ഷാരോണ്‍ കേസില്‍ അന്വേഷണം തുടരുന്നതിനിടെ ആശയക്കുഴപ്പം.... കഷായത്തില്‍ വിഷം കലക്കി ഷാരോണിനെ കൊലപ്പെടുത്തിയ കേസ് തമിഴ്‌നാട് പൊലീസിനു കൈമാറുന്ന കാര്യത്തില്‍ ക്രൈംബ്രാഞ്ചിന്റെ പ്രത്യേക അന്വേഷണസംഘം നിയമോപദേശം തേടും.

പ്രതി ഗ്രീഷ്മയുടെ വീടിരിക്കുന്ന രാമവര്‍മന്‍ചിറ തമിഴ്‌നാട് പൊലീസിന്റെ പളുഗല്‍ സ്റ്റേഷന്‍ അതിര്‍ത്തിയിലാണ്. ഗ്രീഷ്മയുടെ വീട്ടില്‍ വച്ചാണ് കഷായം നല്‍കിയതെന്നതിനാലാണ് അവിടത്തെ പൊലീസിന് കേസ് കൈമാറണോ എന്ന കാര്യത്തില്‍ നിയമോപദേശം തേടാനൊരുങ്ങുന്നത്.

തിരുവനന്തപുരം മെഡിക്കല്‍ കോളജിലാണ് ഷാരോണ്‍ മരിച്ചതെങ്കിലും കൃത്യം നടന്ന സ്ഥലത്തിന്റെ പരിധിയിലുള്ള പൊലീസ് സ്റ്റേഷന് കേസ് കൈമാറുന്നതാണ് നിലവിലുള്ള രീതി.

അന്വേഷണവും തെളിവെടുപ്പും തുടരും. കേസ് കൈമാറാനാണ് നിയമോപദേശം ലഭിക്കുന്നതെങ്കില്‍ തമിഴ്‌നാട് പൊലീസിന്റെ അഭിപ്രായം കൂടി തേടിയ ശേഷം അന്വേഷണ വിവരങ്ങള്‍ കൈമാറും.

എന്നാല്‍ ഷാരോണ്‍ കൊലക്കേസില്‍ പരാതി ലഭിച്ചതും കേസ് രജിസ്റ്റര്‍ ചെയ്തതും പാറശ്ശാല പോലീസിലായിരുന്നു. കേസില്‍ മൂന്ന് പ്രതികളെ കേരള പോലീസ് അറസ്റ്റ് ചെയ്തിട്ടുമുണ്ട്. ഈ സാഹചര്യത്തിലാണ് തുടരന്വേഷണത്തില്‍ നിയമപ്രശ്നങ്ങളുണ്ടോ, കേസ് തമിഴ്നാട് പോലീസിന് കൈമാറേണ്ടതുണ്ടോ തുടങ്ങിയ കാര്യങ്ങളില്‍ അന്വേഷണസംഘം നിയമോപദേശം തേടിയത്. കേസില്‍ തമിഴ്നാട് പോലീസും കേരള പോലീസില്‍നിന്ന് വിവരങ്ങള്‍ ശേഖരിച്ചിട്ടുണ്ട്.

അതേസമയം, കൊലപ്പെടുത്തുക എന്ന ലക്ഷ്യത്തോടെയാണ് ഷാരോണിനെ വീട്ടില്‍ നിന്ന് ഗ്രീഷ്മ വിളിച്ചുവരുത്തിയതും വിഷം കൊടുത്തതുമെന്നതിനാല്‍ കേരള പൊലീസിനു തന്നെ കേസ് അന്വേഷിക്കാമെന്ന നിയമവശവുമുണ്ടെന്ന് വിദഗ്ദ്ധര്‍ പറയുന്നു. സിആര്‍പിസി 179 പ്രകാരം ഇതിന് നിയമസാധുതയുണ്ട്.

അതിനിടെ, കഴിഞ്ഞദിവസം ഗ്രീഷ്മയുടെ അമ്മ സിന്ധു, അമ്മാവന്‍ നിര്‍മല്‍ കുമാര്‍ എന്നിവരെ തമിഴ്‌നാട് രാമവര്‍മന്‍ചിറയിലുള്ള ഇവരുടെ വീട്ടിലെത്തിച്ചു നടത്തിയ തിരച്ചിലിലാണ് വിഷക്കുപ്പി കണ്ടെത്തിയത്. ഇവര്‍ ഇരുവരുടെയും അറസ്റ്റ് ഇന്നലെ രേഖപ്പെടുത്തി. ഗ്രീഷ്മയ്‌ക്കെതിരെ ആത്മഹത്യാ ശ്രമത്തിനും കേസെടുത്തു.


ഷാരോണിനെ മരണത്തിലേക്കു നയിച്ചുവെന്നു കരുതുന്ന 'കാപിക്യു' എന്ന കളനാശിനിയുടെ കുപ്പിയാണു ഗ്രീഷ്മയുടെ വീടിനു സമീപത്തെ കുളത്തിനടുത്തുള്ള കുറ്റിക്കാട്ടില്‍ നിന്നു പൊലീസ് കണ്ടെടുത്തത്. പച്ച അടപ്പോടു കൂടിയ വെള്ള നിറത്തിലുള്ള കുപ്പിയാണു പ്രതികള്‍ കാണിച്ചു കൊടുത്തത്. പുറത്ത് ഒട്ടിച്ചിരുന്ന ലേബല്‍ വീടിനു പിന്നിലെ പടിക്കെട്ടിനു സമീപത്തു നിന്നു ലഭിച്ചു. തൊഴുത്തില്‍ നിന്നു കണ്ടെടുത്ത രണ്ട് കുപ്പികളില്‍ പച്ച, നീല നിറത്തിലുളള ദ്രാവകങ്ങളുണ്ടായിരുന്നു. ഇതു പരിശോധനയ്ക്ക് അയച്ചു.