ശുചീകരണ തൊഴിലാളികള് ഭക്ഷണം മാലിന്യത്തില് തളളിയതിനെതിരെ എടുത്ത നടപടി പിന്വലിക്കാന് തീരുമാനം
ശുചീകരണ തൊഴിലാളികള് ഭക്ഷണം മാലിന്യത്തില് തളളിയതിനെതിരെ എടുത്ത നടപടി പിന്വലിക്കാന് തീരുമാനമായി. നഗരസഭയുടെ ഓണാഘോഷ പരിപാടിയുടെ ഭാഗമായി ചാല സര്ക്കിള് ഓഫീസില് അഞ്ചാം തീയതിയാണ് ശുചീകരണ തൊഴിലാളികള് ഭക്ഷണം മാലിന്യത്തില് തളളിയത്.
ശുചീകരണ തൊഴിലാളികളായ എ ശ്രീകണ്ഠന്, സന്തോഷ്, വിനോദ് കുമാര് ,രാജേഷ്, ബിനുകുമാര് , സുജാത, ജയകുമാരി , എന്നിവര്ക്കെതിരെയുള്ള നടപടിയാണ് പിന്വലിച്ചത്. ഇവര്ക്കൊപ്പം നടപടിയെടുത്ത താല്ക്കാലിക ജീവനക്കാരായ നാല് പേര്ക്കെതിരെയുള്ള നടപടിയും പിന്വലിച്ചു.
പ്രക്ഷോഭങ്ങളോടും സമരങ്ങളോടും അനുഭാവപൂര്വ്വമായ സമീപനമാണ് ഭരണസമിതിയ്ക്ക് ഉള്ളത്. എന്നാല് ഭക്ഷണം മാലിന്യത്തില് വലിച്ചെറിയുന്ന രീതിയിലുള്ള സമരരൂപങ്ങളെ അംഗീകരിക്കാന് കഴിയില്ല. മേലില് ഇത്തരം വൈകാരിക പ്രകടനങ്ങള് ആവര്ത്തിക്കില്ല എന്ന ജീവനക്കാരുടെയും സംഘടനകളുടെയും ഉറപ്പിന്മേലാണ് ഇപ്പോള് ശിക്ഷാനടപടി പിന്വലിക്കാന് തീരുമാനിച്ചത്.
ഓണാഘോഷവുമായി ബന്ധപ്പെട്ടുണ്ടായ തര്ക്കത്തെ തുടര്ന്നാണ് തിരുവനന്തപുരം നഗരസഭയിലെ ശുചീകരണ തൊഴിലാളികള് ഭക്ഷണം മാലിന്യത്തിലെറിഞ്ഞ് പ്രതിഷേധിച്ചത്. ജോലി നേരത്തെ തീര്ത്തിട്ടും ഓണാഘോഷത്തിന് തൊട്ടുമുമ്പ് അറവുമാലിന്യം പെറുക്കാന് ജൂനിയര് ഹെല്ത്ത് ഇന്സ്പെക്ടര് ഇവരോട് ആവശ്യപ്പെട്ടതോടെയാണ് പ്രതിഷേധം അരങ്ങേറിയത്.
https://www.facebook.com/Malayalivartha
