കേരളത്തില്‍ തെരുവ് നായ ആക്രമണം രൂക്ഷമായി കൊണ്ടിരിക്കുകയാണ്. ഈ വിഷയത്തില്‍ വിമര്‍ശനമുന്നയിച്ച് നിരവധി പേര്‍ രംഗത്തെത്തിയിരുന്നു. ഇപ്പോളിതാ, വിഷയത്തില്‍ പ്രതികരണവുമായി എത്തിയിരിക്കുകയാണ് സംവിധായകന്‍ ഒമര്‍ ലുലു.

സ്വന്തം മക്കളെക്കാല്‍ വലുതല്ല തെരുവില്‍ അലയുന്ന ഒരു പേ പട്ടിയും എന്നാണ് ഒമര്‍ ലുലു പറയുന്നത്. 'ആദ്യം മനുഷ്യ സ്‌നേഹം എന്നിട്ട് പോരെ മൃഗ സ്‌നേഹം?', എന്നും ഒമര്‍ ചോദിക്കുന്നു . ഫേസ്ബുക്ക് പോസ്റ്റിലൂടെയായിരുന്നു ഒമര്‍ ലുലു പ്രതികരണം നടത്തിയത് . നിരവധി പേരാണ് ഒമറിന്റെ പോസ്റ്റിന് താഴെ കമന്റുമായി എത്തുന്നത്.

സംവിധായകനോട് വിയോജിപ്പ് അറിയിച്ചും നിരവധിയാളുകള്‍ കമെന്റ് ചെയ്യുന്നുണ്ട് . അതും ഒരു ജീവനാണ് എന്നാണ് വിയോജിക്കുന്നവര്‍ പറയുന്നത്. ഇപ്പോഴിതാ തെരുവ് നായ വിഷയത്തില്‍ പ്രതികരണവുമായി നടി മൃദുല മുരളി രംഗത്തെത്തിയിരിക്കുകയാണ് .

തെരുവുനായ്ക്കളെ കൊല്ലുന്നത് അവസാനിപ്പിക്കണമെന്നും പകരം ആനിമല്‍ ഷെല്‍ട്ടറുകളുണ്ടാക്കി അവയെ പാര്‍പ്പിക്കണമെന്നുമാണ് നടി ആവശ്യപ്പെടുന്നത്. ഇന്‍സ്റ്റഗ്രാമിലൂടെയായിരുന്നു മൃദുലയുടെ പ്രതികരണം.

കൊലപാതകവും ഹീനമായ കുറ്റകൃത്യങ്ങളും ചെയ്യുന്നവരെ ശിക്ഷിക്കുന്നതിനു പകരം, മുഴുവന്‍ മനുഷ്യരാശിയേയും ഇല്ലായ്മ ചെയ്യണോ എന്ന് അവര്‍ ചോദിക്കുന്നു. 'തെരുവുനായ്ക്കളെ കൊല്ലുന്നത് നിര്‍ത്തൂ' എന്ന ഹാഷ് ടാഗും പോസ്റ്റ് ചെയ്തിട്ടുണ്ട്. മൃദുലയെ അനുകൂലിച്ചും പ്രതികൂലിച്ചും നിരവധി പേരാണ് കമന്റുകളുമായി രംഗത്തെത്തിയത്.