വീണ്ടും പൈപ്പ് പൊട്ടല്‍... മൈതാനം മുതല്‍ പുന്നമൂട് വരെ പ്രധാന റോഡിനടിയിലൂടെ കടന്നു പോകുന്ന ജലഅതോറിറ്റിയുടെ പ്രധാന ജലവിതരണ പൈപ്പ് ലൈനില്‍ 11 ഓളം ഇടങ്ങളിലായി ചോര്‍ച്ച കാരണം ധാരാളം ജലം പാഴാകുന്നതായി കണ്ടെത്തല്‍. കുറഞ്ഞ ദൂരത്തില്‍ ഇത്രയധികം ഭാഗത്ത് പൈപ്പ് പൊട്ടല്‍ ആദ്യമെന്നാണു അതോറിറ്റി ഉദ്യോഗസ്ഥര്‍ .

പൈപ്പുകള്‍ പൊട്ടാനുള്ള കാരണം വ്യക്തമല്ല. രഘുനാഥപുരം ടാങ്കിലെ സപ്ലൈ ലൈനില്‍ നിന്നുള്ള 450 എംഎം ആസ്ബസ്റ്റോസ് സിമന്റ് (എസി) പൈപ്പിലാണ് ചോര്‍ച്ച കണ്ടെത്തിയത്. ഇതിനകം മൂന്ന് സ്ഥലങ്ങളിലെ ചോര്‍ച്ച പരിഹരിച്ചു.

പൈപ്പ് ചോര്‍ച്ച കണ്ടെത്താനായി മൈതാനം മുതല്‍ പരിശോധന നടന്നു വരുന്നതിനിടെയാണ് കൂടുതല്‍ സ്ഥലങ്ങളില്‍ ചോര്‍ച്ച കണ്ടെത്തിയത്. മൈതാനത്ത് പ്രവര്‍ത്തിക്കുന്ന ഇന്ധനവിതരണം കേന്ദ്രത്തിന് മുന്നില്‍ റോഡ് വെട്ടിപ്പൊളിച്ചു പൈപ്പ് ചോര്‍ച്ച മാറ്റിയതിന് പിന്നാലെ കെഎസ്ഇബി ഓഫിസ്, വര്‍ക്കല റെയില്‍വേ സ്റ്റേഷന്‍ മുന്‍ഭാഗം എന്നിവിടങ്ങളിലും പൈപ്പ് ചോര്‍ച്ച കണ്ടെത്തി. ഇവിടങ്ങളിലും റോഡ് പൊളിച്ചു പുതിയ പൈപ്പ് ഘടിപ്പിച്ചു.

അരക്കിലോമീറ്റര്‍ നീളുന്ന റോഡില്‍ അവശേഷിക്കുന്ന പൈപ്പ് ചോര്‍ച്ചകള്‍ ജലവിതരണ ക്രമം തടസ്സപ്പെടാത്ത വിധത്തില്‍ പരിഹരിക്കാനുള്ള ശ്രമത്തിലാണ് ജല അതോറിറ്റി.

റോഡ് നവീകരണത്തിനു തുടക്കമിട്ട വര്‍ക്കലപാരിപ്പള്ളി റോഡിന്റെ ഭാഗം കൂടിയാണ് മൈതാനംപുന്നമൂട് റോഡ്. 45 കോടിയുടെ റോഡ് നവീകരണം പാരിപ്പള്ളി മുക്കട ജംഗ്ഷന്‍ മുതല്‍ വര്‍ക്കല ഭാഗത്തേക്കു പുരോഗമിക്കുന്നു.