ഭീതിയ്‌ക്കൊടുവില്‍ ആശ്വാസം... വയനാട് ചീരാലില്‍ ഒരു മാസമായി ഭീതി പരത്തിയ കടുവ വനംവകുപ്പ് സ്ഥാപിച്ച കൂട്ടിലായി....ജനവാസ മേഖലയിലിറങ്ങി ജനങ്ങളെയാകെ ഭീതി പടര്‍ത്തിയിരുന്നു.

പ്രദേശത്ത് ഒരു മാസമായി കറങ്ങി നടന്ന കടുവ, തോട്ടാമൂല ഫോറസ്റ്റ് ഓഫീസിന് സമീപം വനംവകുപ്പ് സ്ഥാപിച്ച് കൂട്ടില്‍ ഇന്ന് പുലര്‍ച്ചെയാണ് കുടുങ്ങിയത്. അതിനെ ബത്തേരിയിലെ പരിപാലന കേന്ദ്രത്തിലേക്ക് മാറ്റി. വയനാട് വന്യജീവി സങ്കേതത്തോട് ചേര്‍ന്ന് കിടക്കുന്ന പ്രദേശമാണ് ചീരാല്‍.

നാട്ടിലിറങ്ങിയ കടുവ പതിമൂന്ന് പശുക്കളെയാണ് ഇതുവരെ ആക്രമിച്ചത്. കടുവയ്ക്ക് വേണ്ടി വൈല്‍ഡ് ലൈഫ് വാര്‍ഡന്റെ നേതൃത്വത്തിലുള്ള സംഘം ഉള്‍വനത്തിലടക്കം ദിവസങ്ങളോളം തെരച്ചില്‍ നടത്തിയിരുന്നെങ്കിലും അന്നൊന്നും ഒരു ഫലവുമുണ്ടായിരുന്നില്ല.

തുടര്‍ന്ന് കടുവയെ കണ്ടെത്താനായി 18 നിരീക്ഷണ ക്യാമറകളും മൂന്ന് കൂടുകളും സ്ഥാപിക്കുകയായിരുന്നു. ചീഫ് വെറ്റിനറി സര്‍ജന്‍ അരുണ്‍ സക്കറിയയുടെ നേതൃത്വത്തിലുള്ള മൂന്നംഗ സംഘവും ആര്‍ആര്‍ടി ടീമും പ്രദേശത്ത് ക്യാംപ് ചെയ്യുകയായിരുന്നു. കടുവയ്ക്ക് പത്ത് വയസിലധികം പ്രായമുണ്ട്. ഇതിന്റെ ചിത്രങ്ങള്‍ 2016ല്‍ വനംവകുപ്പിന്റെ ക്യാമറയില്‍ പതിഞ്ഞിട്ടുണ്ടായിരുന്നു.