. പെണ്‍കുട്ടിയുടെ സഹോദരനും സംഘവും ഒളിവില്‍ പോയെന്ന് വിഴിഞ്ഞം എസ്.എച്ച്.ഒ പ്രജീഷ് ശശി പറഞ്ഞു. ഇവരുടെ കാറും ബൈക്കും കസ്റ്റഡിയിലെടുത്തിട്ടുണ്ട്.