ദുര്‍ഗാഷ്ടമി ദിനമായ ഒക്ടോബര്‍ മൂന്നിന് സംസ്ഥാനത്തെ സ്‌കൂളുകള്‍ക്കും കോളജുകള്‍ക്കും അവധി പ്രഖ്യാപിച്ചു. വിവിധ ഹൈന്ദവ സംഘടനകള്‍ ഇക്കാര്യം ആവശ്യപ്പെട്ട് രംഗത്തുവന്നിരുന്നു.

പൂജവെപ്പ് ഒക്ടോബര്‍ രണ്ടിന് വൈകീട്ട് 6.45-ന് തുടങ്ങുന്നതിനാല്‍ ഒക്ടോബര്‍ മൂന്നാം തീയതി തിങ്കളാഴ്ച ദുര്‍ഗാഷ്ടമി ദിവസം പൊതു അവധി പ്രഖ്യാപിക്കണമെന്നായിരുന്നു ഹൈന്ദവ സംഘടനകളുടെ ആവശ്യം.

അതേസമയം നവരാത്രി വിഗ്രഹ ഘോഷയാത്രയ്ക്ക് തലസ്ഥാനത്ത് ആചാരപരമായ വരവേല്‍പ്പാണ് നല്‍കിയത്. നവരാത്രി മണ്ഡപത്തിലും മറ്റ് ക്ഷേത്രങ്ങളിലും വിഗ്രഹങ്ങളെ പൂജയ്ക്കിരുത്തി. ഘോഷയാത്രയില്‍ അകമ്പടിയായി കൊണ്ടുവന്ന ഉടവാള്‍ നവരാത്രിമണ്ഡപത്തിന് മുന്നില്‍ രാജകുടുംബം സ്ഥാനി ഏറ്റുവാങ്ങി.

നവരാത്രി ആഘോഷങ്ങളോടനുബന്ധിച്ച് കുഴിത്തുറ മഹാദേവ ക്ഷേത്രത്തില്‍ നിന്നാരംഭിച്ച ഘോഷയാത്രയാണ് തലസ്ഥാനത്തെത്തിയത്. കളിയിക്കാവിളയില്‍ ദേവസ്വം പ്രസിഡന്റ് അടക്കമുള്ളവരാണ് ഘോഷയാത്ര സംസ്ഥാനത്തേക്ക് സ്വീകരിച്ചത്. റോഡിനിരുവശവും തട്ടമൊരുക്കി പൂജയും സ്വീകരണവും ഒരുക്കിയിരുന്നു.

കവടിയാര്‍ രാജകുടുംബാംഗങ്ങളും ശ്രീ പത്മനാഭ ക്ഷേത്രം ഭാരവാഹികളും ചേര്‍ന്നാണ് ഘോഷയാത്രയെ അനന്തപുരിയിലേക്ക് സ്വീകരിച്ചത്. പത്മനാഭപുരം കൊട്ടാര ത്തില്‍ നിന്നു വേളിമല കുമാരസ്വാമി, സരസ്വതി ദേവി, ശുചീന്ദ്രം മുന്നൂറ്റിനങ്ക എന്നീ വിഗ്രഹങ്ങളാണ് ഘോഷയാത്രയായി എത്തിച്ചത്. കരമന ആവടിയമ്മന്‍ കോവിലിലെത്തിച്ച വിഗ്രഹങ്ങള്‍ക്ക് ഇറക്കിപൂജയും സരസ്വതിദേവിക്ക് ആറാട്ടും നടത്തി. ശേഷം കുമാരസ്വാമിയെ അലങ്കരിച്ച വെള്ളിക്കുതിരപ്പുറത്ത് എഴുന്നെള്ളിക്കുകയും ചെയ്തു.