മുല്ലപ്പെരിയാര്‍ അണക്കെട്ടില്‍ ഒരു മണിക്കൂര്‍ ഇടവിട്ട് പരിശോധന നടത്താന്‍ നിര്‍ദ്ദേശം. കനത്ത മഴയുടെ പശ്ചാത്തലത്തിലാണ് തീരുമാനം. അണക്കെട്ടിലെ ജലനിരപ്പ് ഉയര്‍ന്ന് നിലവിൽ ബ്ലൂ അലേര്‍ട്ട് പ്രഖ്യാപിച്ചിട്ടുണ്ട്. മുല്ലപ്പെരിയാര്‍ അണക്കെട്ടിലെ നിലവിലെ ജലനിരപ്പ് 134.80 അടിയാണ്. നിലവിലെ റൂള്‍ കര്‍വ് 137.40 അടിയാണ്.

കനത്ത മഴയുടെ പശ്ചാത്തലത്തില്‍ ഇടുക്കി-മുല്ലപ്പെരിയാര്‍ ഡാമുകളുടെ കാര്യത്തില്‍ ആശങ്കപ്പെടേണ്ട സാഹചര്യമില്ലെന്ന് മന്ത്രി റോഷി അഗസ്റ്റിന്‍ അറിയിച്ചിരുന്നു. മുല്ലപ്പെരിയാറില്‍ ജലവിഭവ വകുപ്പ് അതീവ ജാഗ്രതയിലാണ്. നിലവില്‍ 134.75 അടി വെള്ളമാണ് മുല്ലപ്പെരിയാര്‍ അണക്കെട്ടിലുള്ളത്. ഇന്നത്തെ റൂള്‍ കര്‍വ് 137.15 അടിയാണ്. ഓഗസ്റ്റ് 10ന് ഇത് 137.5 അടിയായി ഉയരും.

ഒറ്റ ദിവസം കൊണ്ട് ജലനിരപ്പ് 2-3 അടി ഉയരാന്‍ സാധ്യതയുള്ളതിനാല്‍ അതീവ ജാഗ്രത പുലര്‍ത്താനാണ് ഉദ്യോഗസ്ഥര്‍ക്ക് നിര്‍ദ്ദേശം നല്‍കിയിട്ടുള്ളത്. പെരിയാറിന്‍റെ തീരപ്രദേശങ്ങളില്‍ താമസിക്കുന്നവര്‍ക്കും ജാഗ്രതാ നിര്‍ദേശം നല്‍കിയിട്ടുണ്ട്.