രാഹുല്‍ ഗാന്ധി നയിക്കുന്ന ഭാരത് ജോഡോ യാത്ര ഗതാഗത തടസം ഉണ്ടാക്കുന്നുവെന്ന് ആരോപിച്ച് സമര്‍പ്പിച്ച ഹര്‍ജി ഹൈക്കോടതി തള്ളി. യാത്രയ്ക്ക് അനുമതിയുണ്ടെന്നും, യാത്ര സമാധാനപരമായി കടന്നു പോകുകയാണെന്നും സര്‍ക്കാര്‍ കോടതിയെ അറിയിച്ചു.

യാത്ര ഗതാഗത തടസമുണ്ടാക്കുന്നുവെന്ന് ആരോപിച്ച് അഭിഭാഷകനായ കെ.വിജയന്‍ സമര്‍പ്പിച്ച പൊതുതാത്പര്യ ഹര്‍ജിയാണ് ഡിവിഷന്‍ ബെഞ്ച് പരിഗണിച്ചത്.  നിയമവിരുദ്ധ നടപടികള്‍ക്കെതിരേ കേസെടുത്തിട്ടുണ്ടെന്നും സര്‍ക്കാര്‍ കോടതിയെ അറിയിച്ചു.



അതേസമയം രാഹുല്‍ഗാന്ധി നയിക്കുന്ന ഭാരത് ജോഡോ പദയാത്ര മലപ്പുറം ജില്ലയില്‍ പ്രവേശിച്ചു. ചൊവ്വ, ബുധന്‍, വ്യാഴം ദിവസങ്ങളിലാണ് മലപ്പുറം ജില്ലയില്‍ പര്യടനം നടത്തുന്നത്.

ചൊവ്വാഴ്ച രാവിലെ 6.30ന് മലപ്പുറം-പാലക്കാട് ജില്ലാ അതിര്‍ത്തിയായ പുലാമന്തോള്‍ പാലം വഴി ജാഥ ജില്ലയിലേക്ക് പ്രവേശിച്ചത്.നാളെ രാവിലെ 6.30ന് പാണ്ടിക്കാട് നിന്നാരംഭിച്ച് എട്ടോടെ കാക്കത്തോട് പാലം വഴി രാഹുല്‍ഗാന്ധിയുടെ മണ്ഡലമായ വയനാട് പാര്‍ലമെന്റിലേക്ക് പ്രവേശിക്കും. വൈകിട്ട് നാലിന് വണ്ടൂര്‍ നടുവത്ത് നിന്നാരംഭിക്കുന്ന പദയാത്ര ഏഴോടെ നിലന്പൂര്‍ ചന്തക്കുന്നില്‍ ബഹുജന റാലിയോടെ സമാപിക്കും.
വ്യാഴാഴ്ച ഉച്ചയ്ക്ക് ശേഷം നാടുകാണിയില്‍ നിന്നാണ് പദയാത്ര തമിഴ്നാട്ടിലേക്ക് പുനരാരംഭിക്കുക.