മ്യൂസിയം പരിസരത്ത് പ്രഭാത നടത്തത്തിനിറങ്ങിയ വനിതാ ഡോക്ടർക്കെതിരെ ലൈംഗികാതിക്രമം നടത്തിയതും മന്ത്രി റോഷി അഗസ്റ്റിൻ്റെ പ്രൈവറ്റ് സെക്രട്ടറിയുടെ ഡ്രൈവർ തന്നെയെന്ന് തിരിച്ചറിഞ്ഞുകഴിഞ്ഞു. സർക്കാർ വാഹനത്തിലെത്തി അതിക്രമം കാണിച്ച ഡ്രൈവർ സന്തോഷിനെ പരാതിക്കാരിയായ വനിതാ ഡോക്ടർ തിരിച്ചറിയുകയുണ്ടായി. ഇപ്പോഴിതാ മർദ്ദിതർക്കും ചൂഷകർക്കും വേണ്ടി നിലകൊള്ളുന്നുവെന്ന് അവകാശപ്പെടുന്ന പാർട്ടിയുടെ നവലിബറിലസം എന്നാൽ ഇതൊക്കെയാണ് എന്ന് പറയുകയാണ് അഞ്ജു പാർവതി പ്രഭീഷ്.

ഫേസ്ബുക്ക് കുറിപ്പ് ഇങ്ങനെ;

വെറുതെയല്ല CCTV ക്യാമറകൾ കണ്ണടച്ചത്. വനിതാ ഡോക്ടർക്കെതിരെ അതിക്രമം നടത്തിയവൻ മതിലുകെട്ടാൻ കൂടെ കൂടിയ പുരോഗമി മാത്രമല്ല മന്ത്രിയുടെ പ്രൈവറ്റ് സെക്രട്ടറിയുടെ ഡ്രൈവർ കുടിയാണല്ലോ! മന്ത്രിയുടെ പ്രൈവറ്റ് സെക്രട്ടറിക്കും ഡ്രൈവറും കാറും പരിവാരമോ എന്നൊന്നും ചോദിച്ചേക്കരുത് കേട്ടോ.

മർദ്ദിതർക്കും ചൂഷകർക്കും വേണ്ടി നിലകൊള്ളുന്നുവെന്ന് അവകാശപ്പെടുന്ന പാർട്ടിയുടെ നവലിബറിലസം എന്നാൽ ഇതൊക്കെയാണ്. പതിവു പോലെ അക്രമി ഉന്നതനായതിനാൽ പേരും അഡ്രസ്സും ചിത്രവും ഒന്നും പ്രതീക്ഷിക്കേണ്ട. പോലീസ് വീട്ടിൽ ചെന്ന് പൊക്കാൻ ഇവൻ ചാണ്ടി സാറിൻ്റെ ഗൺമാനോ പേര് സലിംരാജോ എന്നല്ലല്ലോ..

മുഖ്യമന്ത്രിയുടെ ഔദ്യോഗിക വസതിയുടെ മൂക്കിനു താഴെ നടന്ന സംഭവമായിട്ടും പ്രതിയെ പിടിക്കാൻ പോലീസിന് രേഖാചിത്രം വേണ്ടി വന്നു. വെറും രേഖാചിത്രമല്ല , പെട്ടെന്നൊന്നും പിടികിട്ടാൻ സാധ്യതയില്ലാത്ത രേഖാചിത്രം. കാരണമെന്താ പ്രതി മുഖ്യമന്ത്രിയുടെ മൂക്കിന് താഴെ തന്നെ വിലസി നടക്കുവായിരുന്നല്ലോ. പിന്നെങ്ങനെ പോലീസ് ഏമാന്മാർ അവനെ പൊക്കും? അങ്ങനെ ലക്ഷത്തിലൊന്നാമത്തെ ഒറ്റപ്പെട്ട സംഭവത്തിനും തുമ്പുണ്ടായി. മിക്കവാറും പ്രതിയുടെ ഉന്നത പിടിപ്പാട് കണ്ടിട്ട് വനിതാഡോക്ടർ ഇവനെ കയറിപ്പിടിച്ചുവെന്ന ട്വിസ്റ്റ് പ്രതീക്ഷിക്കാം.