ഗവര്ണര് ഇന്നെത്തും; നേരെ പോകുന്നത് വിസിയെ തൂക്കാന്; വിസി ഗൂഢാലോചന നടത്തിയെന്ന് വീണ്ടും ആവര്ത്തിച്ച് ആരിഫ് മുഹമ്മദ് ഖാന്
കണ്ണൂര് സര്വകലാശാല വൈസ് ചാന്സലറിനെതിരായ പരാമര്ശത്തില് ഉറച്ച് ഗവര്ണര് ആരിഫ് മുഹമ്മദ് ഖാന്. ഗോപിനാഥ് രവീന്ദ്രന് ഗൂഢാലോചന നടത്തിയെന്ന് വീണ്ടും ഗവര്ണ്ണര് ആരോപിച്ചു. തന്നെ ആക്രമിച്ചവരെ രക്ഷിക്കാന് സര്ക്കാര് ശ്രമിച്ചുവെന്നും. കേരളത്തില് എന്തും നടക്കുമെന്ന് ഇര്ഫാന് ഹബീബിന് അറിയാമെന്നുമായിരുന്നു ഗവര്ണ്ണര് പറഞ്ഞത്.
അതേസമയം ഗവര്ണ്ണര് ഇന്ന് കേരളത്തിലെത്തും. ലോകായുക്താ, സര്വ്വകലാശാല നിയമ ഭേദഗതി ബില്ലുകള് നിയമസഭ പാസാക്കിയാലും ഗവര്ണ്ണര് ഒപ്പിടില്ലെന്ന കാര്യം ഉറപ്പാണ്. അതുകൊണ്ടു തന്നെയാണ് ഭരണഘടനാ വിരുദ്ധമായ ബില്ലുകളില് ഒപ്പിടില്ലെന്ന് ഗവര്ണര് വ്യക്തമാക്കിയിയത്. തന്റെ അധികാരം വെട്ടിക്കുറച്ച ബില് നിയമമാകണമെങ്കില് താന് തന്നെ ഒപ്പിടണമെന്നും ഗവര്ണര് സര്ക്കാരിനെ വെല്ലുവിളിച്ചു.
അതേസമയം ലോകായുക്തയിലും ഗവര്ണര് ഒപ്പിടല് വൈകും. സര്ക്കാരും ഗവര്ണറും തമ്മിലുള്ള പോര് കടുക്കുന്നതിനിടയാണ് ബില് നിയമസഭയില് വരുന്നത്. താന് ഒപ്പിട്ടാല് മാത്രമേ ബില് നിയമം ആവുകയുള്ളുവെന്നും ബില്ലില് ഒപ്പിടില്ലെന്നുമുള്ള നിലപാടിലാണ് ഗവര്ണര് ആരിഫ് മുഹമ്മദ് ഖാന്. കണ്ണൂര് വിസിക്കെതിരെ നടപടിയെടുക്കാനും സാധ്യത ഏറെയാണ്.
വൈസ് ചാന്സലറെ നിയമിക്കാനുള്ള സെര്ച്ച് കമ്മിറ്റിയില് രണ്ട് അംഗങ്ങളെ കൂടി ചേര്ക്കാനാണ് സര്ക്കാറിന്റെ നീക്കം. ഉന്നത വിദ്യാഭ്യാസ കൗണ്സില് വൈസ് ചെയര്മാനും സര്ക്കാര് പ്രതിനിധിയും കൂടി സെര്ച്ച് കമ്മിറ്റിയില് അംഗമാകുന്നതോടെ അംഗങ്ങളുടെ എണ്ണം അഞ്ചാകും. ഗവര്ണറുടെ പ്രതിനിധിയെ സര്ക്കാരാകും നോമിനേറ്റ് ചെയ്യുക. ഇതോടെ സര്ക്കാരിന് കമ്മിറ്റിയില് മേല്ക്കൈ നേടാനാകും.
ഇഷ്ടമുള്ളവരെ സര്വകലാശാല വൈസ് ചാന്സലറായി നിയമിക്കാനുള്ള സാഹചര്യം ഒരുക്കുകയാണ് സര്ക്കാര് ചെയ്യുന്നതെന്നും സര്വകലാശാല നിയമഭേദഗതിയെ എതിര്ക്കുമെന്ന് പ്രതിപക്ഷം അറിയിച്ചിട്ടുണ്ട്. നിയമസഭ പാസാക്കിയാലും ബില്ലില് ഗവര്ണര് ഒപ്പിടേണ്ടതുണ്ട്. ഇതിലൂടെ സര്ക്കാര്ഗവര്ണര് പോര് രൂക്ഷമാകാനാണ് സാധ്യത. ബില് ഭരണഘടന വിരുദ്ധമാണെന്നും കേരളത്തിലെ ഉന്നത വിദ്യാഭ്യാസ മേഖല തകര്ച്ചയുടെ വക്കിലാണെന്നുമുള്ള നിലപാടില് ഉറച്ചുനില്ക്കുകയാണ് ഗവര്ണര്
ഇതിനിടെയാണ് ചരിത്ര കോണ്ഗ്രസ് ചര്ച്ച. ചരിത്ര കോണ്ഗ്രസില് തനിക്കെതിരെ ഉണ്ടായ ആക്രമണശ്രമം ആസൂത്രിതമാണെന്ന് ഗവര്ണര് ആവര്ത്തിക്കുകയാണ്. പൗരത്വ നിയമ ഭേദഗതിക്കെതിരായ പ്രക്ഷോഭകാലത്ത് 2019 ഡിസംബര് 28നു കണ്ണൂര് സര്വകലാശാലയിലെ ഇന്ത്യന് ചരിത്ര കോണ്ഗ്രസ് വേദിയില് തനിക്കെതിരെ പ്രതിഷേധിച്ച ചരിത്രകാരന് ഇര്ഫാന് ഹബീബ് ഗുണ്ടയാണെന്നും ഗവര്ണര് തുറന്നടിച്ചു.
ഡല്ഹിയിലെ കേരള ഹൗസില് മാധ്യമങ്ങളെ കാണുമ്പോഴാണ് ഗവര്ണര് ആരോപണങ്ങള് ആവര്ത്തിച്ചത്. ''കണ്ണൂര് സര്വകലാശാല സംഘടിപ്പിച്ച ആ പരിപാടിയില് നടന്നത് പ്രതിഷേധമല്ല, മറിച്ച് ആക്രമണമാണ്. ഇതുമായി ബന്ധപ്പെട്ട് ഡല്ഹിയില് വച്ചുതന്നെ ആസൂത്രണവും ഗൂഢാലോചനയും നടന്നു. ഈ ഗൂഢാലോചനയില് കണ്ണൂര് സര്വകലാശാല വിസിയും പങ്കാളിയാണ്. വൃത്തികെട്ട മനസ്സാണ് ഇവര്ക്കുള്ളത്' ഗവര്ണര് പറഞ്ഞു.
https://www.facebook.com/Malayalivartha
