പനച്ചിക്കാട് ശ്രീ ദക്ഷിണമൂകാംബീ ദേവി ക്ഷേത്രത്തില്‍ വിദ്യാരംഭ ചടങ്ങുകള്‍ പുരോഗമിക്കുന്നു. നവരാത്രിയുടെ അവസാന നാള്‍ എന്നറിയപ്പെടുന്ന വിജയദശമി ദിനത്തില്‍, കുരുന്നുകളില്‍ ആദ്യക്ഷരം പകരാനായി ക്ഷേത്രങ്ങളിലെല്ലാം തന്നെ ഭക്തജനങ്ങളുടെ വന്‍തിരക്കാണ്. ക്ഷേത്രങ്ങള്‍, സാംസ്‌കാരിക കേന്ദ്രങ്ങള്‍, ഗ്രന്ഥശാലകള്‍ എന്നിവിടങ്ങളിലും പ്രത്യേകം സജ്ജീകരിച്ച സ്ഥലങ്ങളിലുമാണ് വിദ്യാരംഭചടങ്ങുകള്‍.

തിരൂര്‍ തുഞ്ചന്‍പറമ്പില്‍ പുലര്‍ച്ചെ വിദ്യാരംഭ ചടങ്ങുകള്‍ തുടങ്ങി. കൊല്ലൂര്‍ മൂകാംബിക ക്ഷേത്രത്തിലും കോട്ടയം പനച്ചിക്കാട് ക്ഷേത്രത്തിലും എറണാകുളം പറവൂര്‍ ദക്ഷിണ മൂകാംബി ക്ഷേത്രത്തിലും എഴുത്തിനിരുത്തിനായി വന്‍ തിരക്കാണ്.

കുട്ടികകളുടെ നാവിലും പിന്നീട് അവരുടെ വിരല്‍കൊണ്ട് മണലിലോ, അരിയിലോ ആചാര്യന്‍മാര്‍ അക്ഷരങ്ങള്‍ എഴുതിക്കുകയാണ് പതിവ്.

കോവിഡ് ഭീതിയിലായിരുന്ന കഴിഞ്ഞ രണ്ടു വര്‍ഷങ്ങളിലും വീടുകളില്‍ മാത്രമായിരുന്നു എഴുത്തിനിരുത്ത് നടന്നത്. അതുകൊണ്ടുതന്നെ ഈ വര്‍ഷം എഴുത്തിനിരുത്തിന് വന്‍ തിരക്കാണ്.

വിദ്യാരംഭത്തിനായി കൊല്ലൂര്‍ മൂകാംബിക ക്ഷേത്രത്തില്‍ വിപുലമായ ഒരുക്കങ്ങളാണ് നടത്തിയിട്ടുള്ളത്. പുലര്‍ച്ചെ നാലുമുതല്‍ എഴുത്തിനിരുത്തല്‍ ചടങ്ങാരംഭിച്ചു. അതിനു പുറമെ നൃത്തം, പാട്ട് ഉള്‍പ്പെടെ കലാരൂപങ്ങളിലും ഇന്ന് വിദ്യാരംഭം നടക്കുന്നുണ്ട്.