വയനാട് പനമരത്ത് തെരുവുനായയുടെ ആക്രമണം ഭയന്ന് ഓടുന്നതിനിടെ വീട്ടമ്മയ്ക്ക് വീണു പരിക്ക്. പനി ബാധിച്ച് ചികിത്സയിൽ കഴിഞ്ഞ വീട്ടമ്മ ആശുപത്രി വരാന്തയിൽ തമ്പടിച്ച തെരുവുനായ്ക്കൾ ആക്രമിക്കാനെത്തിയതോടെ ഭയന്ന് ഓടിയതിനെ തുടർന്നാണ് പരുക്ക് പറ്റിയത്.

സംഭവത്തെ തുടർന്ന് പനമരം സിഎച്ച്സിയിൽ ചികിത്സയിലായിരുന്ന പച്ചിലക്കാട് വരിയിൽ നൗഷാദിന്റെ ഭാര്യ ഫാത്തിമയ്ക്കാണ് (36) പരുക്കേറ്റത്. മാത്രമല്ല ഇന്ന് ആശുപത്രി വിടേണ്ടിയിരുന്ന ഫാത്തിമയെ തലയ്ക്കും കൈ‍,കാൽ മുട്ടുകൾക്കും പരുക്കേറ്റതിനെ തുടർന്നു വീണ്ടും ആശുപത്രിയിൽ പ്രവേശിപ്പിച്ചിരിക്കുകയാണ്.

കഴിഞ്ഞ ദിവസം വൈകുന്നേരം ചൂടുവെള്ളം എടുക്കാൻ പഴയ ആശുപത്രി കെട്ടിടത്തിലെത്തി മടങ്ങുകയായിരുന്നു. ഇതിനിടെയാണ് 4 തെരുവുനായ്ക്കൾ ഫാത്തിമയെ ആക്രമിക്കാനെത്തിയത്. ആശുപത്രി വരാന്തയിലും ആംബുലൻസിനടിയിലും കൂട്ടത്തോടെ നിന്ന നായ്ക്കൾ ഇവരുടെ പിന്നാലെ കുരച്ചെത്തുകയായിരുന്നു. ഇതോടെ ഭയന്ന് ഓടിയ യുവതി വീണു.