കഷായം കലർത്താൻ പ്രേരിപ്പിക്കുന്ന അത്തരം പരിപാടികൾ പ്രത്യക്ഷപ്പെടുമ്പോൾ ഉടനെ മാറ്റുവാൻ നല്ല ഒന്നാന്തരം റിമോട്ട് വേണം. തുറന്നടിച്ച് ഡോ സുൽഫി നൂഹു. അദ്ദേഹത്തിന്റെ ഫേസ്ബുക്ക് കുറിപ്പിന്റെ പൂർണ്ണ രൂപം ഇങ്ങനെ;  എവിടെ എന്റെ റിമോട്ട്. ടിവി റിമോട്ട് ഇല്ലെങ്കിൽ ജ്യൂസുകളിലെ കഷായം ഉള്ളിൽ പോയത് തന്നെ! ഒരു റിമോട്ട് കിട്ടിയിരുന്നെങ്കിൽ... ചാനൽ മാറ്റാമായിരുന്നു! അതാണ് ഇപ്പോഴത്തെ സ്ലോഗൻ. രാത്രി പത്തരയ്ക്ക് ചാനൽ മാറ്റാനുള്ളതാണ്. എല്ലാ ദിവസവും കഴിഞ്ഞ എത്രയോ കൊല്ലങ്ങളായി പത്തരയ്ക്ക് സർവ്വ ചാനലുകളിലും ദൃശ്യം മോഡൽ കൊലപാതകങ്ങളുടെ ദൃശ്യാവിഷ്കരണം.

പിന്നെങ്ങനെ ജ്യൂസുകളിൽ കഷായം കലരാതിരിക്കും? വല്ലാതെ ഗ്ലോറിഫൈ ചെയ്ത് സൂപ്പർഹീറോ, ആന്റി ഹീറോ പരിവേഷം നൽകുന്ന കൊലപാതകികളുടെ കഥകൾ! ഈ പത്തര മണി കൊലപാതക പരമ്പരകൾ കാണുന്ന അധമനസ്സുള്ള മഹാരഥന്മാർക്ക് ഏതെങ്കിലും ഒരു നിമിഷത്തിൽ കൊലപാതക ,ക്രിമിനൽ വാസനകൾ വന്നു പോയാൽ തെറ്റ് പറയാനാവില്ല തന്നെ.

അപ്പൊ പിന്നെ സിനിമയിലും സീരിയലിലും കാണിക്കുന്നതിൽ കുഴപ്പമില്ലേയെന്നുള്ള ചോദ്യം അവിടെ നിൽക്കട്ടെ. അത്തരം സംഭവങ്ങളുടെ സ്വാധീനത്തെ പതിന്മടങ്ങ് വെല്ലുന്നതാണ് ഈ പത്തര മണി കൊലപാതക പരമ്പരകൾ. കൃത്യമായി എല്ലാദിവസവും കാത്തിരുന്ന് ആസ്വദിച്ച് വീര പരിവേഷം ഉൾക്കൊണ്ട് മയങ്ങിയുറങ്ങുന്ന കേരളം!

ഒരല്പം ജ്യൂസും കൂടെ കുറച്ച് കഷായവും കലക്കി ഇഷ്ടപ്പെട്ട കൂട്ടുകാരന് മെല്ലെ മെല്ലെ കൊടുക്കാൻ ഈ പത്തര മണി കൊലപാതക കഥകൾ ചെയ്യുന്ന സംഭാവന ഒട്ടും കുറവല്ല തന്നെ! മാധ്യമ മേലധികാരികളും മാധ്യമ സുഹൃത്തുക്കളും ക്ഷമിക്കണം. ഇത്തരം പരിപാടികൾ മൂലം ലഭിക്കുന്ന വൻ സ്പോൺസർഷിപ്പ് തുക വേണ്ടെന്നു വയ്ക്കാൻ കഴിയണം. സമൂഹത്തിന് ഒരുതരത്തിലും ഗുണം ചെയ്യാത്ത അഴുക്കിന്റെ ഗംഭീര കുത്തൊഴുക്ക്.
നമുക്കത് വേണ്ടെന്നേ.

മറ്റു ചില ഗംഭീര സ്പോൺസർഷിപ്പുകൾ കിട്ടുവാനുള്ള "പിപ്പിടി" വിദ്യ പറഞ്ഞു തരാം. ആ രക്തം പുരണ്ട സ്പോൺസർഷിപ്പ് നമുക്ക് വേണ്ട. ഫ്രഷ് ജ്യൂസ് വളരെ ഇഷ്ടം. ആരെങ്കിലും കഷായം കലർത്തിയാലൊയെന്നുള്ള സംശയം ബാക്കി. അതുകൊണ്ടുതന്നെ കഷായം കലർത്താൻ പ്രേരിപ്പിക്കുന്ന അത്തരം പരിപാടികൾ പ്രത്യക്ഷപ്പെടുമ്പോൾ ഉടനെ മാറ്റുവാൻ നല്ല ഒന്നാന്തരം റിമോട്ട് വേണം. അല്ലെങ്കിൽ ഈ പത്തര മണി കൊലപാതകങ്ങളും ഇഷ്ടംപോലെ ലഭിക്കുന്ന മയക്ക് മരുന്നും ചേർന്ന് ഇവിടെ ദൃശ്യം മോഡൽ പരമ്പരകൾ തന്നെ സൃഷ്ടിക്കും. എവിടെ എൻറെ റിമോട്ട്?