മുന്‍ എംഎല്‍എ ഇ.എസ്. ബിജിമോള്‍ സിപിഐയെ വെള്ളം കുടുപ്പിക്കുകയാണ്. വ്യക്തിഹത്യ ചെയ്യുന്നു എന്ന് ആരോപിച്ച് സിപിഐ ഇടുക്കി ജില്ലാ നേതൃത്വവുമായി കൊമ്പുകോര്‍ത്തിരിക്കുകയാണ് ബിജിമോള്‍.

അപവാദ പ്രചാരണം കയ്യും കെട്ടി കേട്ടിരിക്കാന്‍ കഴിയില്ലെന്നും ജില്ലാ സെക്രട്ടറിയാകാന്‍ അയോഗ്യതയുണ്ടെന്നു കരുതുന്നില്ലെന്നും ബിജിമോള്‍ മാധ്യമങ്ങളോട് പറഞ്ഞു. മുന്‍ ജില്ലാ സെക്രട്ടറി കെ.കെ.ശിവരാമന്‍ തന്നെ പരാജയപ്പെടുത്താന്‍ നടത്തിയ ഇടപെടലുകള്‍ ദൗര്‍ഭാഗ്യകരമാണെന്നും പറഞ്ഞു. സിപിഐയില്‍ പുരുഷാധിപത്യമുണ്ടെന്നും സ്ത്രീവിരുദ്ധ നിലപാട് സ്വീകരിക്കുന്നവരോടു സന്ധിയില്ലെന്നും രൂക്ഷമായ ഭാഷയിലുള്ള കുറിപ്പ് ബിജിമോള്‍ സമൂഹമാധ്യമത്തില്‍ പങ്കുവച്ചതോടെയാണ് വിവാദം തുടങ്ങിയത്.

ജില്ലാ സെക്രട്ടറി സ്ഥാനത്തേക്കു നടന്ന തിരഞ്ഞെടുപ്പില്‍ 7 വോട്ടുകള്‍ മാത്രമാണ് ബിജിമോള്‍ക്കു കിട്ടിയത്. 43 വോട്ടുകള്‍ നേടി െക.സലീംകുമാര്‍ വിജയിച്ചു. ഔദ്യോഗിക പക്ഷം നിര്‍ദേശിച്ച ബിജിമോളെ ജില്ലാ നേതൃത്വം തള്ളുകയായിരുന്നു. 50 അംഗ ജില്ലാ കൗണ്‍സിലില്‍ ബിജിമോള്‍ ഉള്‍പ്പെടെ 9 സ്ത്രീകളുണ്ടായിരുന്നിട്ടും കനത്ത പരാജയം നേരിടേണ്ടി വന്നതു ചര്‍ച്ചയായി.

ശിവരാമന്‍ അവതരിപ്പിച്ച റിപ്പോര്‍ട്ടിലും ബിജിമോള്‍ക്കെതിരെ കടുത്ത വിമര്‍ശനമുണ്ടായിരുന്നു. വനിതയായ എന്നെ ഇടുക്കി ജില്ലാ സെക്രട്ടറിയാക്കണമെന്നു പാര്‍ട്ടി കണ്‍ട്രോള്‍ കമ്മിഷന്‍ ചെയര്‍മാന്‍ പന്ന്യന്‍ രവീന്ദ്രന്‍ സമ്മേളനത്തില്‍ ആവര്‍ത്തിച്ച് ആവശ്യപ്പെട്ടിട്ടും ജില്ലാ നേതൃത്വം അംഗീകരിച്ചില്ല. എന്നെ വ്യക്തിഹത്യ നടത്താന്‍ ജില്ലാ നേതൃത്വം വലിയ ശ്രമം നടത്തി. ഒരു വനിത ജില്ലാ സെക്രട്ടറിയാവുന്നുവെന്ന തീരുമാനം അട്ടിമറിച്ചുവെന്നും ബിജിമോള്‍ ആരോപിച്ചു.

ബിജിമോളുടെ ഫെയ്‌സ്ബുക് പോസ്റ്റ് വിവാദമായിരുന്നു. പോസ്റ്റിലെ പ്രസക്തഭാഗം ഇങ്ങനെയാണ്...

15% സ്ത്രീസംവരണം നേതൃത്വനിരയില്‍ ഉണ്ടാകണമെന്ന് നിര്‍ദേശം നല്‍കിയതിന്റെ ഭാഗമായാണ് ഒരു വനിതയെയെങ്കിലും ജില്ലാ സെക്രട്ടറി സ്ഥാനത്തേക്കു പരിഗണിക്കണമെന്ന് എന്‍എഫ് ഐഡബ്ലുവിന്റെ കേരള ഘടകം നിലപാട് സ്വീകരിച്ചത്. ജില്ലാ സെക്രട്ടറി പദവിയിലേക്ക് എന്റെ പേരു നിര്‍ദേശിക്കുകയും ചെയ്തു. പുരുഷ കേന്ദ്രീകൃതമായ ആ കൊക്കൂണില്‍ തൊട്ടതോടെ എനിക്ക് നേരെയുണ്ടായ അധിക്ഷേപം വിവരണാതീതമാണ്.

എന്നെ അപമാനിക്കുവാന്‍ ശ്രമിച്ച ആദര്‍ശ രാഷ്ട്രീയ വക്താക്കളുടെ നെറികേട് ഒരു ദുരനുഭവമായി എന്നെ വേട്ടയാടും. പക്ഷേ, തളര്‍ന്നുപോകില്ല. കൂടുതല്‍ കരുത്തോടെ മുന്നേറും. സ്ത്രീവിരുദ്ധ നിലപാട് സ്വീകരിക്കുന്നവര്‍ ഏത് പൊന്നു തമ്പുരാന്‍ ആയാലും അവരോട് എനിക്ക് എന്നും ആനക്കാട്ടില്‍ ഈപ്പച്ചന്റെ ഡയലോഗില്‍ പറഞ്ഞാല്‍ 'ഇറവറന്‍സാണ്'. സ്ത്രീപക്ഷ നിലപാട് സ്വീകരിക്കുമ്പോള്‍ ഇത്തിരി ഔട്ട്‌സ്‌പോക്കണാകും തിരുമേനിമാരെ, കാരണം ഇതു ജനുസ്സ് വേറെയാണ്.

അതേസമയം വനിതയാണ് എന്നതുകൊണ്ടു മാത്രം പാര്‍ട്ടി ജില്ലാ സെക്രട്ടറി ആകാന്‍ കഴിയില്ലെന്ന് സിപിഐ ഇടുക്കി ജില്ലാ മുന്‍ സെക്രട്ടറി കെ.കെ.ശിവരാമന്‍ പറഞ്ഞു. സ്ത്രീ എന്ന പരിഗണന നല്‍കിയില്ലെന്നതു ബിജിമോളുടെ തോന്നല്‍ മാത്രമാണ്. ഇ.എസ്.ബിജിമോളുടെ വിമര്‍ശനം പാര്‍ട്ടി പരിശോധിക്കും. കാര്യങ്ങള്‍ വേണ്ടവിധം ആലോചിക്കാതെയാണു വിമര്‍ശനം. ബിജിമോള്‍ക്ക് എല്ലാം നല്‍കിയത് പാര്‍ട്ടിയാണ്. വിമര്‍ശനം ദൗര്‍ഭാഗ്യകരമായിപ്പോയെന്നും ശിവരാമന്‍ പറഞ്ഞു.

അതേസമയം പാര്‍ട്ടിക്ക് സ്വീകാര്യമെങ്കില്‍ അടുത്തതവണയും താന്‍ സെക്രട്ടറി സ്ഥാനത്തുണ്ടാകുംമെന്ന് സി പി ഐ സംസ്ഥാന സെക്രട്ടറി കാനം രാജേന്ദ്രന്‍ പറഞ്ഞു. താന്‍ സെക്രട്ടറിയായി തുടരുന്നത് ദഹിക്കാത്തവര്‍ക്കുള്ള മരുന്ന് നല്‍കാനറിയാമെന്നും കാനം രാജേന്ദ്രന്‍ പറഞ്ഞു. സി പി ഐയെ തകര്‍ക്കാനുള്ള വാര്‍ത്തകള്‍ പ്രചരിപ്പിക്കുന്നത് പാര്‍ട്ടിക്കുള്ളില്‍ നിന്ന് തന്നെയാണ്. പാര്‍ട്ടി ശത്രുക്കളുമായി ചേര്‍ന്ന് ഇവര്‍ നടത്തുന്ന നീക്കം ശക്തമായി നേരിടുമെന്നും കാനം രാജേന്ദ്രന്‍ പറഞ്ഞു.