സുരേഷ് ഗോപിയെ കുറിച്ച് സംവിധായകന്‍ സമദ് മങ്കട പറഞ്ഞവാക്കുകള്‍ ശ്രദ്ധനേടുകയാണ്. കിച്ചാമണി എം.ബി.ബി.എസ് എന്ന ചിത്രത്തിന്റെ കഥപറയാന്‍ സുരേഷ് ഗോപിയുടെ അടുത്ത് പോയ അനുഭവമാണ് സംവിധായകന്‍ പങ്കുവച്ചത്. 'മാസ്റ്റര്‍ ബിന്‍' എന്ന യൂട്യൂബ് ചാനലിന് നല്‍കിയ അഭിമുഖത്തിലായിരുന്നു സംവിധായകന്റെ പ്രതികരണം.

'സുരേഷേട്ടനെ വച്ച് ഈ സബ്‌ജെക്ട് ചെയ്യണം എന്നായിരുന്നു ആഗ്രഹം. പക്ഷെ പുള്ളി ചെയ്യുമോ എന്നറിയില്ല. അദ്ദേഹം ചെയ്യുന്ന സിനിമകളുടെ പാറ്റേണിലുള്ളതല്ല. കൊച്ചിന്‍ ഹനീഫക്കയെക്കൊണ്ട് പറയിപ്പിക്കാമെന്നായിരുന്നു കരുതിയിരുന്നത്. അദ്ദേഹം പറഞ്ഞാല്‍ എല്ലാവരും കേള്‍ക്കും. ഹനീഫ്ക്കയെ എല്ലാവര്‍ക്കും ഇഷ്ടമാണ്. കൊച്ചിയിലേക്ക് വരാന്‍ അദ്ദേഹം ആവശ്യപ്പെട്ടു.

ഹനീഫ്ക്കയാണ് ഞങ്ങളെ പരിചയപ്പെടുത്തുന്നത്. ഇത് സമദ് മങ്കട. ആനച്ചന്തം, മധുചന്ദ്രലേഖ തുടങ്ങിയ സിനിമകള്‍ നിര്‍മ്മിച്ചിട്ടുണ്ട്. പുള്ളി ഒരു സബ്‌ജെക്ടുമായി വന്നതാണ്. ഡയറക്ട് ചെയ്യാനാണ് താത്പര്യപ്പെടുന്നത്. ഈ കഥയൊന്ന് കേള്‍ക്കണം. ചെയ്യണോ വേണ്ടയോ എന്ന് കേട്ടിട്ട് തീരുമാനിക്കണം എന്ന് സുരേഷേട്ടനോട് പറഞ്ഞു.

അത് റംസാന്‍ സമയമാണ്. നോമ്പെടുത്തിട്ടാണ് പോകുന്നത്. നോമ്പുണ്ടോ എന്ന് സുരേഷേട്ടന്‍ ചോദിച്ചു. ആറുമണി സമയമാണ്. നോമ്പുണ്ടെന്ന് പറഞ്ഞു. അദ്ദേഹം എഴുന്നേറ്റ് പോയി ആര്‍ക്കോ ഫോണ്‍ ചെയ്യുന്നുണ്ടായിരുന്നു. നോമ്പിന്റെ ക്ഷീണം ഉണ്ടെങ്കിലും അതൊക്കെ മറന്ന് കഥ പറയുകയായിരുന്നു. കൃത്യം വാങ്കിന്റെ സമയത്ത് ഞങ്ങളുടെ മുന്നിലേക്ക് ജ്യൂസും ഫ്രൂട്ട്‌സുമൊക്കെ വന്നു. നോമ്പ് തുറക്കാനുള്ളതൊക്കെ പുള്ളി അറേഞ്ച് ചെയ്ത് കൃത്യസമയത്ത് തന്നെ എത്തിച്ചു. കഥ ഇഷ്ടപ്പെട്ട അദ്ദേഹം ചെയ്യാമെന്ന് സമ്മതിച്ചു' സമദ് പറഞ്ഞു.