ഗവർണറും കേരള സർവകലാശാലയും തമ്മിലുള്ള പോരിന് ഇത് വരെ ഒരു അന്ത്യം വന്നിട്ടില്ല. കഴിഞ്ഞ ദിവസവും ചില നീക്കങ്ങൾ ഉണ്ടായി. ഇപ്പോൾ ഇതാ ഇതിനിടയിൽ ഒരു നിർണ്ണായക നീക്കം നടത്തിയിരിക്കുകയാണ്‌ കേരള സർവകലാശാല. കേരള സർവകലാശാലയുടെ പ്രത്യേക സിൻഡിക്കേറ്റ് യോഗം ഇന്ന് ചേരുവാനിരിക്കുകയാണ് .

പുതിയ വിസിയെ തിരഞ്ഞെടുക്കാനുള്ള സെർച്ച് കമ്മറ്റിയിലേക്ക് സെനറ്റ് അംഗത്തെ നിശ്ചയിക്കണമെന്ന ഗവർണറുടെ അന്ത്യശാസനവും ഇത് സംബന്ധിച്ചുള്ള നടപടികളും ഇന്നത്തെ യോഗത്തിൽ ചർച്ചയാകും. എന്നാൽ സർവ്വകലാശാല തീരുമാനത്തിൽ കടുത്ത അതൃപ്തിയാണ് ഗവർണർ അറിയിച്ചത്. , പുതിയ വിസിയെ കണ്ടെത്താനുള്ള നടപടികളുമായി അദ്ദേഹം മുന്നോട്ടു പോവുകയാണ്.

സെനറ്റ് പ്രതിനിധിയെ തിരഞ്ഞെടുക്കാൻ വിസി വിസമ്മതിച്ച സാഹചര്യത്തിൽ ഗവർണ്ണർ സ്വന്തം നിലയ്‌ക്ക് നിയമന നടപടിയുമായി മുന്നോട്ട് പോകുമെന്നാണ് കിട്ടുന്ന സൂചന . കഴിഞ്ഞ ഓഗസ്റ്റിലാണ് സെനറ്റ് പ്രതിനിധി വൈകിയതിനാൽ യുജിസിയുടെയും ഗവർണറുടെയും പ്രതിനിധികളെ ഉൾക്കൊള്ളിച്ച് പുതിയ വി സിയെ തെരഞ്ഞെടുക്കാനുള്ള സെർച്ച് കമ്മറ്റിക്ക് ഗവർണർ രൂപം നൽകിയത്.

ഇതിന് പിന്നാലെ സെനറ്റ് പ്രതിനിധിയെ ഈ മാസം 26നു മുൻപ് നാമനിർദേശം ചെയ്യണമെന്ന് കേരള വി സിയോട് ഗവർണർ നിർദ്ദേശിക്കുകയായിരുന്നു. വിസി ഗവർണറോട് അറിയിച്ചത് വീണ്ടും സെനറ്റ് യോഗം ചേരാൻ കഴിയില്ലെന്നായിരുന്നു .ഗവർണർ സെർച്ച് കമ്മിറ്റി രൂപീകരിച്ചതിനെതിരെ പ്രമേയം പാസാക്കിയ സാഹചര്യത്തിൽ വീണ്ടുമൊരു സെനറ്റ് യോഗം വിളിക്കുന്നതിൽ പ്രസക്തിയില്ലെന്നും വി സി മറുപടി കൊടുത്തു . പക്ഷേ വിസിയുടെ മറുപടിയിൽ ഗവർണർക്ക് കടുത്ത അതൃപ്തിയുണ്ട്. ഇതിനിടയിലാണ് പ്രത്യേക സിൻഡിക്കേറ്റ് യോഗം ഇന്ന് ചേരുന്നത്.