വേര്‍പാട് താങ്ങാനാവാതെ..... കോഴിക്കോട് അമിതവേഗത്തില്‍ എത്തിയ സ്‌കൂട്ടര്‍ ബൈക്കിലിടിച്ച് അധ്യാപകനടക്കം രണ്ടുയുവാക്കള്‍ക്ക് ദാരുണാന്ത്യം. രണ്ട് യുവാക്കള്‍ക്ക് ഗുരുതരമായി പരിക്കേറ്റു. ബൈക്ക് ഓടിച്ചിരുന്ന ഞീഴൂര്‍ ഐ.എച്ച്.ആര്‍.ഡി. കോളേജിലെ കൊമേഴ്സ് അധ്യാപകന്‍ തലയോലപ്പറമ്പ് കാര്‍ത്തിക വീട്ടില്‍ അനന്ദു ഗോപി (29), സ്‌കൂട്ടര്‍ ഓടിച്ചിരുന്ന മുട്ടുചിറ മൈലാടുംപാറ പേട്ടയില്‍ അമല്‍ ജോസഫ് (23) എന്നിവരാണ് മരിച്ചത്.

സ്‌കൂട്ടര്‍ യാത്രക്കാരായ മൈലാടുംപാറ തെക്കേമാളിയേക്കല്‍ ജോബി ജോസ് (26), കുറുപ്പന്തറ കണ്ടമലയില്‍ രഞ്ജിത്ത് രാജു (26) എന്നിവര്‍ക്കാണ് പരിക്കേറ്റത്. ഇന്നലെ രാവിലെ പത്തിന് കടുത്തുരുത്തി-തോട്ടുവാ റോഡില്‍ പാലകരയിലാണ് അപകടം നടന്നത്. തലയോലപ്പറമ്പിലെ വീട്ടില്‍നിന്ന് രാവിലെ കോളേജിലേക്കു പോകുമ്പോഴാണ് അനന്തു അപകടത്തില്‍പ്പെട്ടത്.

സ്‌കൂട്ടറില്‍ മൂന്നുപേരാണ് ഉണ്ടായിരുന്നത്. ഇവര്‍ മദ്യലഹരിയിലായിരുന്നെന്ന് പോലീസും നാട്ടുകാരും പറഞ്ഞു. അപകടത്തില്‍പ്പെട്ടവരെ മുട്ടുചിറയിലെ സ്വകാര്യ ആശുപത്രിയില്‍ പ്രവേശിപ്പിച്ചു. രഞ്ജിത്ത് രാജുവിനെ പിന്നീട് കോട്ടയം മെഡിക്കല്‍ കോളേജ് ആശുപത്രിയിലേക്കു മാറ്റി.

റിട്ട. ദേവസ്വം ബോര്‍ഡ് കമ്മിഷണര്‍ ടി.കെ. ഗോപിയുടെയും റിട്ട. പ്രഥമാധ്യാപികയുടെയും മകനാണ് അനന്ദു ഗോപി. ഭാര്യ: ആതിര. വിഷ്ണു സഹോദരനാണ്. അനന്ദുവിന്റെ മൃതദേഹം ഇന്ന് രാവിലെ എട്ടിന് വീട്ടിലെത്തിക്കും. സംസ്‌കാരം രാവിലെ 11-ന് വീട്ടുവളപ്പില്‍ നടക്കും.

ജോസഫ് ജോര്‍ജിന്റെയും ജിജിയുടെയും മകനാണ് അമല്‍ ജോസഫ്. സഹോദരി: അലീന (നഴ്‌സ്, സൗദി). സംസ്‌കാരം പിന്നീട് നടത്തും.