അച്ഛനു പിന്നാലെ മകളും ....വെഞ്ഞാറമ്മൂട്ടില്‍ അച്ഛനും മകളും സഞ്ചരിച്ച ബൈക്കില്‍ ആംബുലന്‍സ് ഇടിച്ച സംഭവത്തില്‍ നാലുവയസ്സുകാരി മകളും മരിച്ചു, സങ്കടം അടക്കാനാവാതെ നിലവിളിച്ച് വീട്ടുകാര്‍.

ശനിയാഴ്ച ഉണ്ടായ അപകടത്തില്‍ അച്ഛന്‍ ഷിബു മരണപ്പെട്ടിരുന്നു. ഡ്രൈവര്‍ക്കുപകരം മെയില്‍ നഴ്‌സ് ആയിരുന്നു ആംബുലന്‍സ് ഓടിച്ചത്. മെയില്‍ നഴ്‌സ് അമലിനെയും ഡ്രൈവറിനെയും അന്നുതന്നെ പിടികൂടിയിട്ടുണ്ടായിരുന്നു. ശനി പുലര്‍ച്ചെ 6.20നാണ് വെഞ്ഞാറമുട്ടില്‍ അച്ഛനും മകളും സഞ്ചരിച്ച ബൈക്കില്‍ ആംബുലന്‍സ് ഇടിക്കുന്നത്.

ആശുപത്രിയില്‍ പ്രവേശിപ്പിച്ച ഷിബു മരിക്കുകയും മകള്‍ ഗുരുതരാവസ്ഥയില്‍ ചികിത്സയില്‍ കഴിയുകയായിരുന്നു. ഇടുക്കി മെഡിക്കല്‍ കോളജില്‍ രോഗിയെ എത്തിച്ചു മടങ്ങും വഴിയായിരുന്നു അപകടം നടന്നത്. ഡ്രൈവര്‍ ഉറങ്ങിയതാണ് അപകട കാരണമെന്നു പൊലീസ് അപ്പോള്‍ തന്നെ കണ്ടെത്തിയിട്ടുണ്ടായിരുന്നു.

പിന്നീട് പൊലീസ് നടത്തിയ പരിശോധനയിലാണു ഡ്രൈവറല്ല വാഹനമോടിച്ചതെന്നു കണ്ടെത്തിയത്. മെഡിക്കല്‍ കോളജ് എംപ്ലോയിസ് സൊസൈറ്റിയുടെ പേരിലുള്ള വാഹനമോടിച്ചത് മെയില്‍ നഴ്‌സായിരുന്നു. ഉറക്കക്ഷീണം കാരണം വാഹനം അമലിനെ ഏല്‍പ്പിക്കുകയായിരുന്നെന്നാണു ഡ്രൈവര്‍ പൊലീസിനു മൊഴി നല്‍കിയിരിക്കുന്നത്.