ദുരന്തമെത്തിയത് വീട്ടുമുറ്റത്ത്... മകനെ ഡ്രൈവിങ് പഠിപ്പിക്കുന്നതിനിടെ കാര്‍ വീട്ടുമുറ്റത്തെ കിണറില്‍ വീണ് പിതാവിന് ദാരുണാന്ത്യം. മകനു പരുക്കേറ്റു. കഴിഞ്ഞ ദിവസം അഭിഷിക്തനായ മാനന്തവാടി സഹായമെത്രാന്‍ മാര്‍. അലക്‌സ് താരാമംഗലത്തിന്റെ സഹോദരന്‍ മാത്തുക്കുട്ടിയാണു(58) മരിച്ചത്.

മകന്‍ ജിസിനെ  ആശുപത്രിയില്‍ പ്രവേശിപ്പിച്ചിരിക്കുകയാണ്. ഇന്നു രാവിലെ 10.20 ഓടെയായിരുന്നു അപകടം. പുറത്തേക്ക് പോകാനായി വീട്ടുമുറ്റത്ത് നിര്‍ത്തിയിട്ട കാര്‍ തിരിക്കുന്നതിനിടയില്‍ നിയന്ത്രണം വിട്ട് കിണറ്റിന്റെ ആള്‍മറ തകര്‍ത്ത് താഴേക്ക് പതിക്കുകയായിരുന്നു.

മാനന്തവാടി രൂപതയുടെ പ്രഥമ സഹായമെത്രാനായ മാര്‍ അലക്‌സ് താരമംഗലത്തിന്റെ സഹോദരനാണ് മരിച്ച മാത്തുക്കുട്ടി. സംഭവമറിഞ്ഞ് ഓടിക്കൂടിയ സമീപവാസികളും ആലക്കോട് പോലീസും ചേര്‍ന്നാണ് കിണറ്റില്‍ വീണ കാറില്‍ അകപ്പെട്ടവരെ പുറത്തെടുത്തത്.

ഈ സമയം മാത്തുക്കുട്ടിക്ക് ജീവനുണ്ടായിരുന്നുവെന്ന് പറയുന്നു. ആശുപത്രിയില്‍ കൊണ്ടുപോകും വഴിയായിരുന്നു മരണം സംഭവിച്ചത്. എന്നാല്‍ കാറില്‍ കുടുങ്ങിക്കിടന്ന ബിന്‍സിനെ ഏറെ നേരത്തെ പരിശ്രമത്തിനൊടുവിലാണ് പുറത്തെടുക്കാനായത്. അവശ നിലയിലായ ബിന്‍സ് ആശുപത്രിയില്‍ ചികിത്സയിലാണ്. 

അതേസമയം ബൈക്കില്‍ ടോറസ് ലോറിയിടിച്ച് ഗൃഹനാഥന് ദാരുണാന്ത്യം. കുറുമശ്ശേരി തെക്കെ പറമ്പില്‍ വീട്ടില്‍ കെ പി ഷാജി (59) യാണ് മരിച്ചത്. ഇന്ന് രാവിലെ 7 .50 ഓടെ അങ്കമാലി കാലടി പെരുമ്പാവൂര്‍ എം സി റോഡില്‍ കാലടി പഞ്ചായത്ത് ബസ്സ് സ്റ്റാന്‍ഡിന് മുന്‍മ്പിലായിരുന്നു അപകടം നടന്നത്. .

ബൈക്ക് യാത്രികന്റെ പിറകില്‍ ടോറസ് ഇടിക്കുകയായിരുന്നു. ടോറസ് ഷാജിയുടെ ദേഹത്തുകൂടെ കയറിയിറങ്ങി സംഭവസ്ഥലത്തു വച്ചു തന്നെ തത്ക്ഷണം മരിച്ചു..