കൊടുംക്രൂരത....നരബലിക്കേസില് കൊല്ലപ്പെട്ട സ്ത്രീകളുടെ മൃതദേഹങ്ങള് മുറിച്ചത് എങ്ങനെയെന്ന് ഡമ്മിയില് പോലീസിനും ഫൊറന്സിക് സര്ജനും കാണിച്ചുകൊടുത്ത് ഒന്നാംപ്രതി ഷാഫി....
കൊടുംക്രൂരത... നരബലിക്കേസില് കൊല്ലപ്പെട്ട സ്ത്രീകളുടെ മൃതദേഹങ്ങള് മുറിച്ചത് എങ്ങനെയെന്ന് ഡമ്മിയില് പോലീസിനും ഫൊറന്സിക് സര്ജനും കാണിച്ചുകൊടുത്ത് ഒന്നാംപ്രതി ഷാഫി.
കൊലപാതകം നടത്തിയ സ്ഥലമെന്ന് പ്രതികള് പറഞ്ഞ കടകംപള്ളില് വീട്ടില് ഇന്നലെ നടന്ന തെളിവെടുപ്പിലായിരുന്നു ഇത്. കോട്ടയം മെഡിക്കല് കോളേജിലെ ഫൊറന്സിക് വിഭാഗം മേധാവി ഇത് നിരീക്ഷിച്ചു. ഡോക്ടറുടെ അഭിപ്രായം പിന്നീട് റിപ്പോര്ട്ടായി നല്കും. കേസിലെ നിര്ണായക തെളിവായിരിക്കും ഫൊറന്സിക് മേധാവിയുടെ ഈ റിപ്പോര്ട്ട്. കൊലപാതകം നടത്തിയ മുറിയിലായിരുന്നു ഡമ്മിയിലുള്ള പുനരാവിഷ്കാരം. ഇത് നടത്തുമ്പോള് വീട്ടുടമയും രണ്ടാംപ്രതിയുമായ ഭഗവല് സിങ്ങിനെയും പോലീസ് അടുത്തുനിര്ത്തിയിട്ടുണ്ടായിരുന്നു.
ഭഗവല്സിങ്ങിന്റെ ഭാര്യയും മൂന്നാംപ്രതിയുമായ ലൈലയെ വെള്ളിയാഴ്ചത്തെ തെളിവെടുപ്പിന് എത്തിച്ചില്ല. പദ്മയുടെ മൃതദേഹം 56-ഉം റോസ്ലിന്റേത് അഞ്ചും കഷണങ്ങളാക്കിയെന്നാണ് കോട്ടയം മെഡിക്കല് കോളേജിലെ പോസ്റ്റ്മോര്ട്ടത്തില് വ്യക്തമായിരുന്നത്. ഇത്രയും കഷണങ്ങളാക്കിയത് എങ്ങനെയെന്ന് കാണിക്കാന് ഡോക്ടര് ഷാഫിയോട് ആവശ്യപ്പെട്ടു.
കൊല്ലപ്പെട്ട പദ്മയുടെ മൃതദേഹം പോസ്റ്റ്മോര്ട്ടം ചെയ്തപ്പോള് വാരിയെല്ല് അടങ്ങുന്ന ഭാഗങ്ങള് ഉണ്ടായിരുന്നില്ല. അത് കണ്ടെത്താനുള്ള ശ്രമം ഇന്നലെ നടത്തിയെങ്കിലും വിജയിച്ചില്ല. വീടിന്റെ വടക്കുഭാഗത്ത് പദ്മയുടെ മൃതദേഹം കുഴിച്ചിട്ട സ്ഥലത്തിനടുത്ത് മണ്ണിളകിയിടത്ത് കുഴിച്ചുനോക്കിയെങ്കിലും ഒന്നും കണ്ടെത്തിയില്ല. ഇതിനടുത്തുള്ള സെപ്റ്റിക് ടാങ്കും പരിശോധിച്ചിരുന്നെങ്കിലും കണ്ടെത്താന് കഴിഞ്ഞില്ല.കൊച്ചിയില്നിന്നുള്ള സെന്ട്രല് ഫൊറന്സിക് ലാബിലെ ഉദ്യോഗസ്ഥരുടെ പരിശോധനയും ഇന്നലെ നടന്നു. പദ്മയെ കൊല്ലാനുപയോഗിച്ച കയര് കത്തിച്ച ഇടത്ത് ഇതിന്റെ അവശിഷ്ടങ്ങള് കണ്ടെത്താനായിട്ടുണ്ട്.
അതേസമയം ഇരട്ട നരബലി സംഭവത്തില് കൊല്ലപ്പെട്ട സ്ത്രീകളുടെ ശരീര ഭാഗങ്ങള് മുഴുവന് കണ്ടെത്താനാകാത്തതില് ദുരൂഹതയുയരുന്നു. ഇതേക്കുറിച്ച് വിശദമായ അന്വേഷണം നടത്തണമെന്ന നിലപാടിലാണ് പോലീസ്. ഇവരുടെ മൊഴി പ്രകാരമുള്ള ശരീരാവശിഷ്ടങ്ങള് പരിശോധനയില് കിട്ടിയിട്ടില്ല. ഇതാണ് അന്വേഷണ സംഘത്തിന് സംശയം വര്ധിപ്പിച്ചത്. ഈ സാഹചര്യത്തില് അവശിഷ്ടങ്ങള് ഷാഫി മറ്റെവിടേയ്ക്കെങ്കിലും കൊണ്ടുപോയോ എന്ന കാര്യമാണ് ഇപ്പോള് പരിശോധനയിലുണ്ട്.
തുടക്കം മുതലേ ചോദ്യം െചയ്യലിനോട് സഹകരിക്കാത്ത പ്രകൃതമാണ് ഷാഫിയുടേത്. പല ചോദ്യങ്ങള്ക്കും ചെറു ചിരി മാത്രമാണ് മറുപടി. ഒരേ ചോദ്യം പല തവണ ചോദിക്കുമ്പോള് പല തരത്തിലുള്ള മറുപടിയാണ് നല്കുന്നത്. ഇയാളെ നുണ പരിശോധനയ്ക്ക് വിധേയനാക്കാനും ശ്രമം നടക്കുന്നുണ്ട്. കസ്റ്റഡിയിലുള്ള പ്രതികള് മുമ്പ് ചോദ്യം ചെയ്യലിനോട് സഹകരിച്ചിരുന്നു. എന്നാല്, പരസ്പര ബന്ധമില്ലാത്ത കാര്യങ്ങളാണ് ഇപ്പോള് പറയുന്നതെന്ന് അന്വേഷക സംഘം വിലയിരുത്തുന്നു. കസ്റ്റഡി കാലാവധി അവസാനിക്കുന്നത് തിങ്കളാഴ്ചയാണ്.
https://www.facebook.com/Malayalivartha
