പ്രശസ്ത ചലച്ചിത്ര താരം കൊച്ചു പ്രേമന്റെ (62) ഭൗതിക ശരീരം ഇന്ന് രാവിലെ 11 മുതല്‍ 12 വരെ ഭാരത് ഭവനില്‍ പൊതു ദര്‍ശനത്തിന് വയ്ക്കും... ഉച്ചയ്ക്ക് 12.30 ന് തൈക്കാട് ശാന്തി കവാടത്തില്‍ സംസ്‌കരിക്കും.... വീട്ടിലെത്തി ആദരാഞ്ജലി അര്‍പ്പിച്ച് സിനിമ, സീരിയല്‍ രംഗത്തുള്ളവര്‍.


ശ്വാസകോശ രോഗത്തെ തുടര്‍ന്ന് ഇന്നലെ വൈകിട്ട് മൂന്നോടെയായിരുന്നു അന്ത്യം. തിരുമല വലിയവിളയിലെ 'ചിത്തിര'യില്‍ ഉച്ച കഴിഞ്ഞ് ഭക്ഷണം കഴിക്കുമ്പോള്‍ ദേഹാസ്വാസ്ഥ്യമുണ്ടായി. ഉടന്‍ മകന്‍ ഹരികൃഷ്ണനും മരുമകള്‍ റഷ്ലിയും ചേര്‍ന്ന് അടുത്തുള്ള സ്വകാര്യ ആശുപത്രിയിലേക്ക് കൊണ്ടുപോകും വഴിയാണ് മരണം സംഭവിച്ചത്.

ഭാര്യയും നടിയുമായ ഗിരിജാ പ്രേമനും വീട്ടിലുണ്ടായിരുന്നു. തിരുവനന്തപുരം പേയാട് ശിവരാമ ശാസ്ത്രികളുടെയും ഹരികഥാ കലാകാരി കമലത്തിന്റെയും മകനായി 1955 ജൂണ്‍ ഒന്നിനാണ് ജനിച്ചത്. എട്ടാം ക്ലാസില്‍ പഠിക്കുമ്പോഴാണ് കൊച്ചുപ്രേമന്‍ ആദ്യമായി നാടകമെഴുതി സംവിധാനം ചെയ്തത്. തുടര്‍ന്ന് ഉഷ്ണരാശി എന്ന നാടകവും രചിച്ചു.

രണ്ടു നാടകങ്ങളും ആകാശവാണിയിലെ ഇതളുകള്‍ എന്ന പരിപാടിയില്‍ പ്രക്ഷേപണം ചെയ്തു. തിരുവനന്തപുരം എം.ജി. കോളേജില്‍ നിന്ന് ബിരുദം നേടി. തിരുവനന്തപുരം കവിത സ്റ്റേജിനു വേണ്ടി ജഗതി എന്‍.കെ.ആചാരി ഒരുക്കിയ ജ്വാലാമുഖിയില്‍ അഭിനയിച്ചതോടെ കലാരംഗത്ത് ശ്രദ്ധേയനായി മാറി. ഗായത്രീ തിയേറ്റേഴ്‌സ്, സംഘചേതന, കാളിദാസ കലാകേന്ദ്രം, കേരള തിയേറ്റേഴ്‌സ് തുടങ്ങി പത്തോളം നാടക സമിതികളില്‍ പ്രവര്‍ത്തിച്ചിട്ടുണ്ട്.

നാടകത്തില്‍ സജീവമായ കാലത്താണ് കൊച്ചുപ്രേമന്‍ എന്ന പേര് സ്വീകരിച്ചത്. 1979ല്‍ ഏഴു നിറങ്ങള്‍ ആണ് ആദ്യ സിനിമ. അന്ന് നാടകരംഗത്ത് തിരക്കുള്ള താരമായിരുന്നു കൊച്ചുപ്രേമന്‍. 1996 ല്‍ രാജസേനന്‍ - ജയറാം കൂട്ടുകെട്ടിലൊരുങ്ങിയ ദില്ലിവാല രാജകുമാരനിലൂടെയാണ് സിനിമയില്‍ സജീവമായത്.

1997ല്‍ രാജസേനന്റെ എട്ടു സിനിമകളില്‍ അഭിനയിക്കുകയും ചെയ്തു. സത്യന്‍ അന്തിക്കാടിന്റെ ഇരട്ടക്കുട്ടികളുടെ അച്ഛന്‍, രാജീവ് അഞ്ചലിന്റെ ഗുരു, ജയരാജിന്റെ തിളക്കം തുടങ്ങിയ സിനിമകളിലെ കഥാപാത്രങ്ങള്‍ ശ്രദ്ധേയനാക്കി. 2016ല്‍ രഞ്ജിത്ത് സംവിധാനം ചെയ്ത ലീലയില്‍ വ്യത്യസ്തമായ കഥാപാത്രമായി.

അവസാന സിനിമ ഷാജി കൈലാസ് സംവിധാനം ചെയ്ത കടുവയാണ് . കൊച്ചുപ്രേമന്റെ മരണത്തില്‍ മുഖ്യമന്ത്രി പിണറായി വിജയന്‍, പ്രതിപക്ഷ നേതാവ് വി.ഡി. സതീശന്‍, മന്ത്രി വി.ശിവന്‍കുട്ടി, രമേശ് ചെന്നിത്തല, ബി.ജെ.പി. സംസ്ഥാന പ്രസിഡന്റ് കെ. സുരേന്ദ്രന്‍ തുടങ്ങിയവര്‍ അനുശോചിച്ചു.