വിവാദ ഫെയ്സ് ബുക്ക് പോസ്റ്റ്...അരുണ് കുമാറിനെതിരായ പരാതിയില് വിശദീകരണം തേടി യുജിസി
ജാതി പറഞ്ഞ് സമൂഹത്തില് വേര്തിരിവിന് ശ്രമം നടത്തിയെന്ന് ആരോപിച്ചാണ് കേരള സര്വകലാശാല കാര്യവട്ടം ക്യാമ്പസിലെ അധ്യാപകന് ഡോ. അരുണ് കുമാറിനെതിരെ യുജിസിക്ക് നേരത്തെ പരാതി ലഭിച്ചിരുന്നു. സംസ്ഥാന സ്കൂള് കലോത്സവത്തിലെ ഭക്ഷണ വിവാദത്തില് പഴയിടം മോഹനന് നമ്പൂതിരിക്കെതിരെ സാമൂഹ്യ മാധ്യമങ്ങളില് പോസ്റ്റ് എഴുതിയെന്ന് കാട്ടിയാണ് യുജിസി ചെയര്മാന് എം ജഗദീഷ് കുമാറിന് പരാതികള് ലഭിച്ചത്. ഇപ്പോള് ഡോ. അരുണ് കുമാറിനെതിരായ പരാതിയില് കേരള സര്വകലാശാലയോട് വിശദീകരണം തേടിയിരിക്കുകയാണ് യുജിസി.
ഈ പരാതിയില് പരിശോധന നടത്തി വിവരം അറിയിക്കാന് യുജിസി ജോയിന്റ് സെക്രട്ടറി ഡോ. മഞ്ജു സിങ്ങ് ജെ എസിനാണ് യുജിസി ചെയര്മാന് നിര്ദ്ദേശം നല്കിയത്. സ്കൂള് കലോത്സവത്തില് മാംസാഹാരം ഉള്പ്പെടുത്താത്തത് കലോത്സവത്തില് ഭക്ഷണം നല്കുന്നത് ഫുഡ് കമ്മിറ്റി നല്കിയിരിക്കുന്ന മെനു അനുസരിച്ചാണ്. അതില് മാറ്റം വരുത്തേണ്ടത് ഫുഡ് കമ്മിറ്റിയാണ്. ഫുഡ് കമ്മിറ്റി മാറ്റം വരുത്തണമെങ്കില് സര്ക്കാരാണ് മാറ്റം വരുത്തേണ്ടത്. ഏല്പ്പിച്ച ജോലി ചെയ്യുക എന്നതിനപ്പുറം ഒന്നും ചെയ്യാനില്ല. വിവാദങ്ങള് അതിന്റെ വഴിക്ക് നടക്കട്ടെ. അതു കാര്യമാക്കുന്നില്ല. കുട്ടികള്ക്ക് സമയത്ത് ഭക്ഷണം കൊടുക്കുക എന്നതു മാത്രമേയുള്ളൂയെന്ന് പഴയിടം മോഹനന് നമ്പൂതിരി നേരത്തെ പ്രതികരിച്ചിരുന്നു.
എന്നാല് വിഷയം വീണ്ടും വിവാദമായതോടെ ഇനിമുതല് സ്കൂള് കലോത്സവത്തിന് ഭക്ഷണം പാചകം ചെയ്യാനില്ലെന്ന് പഴയിടം മോഹനന് നമ്പൂതിരി പറഞ്ഞു. ഭക്ഷണം ഉണ്ടാക്കുന്നതുമായി ബന്ധപ്പെട്ട വിവാദങ്ങള് ആശങ്കുണ്ടാക്കിയെന്നും ഇനിയൊരിക്കലും ടെന്ഡര് വിളിക്കുമ്പോള് പങ്കെടുക്കില്ലെന്നും പഴയിടം പറഞ്ഞു. കലോത്സവത്തിനുണ്ടാക്കുന്ന ഭക്ഷണത്തില്പോലും വര്ഗീയതയുടെയും ജാതീയതയുടെയും വിത്തുകള് വാരിയെറിയുന്ന കാലമാണിതെന്ന് അദ്ദേഹം കുറ്റപ്പെടുത്തി.'ഇത് എന്നെ വല്ലാതെ അസ്വസ്ഥനാക്കുന്നു. വ്യക്തിയെയും അയാളുടെ സാഹചര്യത്തെയും ചെളിവാരിയെറിയുകയാണ് ഇപ്പോള് ചെയ്യുന്നത്. പഴയിടം എന്നത് ഒരു വെജ് ബ്രാന്ഡ് തന്നെയാണ്. എന്നാല് പുതിയ കാലത്തിന്റെ കലവറകളില് പഴയിടത്തിന്റെ സാന്നിദ്ധ്യം ആവശ്യമില്ല. മാറിയ സാഹചര്യത്തില് അടുക്കള നിയന്ത്രിക്കുന്നതില് ഭയമുണ്ട്. രണ്ടുകോടിയിലേറെ ജനങ്ങളെ ഇതിനകം ഊട്ടിയിട്ടുണ്ട്. എനിക്ക് അവരുടെ അനുഗ്രഹം മാത്രം മതിയെന്ന് പഴയിടം നമ്പൂതിരി പറഞ്ഞു.
അതേസമയം, കലോത്സവ ഭക്ഷണ വിവാദത്തില് പഴയിടം മോഹനന് നമ്പൂതിരിയെ അനുനയിപ്പിക്കാന് സിപിഎം ശ്രമം നടത്തിയിരുന്നു. കലോത്സവ വേദിയില് ഭക്ഷണം പാകം ചെയ്യില്ലെന്ന തീരുമാനത്തില് നിന്ന് പഴയിടം പിന്മാറുമെന്നാണ് പ്രതീക്ഷയെന്ന് കുറിച്ചിത്താനത്തെ വീട്ടിലെത്തി അദ്ദേഹത്തെ കണ്ട സിപിഎം സംസ്ഥാന സെക്രട്ടറിയറ്റ് അംഗവും മന്ത്രിയുമായ വി എന് വാസവന് പറഞ്ഞു.
എന്നാല്, തന്റെ തീരുമാനത്തില് നിന്ന് പിന്നോട്ടില്ലെന്ന സൂചനയായിരുന്നു പഴയിടത്തിന്റെ വാക്കുകളില്. കലോത്സവ വേദിയിലെ പഴയിടത്തിന്റെ സസ്യാഹാര പാചകം നവമാധ്യമങ്ങളില് വിമര്ശനം നേരിടുമ്പോള് പാര്ട്ടി പഴയിടത്തിനൊപ്പം തന്നെയെന്ന സന്ദേശവുമായാണ് സംസ്ഥാന സെക്രട്ടറിയേറ്റ് അംഗവും കോട്ടയം ജില്ലയില് നിന്നുള്ള മന്ത്രിയുമായ വി എന് വാസവന് ഇന്നലെ കുറിച്ചിത്താനത്തെ പഴയിടം മോഹനന് നമ്പൂതിരിയുടെ വീട്ടിലെത്തിയത്. കലോത്സവ വേദിയില് മാംസാഹാരം വിളമ്പണമെന്നാവശ്യപ്പെട്ടുണ്ടായ വിവാദങ്ങളിലേക്ക് മന്ത്രി നേരിട്ട് കടന്നില്ലെങ്കിലും എല്ലാ പ്രതിസന്ധിയിലും സര്ക്കാരും പാര്ട്ടിയും പഴയിടത്തിനൊപ്പം ഉണ്ടാകുമെന്ന് വാസവന് ഉറപ്പുനല്കി. നന്മ നിറഞ്ഞ മനസുള്ള തിരുമേനി എന്നാണ് കൂടിക്കാഴ്ചയ്ക്കു ശേഷം സിപിഎം നേതാവ് പഴയിടത്തെ വിശേഷിപ്പിച്ചത്. അതേസമയം, സര്ക്കാര് പ്രതിനിധിയായല്ല, സ്വന്തം സഹോദരന് എന്ന നിലയിലാണ് വാസവനെ കാണുന്നതെന്നു പറഞ്ഞ പഴയിടം കലോത്സവ പാചകത്തിലേക്ക് തിരിച്ചെത്തുന്ന കാര്യത്തില് ഉറപ്പൊന്നും നല്കാതെയാണ് മന്ത്രിയെ യാത്രയാക്കിയത്.സംസ്ഥാന വ്യാപകമായി സിപിഎം നടത്തുന്ന ഗൃഹ സന്ദര്ശന പരിപാടിയുടെ ഭാഗമായിട്ടായിരുന്നു സന്ദര്ശനം.
https://www.facebook.com/Malayalivartha
