ഗ്രൂപ്പ് ബുക്കിങ് സംവിധാനം... ശബരിമല തീര്‍ത്ഥാടകര്‍ക്കായി സംസ്ഥാനത്തിന്റെ വിവിധ ഭാഗങ്ങളില്‍ നിന്ന് പുറപ്പെടുന്ന 300 കെഎസ്ആര്‍ടിസി സ്പെഷ്യല്‍ സര്‍വിസില്‍ ഗ്രൂപ്പ് ബുക്കിങ് സംവിധാനമൊരുക്കുമെന്ന് ഗതാഗത മന്ത്രി ആന്റണി രാജു.

അതേസമയം 40 പേരെങ്കിലും സംഘത്തില്‍ ഉണ്ടാവണം. ഗ്രൂപ്പ് ബുക്കിങ്ങിന്റെ അടിസ്ഥാനത്തില്‍ കേരളത്തിലെ വിവിധ അയ്യപ്പക്ഷേത്രങ്ങള്‍ കേന്ദ്രീകരിച്ച് ശബരിമലയിലേക്ക് പ്രത്യേക സര്‍വിസ് ഉണ്ടായിരിക്കും.

നിലയ്ക്കലില്‍ നിന്ന് പമ്പയിലേക്ക് ഒരു മിനിറ്റില്‍ ഒരു ബസ് എന്ന നിലയില്‍ സര്‍വിസ് നടത്തും. നിലക്കലില്‍ മുതിര്‍ന്ന പൗരന്മാര്‍ക്ക് വാഹനത്തില്‍ കയറാന്‍ പ്രത്യേക ക്യൂ സംവിധാനമുണ്ടാകും. 200 ബസ് നിലക്കല്‍ പമ്പ ചെയിന്‍ സര്‍വിസ് നടത്തും.

മകരവിളക്കിന് 1000 ബസ് സര്‍വിസ് നടത്തും. സുരക്ഷ കണക്കിലെടുത്ത് ചരക്കു വാഹനങ്ങളിലും ഓട്ടോറിക്ഷകളിലും പമ്പയിലേക്ക് വരുന്നത് നിരുത്സാഹപ്പെടുത്തിയേക്കും. നവംബര്‍ പത്തോടുകൂടി വകുപ്പുതല പ്രവര്‍ത്തനങ്ങള്‍ പൂര്‍ത്തിയാക്കുമെന്നും മന്ത്രി . ശബരിമല തീര്‍ത്ഥാടനവുമായി ബന്ധപ്പെട്ട് പമ്പയില്‍ ചേര്‍ന്ന അവലോകന യോഗത്തില്‍ സംസാരിക്കുകയായിരുന്നു മന്ത്രി.


തീര്‍ത്ഥാടകര്‍ക്ക് അടിയന്തര സഹായം നല്‍കാനായി പത്തനംതിട്ട, കോട്ടയം, ഇടുക്കി ജില്ലകളിലായി നാനൂറോളം കിലോമീറ്റര്‍ റോഡ് മോട്ടോര്‍ വാഹന വകുപ്പിന്റെ സേഫ്സോണ്‍ പദ്ധതി നിരീക്ഷണത്തിലായിരിക്കുമെന്നും മന്ത്രി .