സ്കൂട്ടർ മറികടക്കാൻ ശ്രമിച്ച സ്വകാര്യ ബസിന്‍റെ പിൻവശം തട്ടി യുവ ഡോക്ടർക്ക് ദാരുണാന്ത്യം. പേരാമംഗലം സഞ്ജീവനി പ്രകൃതിചികിത്സാകേന്ദ്രത്തിലെ മെഡിക്കല്‍ ഓഫീസര്‍ ഡോ. നിത്യ (31)യാണ് മരിച്ചത്. സ്കൂട്ടറിൽ ബസിന്‍റെ പിൻവശം തട്ടി ഡോക്ടർ ബസിന്‍റെ പിൻചക്രത്തിനടിയിലേക്ക് തെറിച്ചു വീഴുകയായിരുന്നു.

അമല ആശുപത്രിക്കു സമീപം തിങ്കളാഴ്ച രാവിലെ ഒമ്പതോടെയായിരുന്നു അപകടം. ജോലിസ്ഥലത്തേക്ക് പോകുകയായിരുന്ന ഡോ. നിത്യ ബസിന്റെ പിന്‍ചക്രത്തിനടിയിലേക്കാണ് തെറിച്ചുവീണത്. പോസ്റ്റ്മോർട്ടത്തിന് ശേഷം മൃതദേഹം വീട്ടുവളപ്പിൽ സംസ്‌കരിക്കും.

മുറ്റിച്ചൂര്‍ തണ്ടാശ്ശേരി വീട്ടില്‍ ടിന്റു ഉണ്ണികൃഷ്ണനാണ് ഭർത്താവ്. രണ്ടുവയസ്സുള്ള ധ്രുവ് കൃഷ്ണയാണ് മകന്‍. തിരുവനന്തപുരം നാലാഞ്ചിറ പാറോട്ടുകോണം ടെമ്പിള്‍ റോഡ് ലില്ലി ഡെയില്‍ വീട്ടില്‍ പരേതനായ മധുവിന്റെയും ഉഷയുടെയും മകളാണ്.