സങ്കടം സഹിക്കാനാവാതെ വീട്ടുകാര്‍ .... പത്തനംതിട്ടയില്‍ രാത്രിയിലുണ്ടായ അപകടത്തില്‍ പരുക്കേറ്റ യുവാവ് റോഡില്‍ കിടന്നത് മണിക്കൂറുകളോളം..... പുലര്‍ച്ചയോടെ പൊലീസ് കണ്ടെത്തി ആശുപത്രിയിലെത്തിച്ചെങ്കിലും യുവാവ് മരണത്തിനു കീഴടങ്ങി.

പുതുശേരി - പുറമറ്റം റോഡില്‍ പുതുശേരി കവലയ്ക്കു സമീപത്തായി ബൈക്ക് നിയന്ത്രണം വിട്ടുമറിഞ്ഞ് മല്ലപ്പള്ളി പരിയാരം ചാങ്ങിച്ചേത്ത് വീട്ടില്‍ ജോസഫ് ജോര്‍ജിന്റെ മകന്‍ സിജോ ജെറിന്‍ ജോസഫ് (27) ആണ് മരിച്ചത്.

സിജോ സഞ്ചരിച്ചിരുന്ന ബൈക്ക് റോഡിനു സമീപത്തെ റബര്‍ തോട്ടത്തിലേക്ക് മറിഞ്ഞായിരുന്നു അപകടം നടന്നത്. ഞായര്‍ രാത്രി 10നും 12നും ഇടയിലാകാം അപകടമെന്ന് സംശയം. വീട്ടില്‍ നിന്ന് സിജോയുടെ ഫോണിലേക്ക് പലതവണ വിളിച്ചെങ്കിലും എടുക്കാതിരുന്നതിനെ തുടര്‍ന്ന് 12നു ശേഷം കീഴ്വായ്പൂര് പൊലീസ് സ്റ്റേഷനില്‍ ബന്ധുക്കള്‍ പരാതി നല്‍കി.

തുടര്‍ന്ന് മൊബൈല്‍ ഫോണിന്റെ ടവര്‍ ലോക്കേഷന്‍ നോക്കി പൊലീസ് നടത്തിയ അന്വേഷണത്തിലാണ് ഇന്നലെ പുലര്‍ച്ചെ 3 മണിയോടെ റോഡിനു സമീപത്തെ റബര്‍ത്തോട്ടത്തില്‍ പരുക്കേറ്റ് അബോധാവസ്ഥയിലായിരുന്ന സിജോയെ കണ്ടെത്താനായത്.

റോഡില്‍ നിന്ന് 4 അടിയോളം താഴ്ചയിലാണ് തോട്ടം. വഴിയില്‍ നിന്ന് നോക്കിയാല്‍ സിജോ വീണുകിടക്കുന്നത് പെട്ടെന്ന് ശ്രദ്ധയില്‍പെടില്ലായിരുന്നു. അതാകാം ആരും കാണാതെ പോയത്. എറണാകുളം കീസ്‌കോട്ട് പ്രൈവറ്റ് ലിമിറ്റഡ് കമ്പനിയിലെ എന്‍ജിനീയറായിരുന്ന സിജോ കൊട്ടാരക്കരയിലെ നിര്‍മാണ ജോലിസ്ഥലത്തുനിന്ന് വീട്ടിലേക്കു മടങ്ങുന്നതിനിടെയാണ് അപകടം. അവിവാഹിതനാണ്. സംസ്‌കാരം പിന്നീട് നടക്കും.