എസ് ഐക്കെതിരെ പത്രസമ്മേളനം നടത്തിയ മുന്‍ വിരോധത്താല്‍ വ്യാജ ദൃക്‌സാക്ഷിയെയും വ്യാജ തൊണ്ടിയും സൃഷ്ടിച്ച് വഞ്ചിയൂര്‍ പോലീസ് കുറ്റപത്രം സമര്‍പ്പിച്ച പ്രകൃതി വിരുദ്ധ പീഡനക്കേസില്‍ പ്രതിയെ തിരുവനന്തപുരം പോക്‌സോ കോടതി ജഡ്ജി എം.പി.ഷിബു നിരുപാധികം വിട്ടയച്ചു.

തിരുമല സ്വദേശിയും തമ്പാനൂര്‍ ഓട്ടോ തൊഴിലാളി യൂണിയന്‍ നേതാവുമായ മുരുകനെയാണ് കുറ്റക്കാരനല്ലെന്ന് കണ്ട് വിട്ടയച്ചത്. 5 വര്‍ഷമായി സ്റ്റേഷന്‍ തൂപ്പുകാരിയായ ഗോമതിയെ വ്യാജ ദൃക്‌സാക്ഷിയാക്കി.

ക്രൈം എസ് ഐ സി. മോഹനന്റെ നിര്‍ദ്ദേശപ്രകാരമാണ് തന്നെ സാക്ഷിയാക്കിയതെന്ന് ഗോമതി വിചാരണയില്‍ മൊഴി നല്‍കിയത് സംഭവത്തിന്റെ ഗൗരവം വര്‍ദ്ധിപ്പിക്കുന്നതായും കോടതി നിരീക്ഷിച്ചു. നട്ടു പിടിപ്പിച്ച സാക്ഷിയെന്ന് വിശേഷിപ്പിച്ചാണ് കോടതി അന്വേഷണ ഉദ്യോഗസ്ഥനും ചാര്‍ജ് ഷീറ്റ് ഹാജരാക്കിയ വഞ്ചിയൂര്‍ പോലീസ് ക്രൈം എസ്.ഐ യെ രൂക്ഷ വിമര്‍ശിച്ചത്.


വ്യാജ ജട്ടിക്കളി വഞ്ചിയൂര്‍ പോലീസ് കാട്ടിയതിനും കോടതി രൂക്ഷമായി വിമര്‍ശിച്ചു. ജട്ടിയില്‍ കണ്ട സെമന്‍ , സ്‌പെര്‍മറ്റസോവ , ഉമിനീര്‍ എന്നിവ പ്രതിയുടേതല്ലെന്ന് കെമിക്കല്‍ എക്‌സാമിര്‍ റിപ്പോര്‍ട്ട് കോടതിയില്‍ സമര്‍പ്പിച്ചു.

എങ്കില്‍ പിന്നെ അവ എസ് യുടേതാണോ എന്ന് വാക്കാല്‍ കോടതി പരിഹസിച്ചു. കള്ളക്കേസുണ്ടാക്കാന്‍ പോലീസ് അതും ചെയ്യുമെന്ന് പ്രതി ഭാഗം ബോധിപ്പിച്ചു. വിപണിയില്‍ പ്രചാരത്തിലില്ലാത്ത ' 55 ടോപ്പ് ' എന്ന പേരിലുള്ള ഫുട്പാത്തില്‍ വിറ്റഴിക്കുന്ന വില കുറഞ്ഞ രണ്ടു ജട്ടികളാണ് വഞ്ചിയൂര്‍ എസ് ഐ ഇരയായ 16 കാരന്റേതെന്നും പ്രതിയുടേതെന്നും രേഖപ്പെടുത്തി തൊണ്ടിയായി കോടതിയില്‍ ഹാജരാക്കിയത്. ഇരയായി ചിത്രീകരിച്ച പ്ലസ് റ്റു വിദ്യാര്‍ത്ഥിയുടെ പ്രഥമ വിവരമൊഴിയിലും കോടതിയില്‍ നല്‍കിയ മൊഴികളിലും വൈരുദ്ധ്യമുണ്ടെന്നും കോടതി കണ്ടെത്തി.


2011 ജനുവരി 24 ന് തമ്പാനൂര്‍ എസ് ഐ സജികുമാറിനെതിരായും വഞ്ചിയൂര്‍ ക്രൈം എസ് ഐ സി.മോഹനനെതിരായും താന്‍ പത്രസമ്മേളനം നടത്തിയ വാര്‍ത്ത 25 ന് പുറത്തിറക്കിയ ദിനപ്പത്രത്തില്‍ വന്ന വാര്‍ത്ത കോടതി പ്രതിഭാഗം തെളിവായി സ്വീകരിച്ചു. പത്രവാര്‍ത്ത വന്ന വിരോധത്താല്‍ 25 ന് വൈകിട്ട് 4 മണിക്ക് എസ് ഐ തന്നോട് നേരിട്ട് ' താമസിയാതെ നിന്നെ അഴിക്കുള്ളിലാക്കുമെന്ന് ' ഭീഷണി സ്വരത്തില്‍ പറഞ്ഞതായും പ്രതി കോടതിയില്‍ മൊഴി നല്‍കി. പിറ്റേന്ന് 26 ന് 4 മണിക്ക് ഒരു പ്ലസ് റ്റു വിദ്യാര്‍ത്ഥിയെ പ്രകൃതി വിരുദ്ധ പീഢനം നടത്തിയെന്ന് കാട്ടി എഫ് ഐ ആര്‍ എടുത്ത് 7.30 ന് അറസ്റ്റ് രേഖപ്പെടുത്തി പ്രതിയെ കോടതിയില്‍ ഹാജരാക്കി റിമാന്റ് ചെയ്യുകയായിരുന്നു.