ഈ അടുത്തിടെയായി കേരളാ പോലീസിന് നാണക്കേടിന്റെ കഥകള്‍ മാത്രമാണുള്ളത്. എന്തിനേറെ പറയുന്നു ഏറ്റവും ഒടുവില്‍ പുറത്തുവന്ന ഷാരോണ്‍ വധക്കേസിലും പൊലീസിന്റെ അനാസ്ഥയും സ്വജന പക്ഷപാതവും ചര്‍ച്ചാ വിഷയമായി, ഇതിനെല്ലാം തെറിവിളി കേല്‍ക്കുന്നത് ആഭ്യന്തരം ഭരിക്കുന്ന മുഖ്യമന്ത്രി പിണറായി വിജയന് തന്നെയാണ്. പിണറായി പോലീസ് എന്നാണ് പൊലീസിനെ മാധ്യമങ്ങള്‍ പോലും വിശേഷിപ്പിക്കുന്നത്. പൊലീസിനെതിരെയുള്ള പരാതികള്‍ വ്യാപകമായ പശ്ചാത്തലത്തില്‍ പിണറായി വിജയനു തന്നെ ജനങ്ങളോട് കുറ്റസമ്മതം നടത്തുന്നത്.

ഇനിയും സഹിക്കാനാകില്ല സദ്ഗുണങ്ങള്‍ ഇല്ലാത്തവര്‍ പൊലീസില്‍ തുടരേണ്ടതില്ലെന്ന നിലപാടാണ് ഇപ്പോള്‍ മുഖ്യമന്ത്രി പിണറായി വിജയന്‍ സ്വീകരിച്ചിരിക്കുന്നത്. പൊലീസ് സേനയ്ക്ക് ചേരാത്ത പ്രവര്‍ത്തി ചെയ്യുന്നവര്‍ ആ സേനയുടെ ഭാഗമായി നില്‍ക്കണോ എന്നും മുഖ്യമന്ത്രി ചോദിച്ചു. ചിലരുടെ പ്രവര്‍ത്തികള്‍ സേനക്ക് അപമാനമുണ്ടാക്കുന്നു. പൊലീസ് ഇങ്ങനെയാകാന്‍ പാടില്ലെന്ന് ജനം ആഗ്രഹിക്കുന്നുവെന്നായിരുന്നു മുഖ്യമന്ത്രി പഞ്ഞത്.

ഇത്രയും പറഞ്ഞിട്ട് ഇതൊരു ഒറ്റപ്പെട്ട സംഭവമാണെന്നാണ് പിണറായി വാദിച്ചത്. ഈ സമീപനം അക്ഷരാര്‍ത്ഥത്തില്‍ ഒരു ആഭ്യന്തര മന്ത്രിയ്ക്ക് യോജിച്ചതല്ലെന്നതാണ് പ്രധാനമായും ഉയരുന്ന ആക്ഷേപം.

കിളികൊല്ലൂരില്‍ ഒരു സൈനികനേയും സഹോദരനെയും തല്ലിച്ചതച്ച പോലീസ് അവരുടെ കേമത്തരം കാണിച്ചതില്‍ ആ ചെറുപ്പക്കാര്‍ക്ക് നഷ്ടപ്പെട്ടതെന്തോക്കെയാണെന്നതിനെ കുറിച്ച് പരാമര്‍ശിക്കാനോ അതില്‍ ഖേദം പ്രകടിപ്പിക്കാനോ പോലും പിണറായി തുനിഞ്ഞില്ല? പി.എസ്.സി ലിസ്റ്റില്‍ ഉള്‍പ്പെട്ട വിഘ്‌നേഷ് എന്ന ചെറുപ്പക്കാരനെ ഫിസിക്കല്‍ ടെസ്റ്റിന് പോകാന്‍ പോലും കഴിയാത്ത വിധത്തിലാക്കി ഈ പോലീസ് ഏമാന്മാര്‍. അയാളുടെ സഹോദരനായ സൈനികന്‍ വിഷ്ണു അതിക്രൂരമായി അക്രമിക്കപ്പെട്ട് ജോലിസ്ഥലത്തേക്ക് തിരിച്ചു പോയി. ആറു വര്‍ഷത്തെ പ്രണയത്തിനൊടുവില്‍ വിവാഹം കഴിക്കാനിരുന്ന വിഷ്ണുവിന്റെ ജീവിതം കൂടിയാണ് അവരില്ലാതാക്കിയയത്.

ഇവിടെ ഞാനാണ് രാജാവ്, എന്റെ കാല്‍ കഴുകിയ വെള്ളം കുടിക്കാതെ നിങ്ങള്‍ക്ക് ഇവുടുന്നു പോകാന്‍ കഴിയില്ല, എന്ന് കഴിഞ്ഞ ദിവസമാണ് മലപ്പുറത്ത് റോട്ടില്‍ വച്ച് അകാരണമായി പിടിച്ച് കൊണ്ട് വന്ന യുവതിയോടും കൂടെയുള്ളവരോടും ഒരു പോലീസുകാരന്‍ പറഞ്ഞത്. താന്‍ രാജാവാണെന്നും വേണമെങ്കില്‍ തന്റെ കാലു കഴുകിയ വെള്ളം കുടിപ്പിക്കാമെന്നും ഇയാള്‍ക്ക് തോന്നുന്നത് എന്ത് കൊണ്ടാണ്? കേരളം ഭരിക്കുന്ന രാജവംശമാണ് പോലീസ് എന്ന് തോന്നാന്‍, നാഴികയ്ക്ക് നാല്പതുവട്ടം കേരളത്തിന്റെ മുഖ്യമന്ത്രി പോലീസിന്റെ മാന്യതയെപ്പറ്റിയും ത്യാഗനിര്‍ഭരമായ സേവനങ്ങളെ കുറിച്ചും പറയുന്ന നാല് പുറം ഉപന്യാസം നല്‍കുന്ന ധൈര്യം ചെറുതല്ല. കേരളത്തിലാദ്യമായല്ല പോലീസിങ്ങനെ അഴിഞ്ഞാടുന്നത്. വ്യാജ ഏറ്റുമുട്ടലുകളുടെ പേരിലും യു.എ.പി.എ ചുമത്തി റെക്കോര്‍ഡ് സൃഷ്ടിച്ചതിന്റെ പേരിലും പോലീസ് പലതവണ വിമര്‍ശിക്കപ്പെട്ടിട്ടുണ്ടെങ്കിലും, യാതൊരു നടപടിയും ഇവര്‍ക്കെതിരെ എടുത്തിട്ടില്ല എന്നതും ഭരിക്കുന്ന സര്‍ക്കാരും പാര്‍ട്ടിയും നല്‍കുന്ന പിന്തുണയും ഈ വൃത്തികേടുകള്‍ മുഴുവന്‍ തുടരാന്‍ ഇവര്‍ക്ക് നല്‍കുന്ന ധൈര്യം ചെറുതല്ല.

ജനങ്ങളുടെ ജീവനും സ്വത്തിനും സംരക്ഷണം നല്‍കുക എന്നതാണ് പോലീസിന്റെ ഉത്തരവാദിത്വം. എന്നാല്‍ ഏതെങ്കിലും സാദാരണക്കാരന് റോഡ് സൈഡില്‍ വച്ച് ഒരു പോലീസ് വാഹനം കണ്ടാല്‍ സുരക്ഷിതത്വം തോന്നാറുണ്ടോ? തോന്നുന്നത് പേടിയാണ്. എന്ത് ഏടാകൂടമാണാവോ ഇവരിനി പറയാന്‍ പോകുന്നത് എന്ന പേടിയിലാണ് പോലീസ് വണ്ടിയ്ക്കള്‍ക്കു മുമ്പിലൂടെ ഓരോ മനുഷ്യനും നടക്കുന്നത്. വഴി നടക്കുന്ന ആരുടേയും മെക്കിട്ട് കേറാന്‍ പോലീസിന് കഴിയും എന്നതിന് മുടിനീട്ടി വളര്‍ത്തിയതിന്റെ പേരില്‍ ആക്രമിക്കപ്പെടുകയും അപമാനിക്കപ്പെടുകയും ചെയ്ത് ആത്മഹത്യ ചെയ്ത വിനായകന്‍ ഉദാഹരണമാണ്. മുടി നീട്ടി വളര്‍ത്തിയ, മുടി കളര്‍ ചെയ്ത, താടി വളര്‍ത്തിയ ആളുകളെ കാണുമ്പോള്‍ സംശയം തോന്നുന്ന പോലീസിന്റെ അസുഖം മാറാന്‍ ഇനി എത്രപേരുടെ ജീവിതം കൂടി തുലയണം? ഒറ്റ നോട്ടത്തില്‍ കഞ്ചാവാണെന്നും മയക്കുമരുന്നാണെന്നും മനസിലാക്കാനുള്ള പോലീസിന്റെ ട്രെയിനിങ് സംവിധാനത്തിന്റെ അടിസ്ഥാനം രൂപത്തിലും വസ്ത്രത്തിലുമെല്ലാം നിലവാരങ്ങള്‍ നിശ്ചയിച്ച പാരമ്പര്യ വാദികളുടെ അളവുകോലാണ്.

ഒരു ഭാഗത്ത് സര്‍ക്കാര്‍, സ്ത്രീകളുടെ രാത്രി നടത്തം പ്രോത്സാഹിപ്പിച്ചു കൊണ്ട് പരിപാടികള്‍ സംഘടിപ്പിക്കുമ്പോഴും, വനിതാ ശിശു വികസന വകുപ്പിന്റെ പുരോഗമന വിഡിയോകള്‍ വരുമ്പോഴും, തലശ്ശേരിയില്‍ പങ്കാളികളായ സ്ത്രീയും പുരുഷനും രാത്രി കടല്‍ പാലം കാണാന്‍ പോയതിന്റെ പേരില്‍ തല്ലിച്ചതച്ച് ജാമ്യമില്ലാ വകുപ്പുകള്‍ ചേര്‍ത്ത് ജയിലിലിടാനും, മലപ്പുറത്ത് മകനും സഹോദരനുമൊപ്പം ഭക്ഷണം കഴിക്കാന്‍ പുറത്തിറങ്ങിയ യുവതിയെ കയ്യേറ്റം ചെയ്ത്, പോലീസ് സ്റ്റേഷനില്‍ ഇരിക്കാന്‍ ഒരു കസേര പോലും കൊടുക്കാതെ അപമാനിക്കാനും കഴിയുന്നത് സദാചാര മൂല്യങ്ങള്‍ ചേര്‍ത്ത് നിര്‍മ്മിച്ച ഒരു സംവിധാനത്തിന്റെ പിന്തുണ അവര്‍ക്കുള്ളത്‌കൊണ്ടാണ്. ഈ പിപ്പിടി വിദ്യയൊന്നും ഇങ്ങോട്ട് വേണ്ട, അതൊന്നും ഇവിടെ ചിലവാകില്ല എന്ന് പോലീസിനോട് പറയാന്‍ എന്തുകൊണ്ടാണ് പിണറായി വിജയന് കഴിയാത്തത്? എന്ന ചോദ്യം പ്രസക്തമാകുമ്പോഴാണ് ഈ ജനങ്ങളുടെ കണ്ണില്‍ പൊടിയിടുന്ന കുറ്റസമ്മതവും അതിനെ ന്യായീകരിക്കലുമെല്ലാം.