ഭൂമിയില്‍ നിന്ന് ഏറ്റവും കൂടുതല്‍ ദൂരം സഞ്ചരിച്ച മനുഷ്യര്‍ എന്ന റെക്കോര്‍ഡിട്ട് ആര്‍ട്ടെമിസ് 2 സംഘം. അപ്പോളോ 13 സംഘത്തിന്റെ റെക്കോര്‍ഡാണ് ആര്‍ട്ടെമിസ് സംഘം മറികടന്നത്. 1970 ഏപ്രില്‍ 14ലെ റെക്കോര്‍ഡാണ് ആര്‍ട്ടെമിസ് സംഘം മറികടന്നത്. ചന്ദ്രനില്‍ നിന്ന് 20,000 കിലോമീറ്ററില്‍ താഴെ മാത്രം അകലെയാണ് ഒറയണ്‍ എന്ന പേടകമുള്ളത്.

ചന്ദ്രനിലേക്കുള്ള യാത്രയില്‍ നിര്‍ണായക ഘട്ടം കടന്നിരിക്കുകയാണ് ആര്‍ട്ടെമിസ് 2 ദൗത്യം. ഭൗമ പരിക്രമണപഥം വിട്ട് ഒറയോണ്‍ പേടകം ചാന്ദ്ര ആകര്‍ഷണ വലയത്തിലേക്ക് കടന്നു. പേടകം ചന്ദ്രന്റെ ഗുരുത്വാകര്‍ഷണ ബലത്തിന്റെ സ്വാധീനത്തിലേക്ക് പ്രവേശിച്ചത് ഇന്നാണ്. 1972ന് ശേഷം ഇതാദ്യമായിട്ടാണ് മനുഷ്യന്‍ വീണ്ടും ചാന്ദ്ര ഗുരുത്വസ്വാധീന മേഖലയില്‍ എത്തിയത്.

ഇനി ചന്ദ്രന്റെയുമപ്പുറത്ത് നിന്ന് ദൗത്യസംഘം ചന്ദ്രനെയും ഭൂമിയെയും നോക്കിക്കാണും. ഇന്ന് അര്‍ദ്ധരാത്രിക്ക് ശേഷം സംഘം ചാന്ദ്ര നിരീക്ഷണം തുടങ്ങും. ഏപ്രില്‍ 7ന് പുലര്‍ച്ചെ 4:14ന് പേടകവും ഭൂമിയും തമ്മിലുള്ള ബന്ധം നഷ്ടപ്പെടും. ഒറയോണ്‍ ചന്ദ്രന്റെ പിന്നിലേക്ക് പോകുന്നതിനാലാണ് ഇത്. നാല്‍പ്പത് മിനുട്ടോളം പേടകവും ഭൂമിയും തമ്മില്‍ ബന്ധമുണ്ടാകില്ല. ഈ സമയം ചന്ദ്രന്റെ അപ്പുറത്ത് നിന്ന് ഭൂമി അസ്തമിക്കുന്നതും ഉദിക്കുന്നതും യാത്രികര്‍ കാണും. ദൗത്യത്തിന്റെ ഏഴാം ദിനം പകുതി കഴിയുമ്പോള്‍ സംഘത്തിന്റെ ഭൂമിയിലേക്കുള്ള മടക്കയാത്രയ്ക്ക് തുടക്കമാകും. എട്ടാം നാള്‍ പേടകത്തെ വീണ്ടും പൈലറ്റിന്റെ നിയന്ത്രണത്തിലാക്കും. ഒമ്പതാം നാള്‍ തിരിച്ചിറക്കത്തിനുള്ള തയ്യാറെടുപ്പ്. പത്താം നാള്‍ ഭൂമിയിലേക്ക് ഒറയോണ്‍ വന്നിറങ്ങും.

ആര്‍ട്ടെമിസ് 2 സംഘത്തിന് ആശംസയുമായി അപ്പോളോ 8 സംഘാംഗം ജിം ലോവല്‍. ആദ്യമായി ചന്ദ്രനെ ചുറ്റി വന്ന ദൗത്യമാണ് അപ്പോളോ 8. ആര്‍ട്ടെമിസ് സംഘം ഉറക്കമുണര്‍ന്നപ്പോള്‍ നാസ ആദ്യ കേള്‍പ്പിച്ചത് ജിമ്മിന്റെ ആശംസയാണ്. തന്റെ പഴയ ചുറ്റുവട്ടത്തിലേക്ക് നിങ്ങള്‍ക്ക് സ്വാഗതമെന്ന് ജിം പറഞ്ഞു. നാലംഗ സംഘത്തിന് വിജയാശംസകള്‍ നേരുകയും കാഴ്ച ആസ്വദിക്കാന്‍ നിര്‍ദേശം നല്‍കുകയും ചെയ്തു.