യാത്രക്കിടെ ചരക്കുകപ്പൽ തൊഴിലാളിയുടെ കാലില് ഇരുമ്പ് പൈപ്പ് വീണു, ജോര്ദാനില് നിന്ന് സിങ്കപ്പുരിലേക്കുള്ള യാത്രക്കിടെ കാലിന് ഒടിവേറ്റ റഷ്യക്കാരനെ വിഴിഞ്ഞം കടലില് പ്രത്യേക സന്നാഹമൊരുക്കി കരയ്ക്കെത്തിച്ചു
ജോര്ദാനില് നിന്ന് സിങ്കപ്പുരിലേക്കുള്ള യാത്രക്കിടെ ചരക്കുകപ്പൽ തൊഴിലാളിയുടെ കാലില് ഇരുമ്പ് പൈപ്പ് വീണ് ഒടിവേറ്റു.തുർന്ന് റഷ്യക്കാരനെ അടിയന്തര ചികിത്സ നല്കുന്നതിന് വിഴിഞ്ഞം കടലില് പ്രത്യേക സന്നാഹമൊരുക്കി കരയ്ക്കെത്തിച്ച് സ്വകാര്യ ആശുപത്രിയില് പ്രവേശിപ്പിച്ചു. ജോര്ദാനില് നിന്ന് സിങ്കപ്പുരിലേക്ക് വിഴിഞ്ഞം വഴി പോകുകയായിരുന്ന സീയെം സോക്രട്ടീസ് എന്ന ചരക്കുകപ്പലിലെ ശുചീകരണ തൊഴിലാളി ഡിമിത്രി ബൈറ്റെന്സ് കോ(25)യെയാണ് വ്യാഴാഴ്ച രാത്രി കരയിലെത്തിച്ചത്.
കഴിഞ്ഞ ചൊവ്വാഴ്ച കപ്പലില് വെള്ളമുപയോഗിച്ച് ശുചീകരണം നടത്തുന്ന സമയത്ത് മുകളില്നിന്ന് ഇരുമ്പ് പൈപ്പ് വീണായിരുന്നു പരിക്കേറ്റതെന്ന് കൊച്ചി കേന്ദ്രമാക്കി പ്രവര്ത്തിക്കുന്ന കപ്പല് ഏജന്സി മേധാവി ക്യാപ്റ്റന് സന്തോഷ് പറഞ്ഞു. ഇരുമ്പ് പൈപ്പ് വീണ് ഇടതുകാലിനാണ് പരിക്കേറ്റത്. ഇമിഗ്രേഷന് അധികൃതര് ആശുപത്രിയില് തങ്ങുന്നതിന് മൂന്നുദിവസത്തെ അനുമതി നല്കിയിട്ടുണ്ട്.
എന്നാല്, ശസ്ത്രക്രിയ നടക്കാത്തതിനെ തുടര്ന്ന് അനുമതി നീട്ടിക്കിട്ടാന് ആവശ്യപ്പെട്ട് എഫ്.ആര്.ആര്.ഒ.യ്ക്ക് അപേക്ഷ നല്കുമെന്നും കപ്പല് ഏജന്സി അധികൃതര് പറഞ്ഞു.പരിക്കേറ്റ ജീവനക്കാരന് അടിയന്തര ചികിത്സ നല്കുന്നതിന് കപ്പലിലെ ക്യാപ്റ്റന് മാരിടൈംബോര്ഡിന്റെ വിഴിഞ്ഞം അധികൃതരോട് സഹായം ആവശ്യപ്പെടുകയായിരുന്നു.
കപ്പലിന്റെ ഏജന്സിയുടെ പ്രതിനിധികളും തുറമുഖ പര്സര് വിനുലാല്, സൂപ്പര്വൈസര് അജീഷ്മണി, ജീവനക്കാരന് അജിത്, പോര്ട്ട് ഹെല്ത്ത് ഓഫീസര് ശ്രാവണ് എന്നിവരുടെ നേതൃത്വത്തില് ആംബുലന്സ് അടക്കമുള്ള സന്നാഹം സജ്ജമാക്കി. തുടര്ന്ന് മാരിടൈംബോര്ഡിന്റെ ടഗ്ഗ് കപ്പലിനടുത്തെത്തി പ്രത്യേക സംവിധാനത്തിലൂടെ ജീവനക്കാരനെ താഴെയിറക്കി. തുടര്ന്ന് നഗരത്തിലെ സ്വകാര്യ ആശുപത്രിയില് പ്രവേശിപ്പിക്കുകയായിരുന്നു.
https://www.facebook.com/Malayalivartha
