കോട്ടായിയിൽ പ്രായപൂർത്തിയാകാത്ത വിദ്യാർത്ഥികളെ പീഡിപ്പിച്ച അദ്ധ്യാപകൻ അറസ്റ്റിൽ. കൊല്ലം തട്ടാമല സ്വദേശി സനോഫർ ആണ് അറസ്റ്റിലായത്. ഇയാൾക്കെതിരെ പോക്‌സോ നിയമ പ്രകാരം പോലീസ് കേസ് എടുത്തു. സംശയ നിവാരണത്തിനായി വൈകുന്നേരം ക്ലാസ് കഴിഞ്ഞ ശേഷം വിദ്യാര്‍ഥിനിയോട് സ്കൂളില്‍ കാത്തുനില്‍ക്കാന്‍ ആവശ്യപ്പെട്ടതിന് ശേഷമായിരുന്നു അതിക്രമം.

മറ്റ് കുട്ടികള്‍ വീട്ടിലേക്ക് മടങ്ങിയെന്ന് ഉറപ്പാക്കിയ ശേഷമായിരുന്നു പീഡനശ്രമം നടന്നത്. നിലവിളിച്ച് ഓടി രക്ഷപ്പെട്ട പെണ്‍കുട്ടി വീട്ടിലെത്തി രക്ഷിതാക്കളോട് കാര്യം പറയുകയായിരുന്നു. തുടർന്ന് അധ്യാപകനോട് അതിക്രമത്തെക്കുറിച്ച് രക്ഷിതാക്കൾ ചോദിച്ചെങ്കിലും ആദ്യം നിഷേധിക്കുകയായിരുന്നു.

പിന്നാലെ പൊലീസില്‍ പരാതി നൽകുകയായിരുന്നു. അധ്യാപകനെതിരെ കുട്ടികളോടുള്ള പെരുമാറ്റത്തിലും പഠനകാര്യങ്ങളിലും മുമ്പും പരാതികൾ ഉയർന്നിരുന്നു.

പെരിങ്ങോട്ടുകുറിശ്ശി ബമ്മണ്ണൂര്‍ ഹയര്‍ സെക്കന്‍‍ഡറി സ്കൂളിലേക്ക് എട്ട് മാസം മുന്‍പാണ് സനോഫര്‍ അധ്യാപകനായെത്തിയത്. കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു. പാലക്കാട് ഡിവൈഎസ്പിയുടെ നേതൃത്വത്തിലാണ് അന്വേഷണം.